Sa Martes, Abril 11, dakul na inaktibong Kristiyano an maatender sa Memoryal. Nagpuon na sinda kaidtong magdalagan sa paurumbasan para sa buhay, kaso nangluya sinda huli sa manlain-lain na dahilan, na an nagkapira kaiyan sinambit sa brosyur na Bumalik Ka ki Jehova. (Heb 12:1) Alagad, an mga inaktibo mahalagang marhay pa man giraray ki Jehova, na nagbakal sa sainda paagi sa dugo kan saiyang Aki. (Gi 20:28; 1Pe 1:18, 19) Paano ta sinda matatabangan na makabalik sa kongregasyon?

An mga elder sa kongregasyon naghihinguwang hanapon asin tabangan an inaktibong mga Kristiyano kun paanong matiyagang hinahanap nin sarong pastor an karnerong naparayo sa aripumpon. (Lu 15:4-7) Ilinaladawan kaini an mamumuton na pag-ataman ni Jehova. (Jer 23:3, 4) Kita gabos, bako lang an mga elder, puwedeng makapakusog sa mga inaktibo. An satong mga paghihinguwa na magpahiling nin kabuutan asin pakikidamay magpapaugma ki Jehova saka magtatao sa sato nin mga bendisyon. (Tal 19:17; Gi 20:35) Kaya, pag-isipan kun siisay an puwede mong pakusugon, asin gibuhon mo tulos iyan!

HILINGON AN VIDEO NA PAKUSUGON AN MGA INAKTIBO, DANGAN SIMBAGON AN MINASUNOD NA MGA HAPOT:

• Ano an ginibo ni Abbey kan may makaulay siyang sarong Saksi na dai niya bisto?

• Taano ta kaipuhan tang dumulok sa mga elder kun may gusto kitang tabangan na sarong inaktibo?

• Ano an ginibo ni Abbey bago siya magdalaw giraray ki Laura?

• Paano si Abbey nagin matiyaga, mapasensiya, asin mapagpadangat mantang hinihinguwang pakusugon si Laura?

• Ano an manunudan ta sa ilustrasyon ni Jesus na nasa Lucas 15:8-10?

• Ano an nagin mga bendisyon kan ginibo nindang mga paghihinguwa para tabangan si Laura?