Talinhaga 20:1-30
20 An arak paratuya-tuya,+ an inumon na de-alkohol dai makontrol;+An siisay man na nalalagalag kan mga iyan bakong madunong.+
2 An grabeng pagkatakot sa* hadi siring sa pagkatakot sa* pagngarob nin sarong leon;*+An siisay man na nagpapaanggot sa saiya isinasapeligro an mismong buhay niya.+
3 Sarong kaumawan para sa sarong tawo an paglikay sa iriwal,+Pero an lambang mangmang madalion na napapalabot diyan.+
4 An hugakon dai nag-aarado sa tiglipot,Kaya makikilimos siya sa panahon nin pag-ani na mayong-mayo siya.*+
5 An mga kaisipan* kan puso nin tawo siring sa hararom na katubigan,Pero an tawong may pakasabot nasasarok an mga iyan.
6 Dakul na tawo an nagbabalangibog kan saindang maimbod na pagkamuot,Pero siisay an makakanumpong nin tawong maimbod?
7 An saro na matanos naglalakaw sa saiyang integridad.+
Maugma an mga aki* niya na masurunod sa saiya.+
8 Pag an hadi magtukaw sa trono tanganing maghusgar,+Sinasaligsig* niya an gabos na maraot paagi kan saiyang mga mata.+
9 Siisay an makakapagsabi: “Lininig ko na an sakuyang puso;+Dalisay na ako sa kasalan ko”?+
10 An may dayang mga pantimbang asin bakong eksaktong mga pantakad*—Parehong makababaldi ki Jehova.+
11 Namimidbid paagi sa saiyang mga gibo dawa an sarong aki,*Kun baga dalisay asin tama an saiyang paggawi.+
12 An nakakadangog na talinga asin an nakakahiling na mata—An mga iyan parehong ginibo ni Jehova.+
13 Dai ka mamuot sa pagturog, ta kun iyo, magtitios ka.+
Muklata an saimong mga mata, asin mababasog ka sa tinapay.+
14 “Maluyang klase ini, maluya!” an sabi kan parabakal;Dangan minahali siya asin naghahambog manungod sa sadiri niya.+
15 Igwa nin bulawan, dakul man na korales,*Pero an mga ngabil nin kaaraman mas mahalagang marhay.+
16 Kuanon mo an bado nin sarong tawo kun naggarantiya siya sa sarong estranghero;+Kuanon mo man su iginarantiya niya kun ginibo niya iyan para sa sarong babaying dayuhan.*+
17 Masiram para sa sarong tawo an tinapay na nakua niya paagi sa pangloloko,Pero pagkatapos, mapapano nin graba an saiyang nguso.+
18 Paagi sa pag-uulay,* an mga plano magigin mapanggana,*+Asin paagi sa mahusay* na paggiya gibuha an saimong pakikigiyera.+
19 An sarong parapakaraot naglilibot na ihinahayag an kumpidensiyal na urulay;+Dai ka makiiba-iba sa sarong tawo na gustong-gustong mantsismis.*
20 An siisay man na nagmamaldisyon sa saiyang ama asin sa saiyang ina,An saiyang lampara papalsukon pag-abot kan diklom.+
21 An mana na sa kapuon-puuni nakua sa mahanab na paagiDai magigin bendisyon sa katapos-tapusi.+
22 Dai ka magsabi: “Mabalos ako nin maraot!”+
Maglaom ka ki Jehova,+ asin ililigtas ka niya.+
23 An may dayang mga pantimbang* makababaldi ki Jehova,Asin an madayang mga timbangan bakong marahay.
24 An mga lakad nin sarong tawo ginigiyahan ni Jehova,+Huling paano masasabutan nin sarong tawo an mismong dalan niya?*
25 Sarong siod kun an sarong tawo pabigla-biglang makurahaw, “Banal!”+
Asin pagkatapos na sana niya pag-iisipan an saiyang iprinomesa.+
26 An sarong madunong na hadi sinasaligsig an mga maraot+Asin liniligis niya sinda kan ruwedang pangginik.+
27 An hinangos nin sarong tawo iyo an lampara ni Jehova,Na nagtataong liwanag* sa kalaog-lauging pagkatawo niya.
28 An maimbod na pagkamuot asin kaimbudan an nagpoprotektar sa hadi;+Paagi sa maimbod na pagkamuot, napapagdanay niya an saiyang trono.+
29 An kamurawayan nin mga hoben iyo an saindang kakusugan,+Asin an kagayunan nin mga may edad na iyo an saindang uban.+
30 Nakakahali* nin karatan an mga latá asin mga lugad,+Asin nakakalinig kan kalaog-lauging pagkatawo nin saro an mga paghampak.
Mga Nota
^ O “An pagigin makatatakot kan.”
^ O “siring sa pagigin makatatakot kan.”
^ O “durudakula nang leon na may bunday.”
^ O posibleng “Maghahanap siya sa panahon nin pag-ani pero mayong makukua.”
^ O “An mga intensiyon.” Sa literal, “An katuyuhan.”
^ Sa literal, “mga aking lalaki.”
^ O “Sinisirni.”
^ O “An duwang magkalain na gapong pantimbang asin duwang magkalain na takadan.”
^ O “aking lalaki.”
^ O “sarong dayuhan.”
^ O “sadol.”
^ O “marigon.”
^ O “madunong.”
^ O “na nang-eengganyar paagi kan saiyang mga ngabil.”
^ O “An duwang magkalain na gapong pantimbang.”
^ O “an dalan na lalakawan?”
^ O “nagsisiyasat.”
^ O “Nakakakaros.”
