Talinhaga 12:1-28
12 An saro na namumuot sa disiplina namumuot sa kaaraman,+Pero an saro na nauungis sa pagsagwi daing pag-iisip.*+
2 An marahay na tawo nagkakamit kan pag-uyon ni Jehova,Pero kinokondenar Niya an tawong naggigibo nin maraot na mga pakana.+
3 Mayo nin tawo na matatawan nin seguridad an sadiri paagi sa karatan,+Pero an mga matanos dai nuarin man gagabuton.
4 An may kakayahan na agom na babayi korona sa saiyang agom na lalaki,+Pero an agom na babaying minagawi nin makasusupog garo kalapaan sa mga tulang kan agom kaini.+
5 Makatanusan an mga kaisipan kan mga matanos,Pero mapandaya an paggiya kan mga maraot.
6 An mga tataramon kan mga maraot nakakagadan na pananambang,*+Pero an nguso kan mga matanos nagliligtas sa sainda.+
7 Pag an mga maraot pinabagsak, mawawara na sinda,Pero an harong kan mga matanos magdadanay na nakatindog.+
8 Inuumaw an sarong tawo huli sa may pakamansay niyang nguso,+Pero tatrataron na may pagduhagi an saro na may pusong biko.+
9 Mas marahay pang ibilang na ordinaryong tawo pero may suruguonKisa sa pamurawayon an sadiri pero mayo man nin kakanon.*+
10 An sarong matanos inaataman an saiyang mga ataman na hayop,*+Pero dawa an pagkahirak kan mga maraot maringis pa man giraray.
11 An saro na nagkukultibar kan saiyang daga mababasog nin pagkakan,+Pero an saro na nagmamaigot na magkamit nin mga daing kamanungdanan na bagay mayo nin marahay na pagmansay.*
12 An tawong maraot nauuri sa nadadakop kan ibang mga tawong maraot,Pero an gamot kan mga matanos namumunga.
13 An tawong maraot nasisilo kan saiya mismong makasalan na pananaram,+Pero an saro na matanos nakakadulag sa kasakitan.
14 An sarong tawo nababasog nin karahayan hali sa bunga kan saiyang mga itinataram,*+Asin an gibo kan saiyang mga kamot matao sa saiya nin balos.
15 An dalan kan mangmang tama sa paghiling niya,+Pero an madunong nag-aako nin sadol.*+
16 An mangmang ipinapahiling tulos* an saiyang pagkauyam,+Pero an tawong alisto an isip pinapalampas* an sarong pang-iinsulto.
17 An sarong mapagtitiwalaan na testigo magsasabi kan katotoohan,*Pero an sarong putikon na testigo nagtataram nin pangloloko.
18 An dai pinag-isipan na mga tataramon siring sa mga saksak nin espada,Pero an dila kan mga madunong nakakapaumay.+
19 An mga ngabil na pirming nagsasabi nin totoo magdadanay sagkod lamang,+Pero an nagpuputik na dila magdadanay nin madalion sana.+
20 An pandadaya nasa puso kan mga nagpapakana nin karatan,Pero an mga nag-eengkaminar* nin katuninungan igwa nin kaugmahan.+
21 Mayo nin mangyayaring maraot sa saro na matanos,+Pero kadakul na kapahamakan an maabot sa mga maraot.+
22 An nagpuputik na mga ngabil makababaldi ki Jehova,+Pero an mga minahirong may kaimbudan nakakapaugma sa saiya.
23 An tawong alisto an isip itinatago an saiyang naaaraman,Pero an puso kan mangmang tulos na pigluluwas an saiyang kamangmangan.+
24 An kamot kan mga mahigos iyo an mamamahala,+Pero an mga kamot na hugakon itatalaga sa puwersahan na pagtrabaho.+
25 An kahaditan sa puso nin tawo iyo an nakakapagabat diyan,*+Pero an marahay na tataramon iyo an nakakapagaya-gaya kaiyan.+
26 An saro na matanos sinisiyasat an saiyang mga pasabsaban,Pero an dalan kan mga maraot an naglalagalag sa sainda.
27 Dai linalapag kan sarong hugakon an hayop na gusto niyang dakupon,+Pero an kahigusan mahalagang marhay na kayamanan nin sarong tawo.
28 An dalan nin katanusan pasiring sa buhay;+Sa agihan kaiyan mayo nin kagadanan.
Mga Nota
^ O “daing pagsabot.”
^ Sa literal, “nag-aabang para sa dugo.”
^ Sa literal, “tinapay.”
^ O “an kalag kan saiyang ataman na hayop.”
^ O “kulang nin marahay na pagmansay.” Sa literal, “mayong (tikapo an) puso.”
^ Sa literal, “saiyang nguso.”
^ O “konseho.”
^ O “sa mismong aldaw na iyan.”
^ Sa literal, “tinatahuban.”
^ Sa literal, “kan kun ano an matanos.”
^ Sa literal, “nagkokonseho.”
^ O “nakakapamundo sa saiya.”
