Gusto ni Jehova na magin maugma an mga pamilya. (Sal 127:3-5; Ecl 9:9; 11:9) Alagad, puwedeng mawara an satong kaugmahan huli sa stress sa kinaban na ini asin sa mga sala na nagigibo kan satong mga kapamilya. Ano an puwedeng gibuhon kan lambang miyembro kan pamilya para magin mas maugma an pamilya?

An agom na lalaki tinatawan nin onra an saiyang agom. (1Pe 3:7) Nagtatao siya nin panahon para makaibanan ini. Realistiko siya sa mga inaasahan niya digdi asin ipinapahiling niyang nagpapasalamat siya sa mga ginigibo kaini para saiya saka sa pamilya. (Col 3:15) Ipinapahayag niya an saiyang pagkamuot asin inuumaw ini.—Tal 31:28, 31.

An agom na babayi naghahanap nin mga paagi na suportaran an saiyang agom. (Tal 31:12) Nagpapasakop siya digdi asin nakikipagtabangan. (Col 3:18) Mabuot siya pag nakikipag-ulay siya sa saiyang agom asin pag nakikipag-ulay siya sa iba manungod sa saiyang agom.—Tal 31:26.

An mga magurang nagtatao nin panahon na makaibanan an saindang mga aki. (De 6:6, 7) Sinasabi ninda sa saindang mga aki na padaba ninda an mga ini. (Mat 3:17) Pag nagdidisiplina, nagpapahiling sinda nin pagkamuot asin pakasabot.—Efe 6:4.

An mga aki tinatawan nin onra an saindang mga magurang, asin nagsusunod sinda sa mga ini. (Tal 23:22) Sinasabi ninda sa saindang mga magurang an mga iniisip asin namamatian ninda. Inaako ninda an disiplina kan saindang mga magurang asin pinapahilingan sinda nin respeto.—Tal 19:20.

HILINGON AN VIDEO DRAMATIZATION NA PAUSWAGON AN KAUGMAHAN KAN SAINDONG PAMILYA, DANGAN SIMBAGON AN MINASUNOD NA HAPOT:

• Ano an ginibo kan kada saro tanganing magin mas maugma an pamilya?