Puon sa Setyembre, an satong Workbook sa Pagtiripon Mapadapit sa Pamumuhay Asin Ministeryo magkakaigwa nin dagdag na bagong sampol na presentasyon, an “Itukdo an Katotoohan.” Katuyuhan niyato na iduon an sarong pundamental na katotoohan sa Bibliya, paagi sa paggamit nin hapot asin teksto.

Kun magpahiling nin interes an satong kaulay, puwede kitang magwalat nin publikasyon o magpahiling nin video hali sa jw.org para may aabangan siya sa pagbalik ta liwat. Hinguwahon tang makabalik tulos pakalihis sana nin pirang aldaw tanganing maipadagos an pag-uulay. An bagong mga presentasyon asin asignasyon nin mga estudyante kukuanon sa mga sumaryo kan kapitulo kan What Can the Bible Teach Us? (mayo sa Bicol), na pinasimpleng edisyon kan librong Itinotokdo kan Biblia. May makukua man sa Itinotokdo kan Biblia na dagdag na mga impormasyon asin teksto na makakatabang sa sato sa pagdalaw liwat o sa pagkondukta nin pag-adal, na Bibliya sana an gamit.

Saro sana an dalan pasiring sa buhay. (Mat 7:13, 14) Huling may manlain-lain na relihiyon asin pinaghalian an mga nakakaulay ta, dapat tang ibagay sa sainda an mga katotoohan sa Bibliya na ipapakipag-ulay ta. (1Ti 2:4) Mantang mas nagigin pamilyar kita sa manlain-lain na tema sa Bibliya asin mas nagigin mahusay sa ‘paggamit nin matanos kan tataramon nin katotoohan,’ mas nadadagdagan an satong kaugmahan, asin mas nagigin epektibo kita sa pagtukdo kan katotoohan sa iba.—2Ti 2:15.