Magpuon ngunyan na taon, mas dakul an panahon ta tanganing mag-andam para sa Memoryal kan kagadanan ni Cristo. Pag an Memoryal natangod sa aldaw na Lunes sagkod Biyernes, an Pagtiripon na Pamumuhay Asin Ministeryo dai na gigibuhon sa semanang iyan. Pag an Memoryal natangod sa aldaw na Sabado o Domingo, dai na gigibuhon an pampublikong pahayag asin an Pag-adal sa Torrengbantayan. Gagamiton mo daw sa pinakamarahay na paagi an dagdag na panahon sa saimong iskedyul? Arog kan inot na siglo, kaipuhan na gumibo nin praktikal na mga areglo para sa espesyal na okasyon na ini. (Lu 22:7-13; km 3/15 1) Pero gabos kita kaipuhan na mag-andam kan satong mga puso. Paano niyato iyan magigibo?

• Hurop-hurupon an kahalagahan kan pag-atender.—1Co 11:23-26

• Mamibi asin pag-isipan an saimong personal na relasyon ki Jehova.—1Co 11:27-29; 2Co 13:5

• Basahon asin hurop-hurupon an mga artikulo na nagpapaliwanag kan kahulugan kan Memoryal.—Ju 3:16; 15:13

Binabasa asin hinuhurop-hurop kan ibang parahayag an nakaiskedyul na babasahon sa Bibliya para sa Memoryal na yaon sa Pagsiyasat sa Kasuratan Aroaldaw. Binabasa man kan iba an mga teksto sa Bibliya na yaon sa tsart sa ibaba. Rinerepaso man kan iba an mga artikulo sa Torrengbantayan mapadapit sa Memoryal asin sa pagkamuot na ipinahiling sa sato ni Jehova asin ni Jesus. Ano man na proyekto sa pag-adal an pilion mo, lugod na paagi kaiyan magin mas harani ka ki Jehova asin sa saiyang Aki.