Sa saiyang ipinasabong na surat para ki Tito, sinabi ni apostol Pablo na an mga hoben na lalaki, kaiba na si Tito, kaipuhan na maghinguwang magin “sarong halimbawa sa marahay na mga gibo” sa gabos na paagi. (Tit 2:6, 7) Sa huring parte kan iyo man sanang kapitulo, sinabi niya na lininig an banwaan ni Jehova tangani na sinda magin “maigot sa marahay na mga gibo.” (Tit 2:14) An saro sa marahay na mga gibong iyan iyo an paghulit asin pagtukdo dapit sa Kahadian nin Diyos. Kun ika sarong hoben, puwede mo daw gamiton an saimong kusog tanganing maglingkod bilang auxiliary o regular payunir?—Tal 20:29.

Kun gusto mong maglingkod bilang payunir, magkaigwa nin realistikong plano kun paano mo iyan magigibo. (Lu 14:28-30) Halimbawa, paano mo masusuportaran an sadiri mo sa pinansiyal mantang naglilingkod sa bilog na panahon na pagmiministeryo? Paano mo maaabot an kahagadan na oras? Ipamibi mo ki Jehova na tabangan ka niya. (Sal 37:5) Ipakipag-ulay sa mga magurang mo saka sa mga nagin mapanggana sa pagpapayunir an saimong plano. Dangan humiro para maabot iyan. Siguradong bebendisyunan ni Jehova an saimong maigot na mga paghihinguwa na paglingkudan siya!

HILINGON AN VIDEONG MGA HOBEN NA NAGTATAONG ONRA KI JEHOVA, DANGAN SIMBAGON AN MINASUNOD NA MGA HAPOT:

• Anong mga kadipisilan an napangganahan kan nagkapira para makapaglingkod bilang payunir, saka paano ninda iyan nagibo?

• Paano matatabangan kan mga magurang an saindang mga aki na magin regular payunir?

• Taano ta mahalaga an pagkaigwa nin iskedyul sa paghuhulit?

• Paano mapapakusog asin matatabangan kan mga miyembro nin kongregasyon an sarong payunir?

• Anong mga bendisyon an nakakamtan kan mga naglilingkod bilang payunir?