An pagtitiwalag nagpoprotektar sa kongregasyon asin nagdidisiplina sa dai nagsusulsol na nagkasala. (1Co 5:6, 11) Pag sinusuportaran ta an siring na disiplina hali ki Jehova, ipinapahiling ta an pagkamuot. Paano man ini puwedeng mangyari mantang an pagtitiwalag nagtatao nin emosyonal na kulog sa gabos, pati na sa dayupot na mga paryente asin sa hudisyal na komite?

Urog sa gabos, ipinapahiling ta an pagkamuot sa reputasyon ni Jehova asin sa saiyang pamantayan sa kabanalan. (1Pe 1:14-16) Ipinapahiling ta man an pagkamuot niyato sa saro na natiwalag. An magabat na disiplina, dawa ngani makulog, minaresulta sa “matuninong na kamugtakan, an pagkaigwa nin matanos na pamumuhay.” (Heb 12:5, 6, 11) Inuulang ta an disiplina ni Jehova kun nakikiiba-iba kita sa sarong natiwalag o nagdis-asosyar kan saiyang sadiri. Tandaan, dinidisiplina ni Jehova an saiyang banwaan “nin tama sana.” (Jer 30:11, NWT) Mantang sinusuportaran ta an disiplina ni Jehova asin pinagdadanay an satong rutina sa espirituwal, padagos kitang naglalaom na mabalik sa satong mahihirakon na Ama an sarong nadisiplina.—Isa 1:16-18; 55:7.

HILINGON AN VIDEO DRAMATIZATION NA PAPAGDANAYON AN KAIMBUDAN NA MAY BILOG NA PUSO, DANGAN SIMBAGON AN MINASUNOD NA HAPOT:

• Anong kulog an namamatian kan Kristiyanong mga magurang pag an aki ninda magbaya ki Jehova?

• Paano masusuportaran kan kongregasyon an maimbod na mga miyembro nin pamilya?

• Anong istorya sa Bibliya an nagtutukdo sa sato na an kaimbudan ki Jehova mas urog na mahalaga kisa sa kaimbudan ta sa satong pamilya?

• Paano niyato maipapahiling na mas urog an kaimbudan ta ki Jehova kisa sa satong pamilya?