Sa mga kongregasyon, may mga tugang kitang dakul na taon nang naglilingkod ki Jehova. Makakanuod kita sa makusog na pagtitiwala ninda ki Jehova. Puwede ta sindang haputon manungod sa kasaysayan kan organisasyon ni Jehova saka manungod sa mga kadipisilan na inagihan ninda asin nakayanan sa tabang ni Jehova. Puwede ta pa nganing imbitaran sa satong Pampamilyang Pagsamba an saro sa namumutan tang mga tugang na ini asin ipaistorya sa sainda an mga eksperyensiya ninda.

Kun saro kang Kristiyano na dakul na taon nang naglilingkod, iistorya sa mga hoben na Kristiyano an mga nagin eksperyensiya mo. Iinistorya ni Jacob saka Jose an saindang mga eksperyensiya sa saindang mga gikan. (Ge 48:21, 22; 50:24, 25) Pag-abot nin panahon, ininstruksiyunan ni Jehova an mga payo kan pamilya na itukdo sa saindang mga aki an manungod sa saiyang makapangyarihan na mga gibo. (De 4:9, 10; Sal 78:4-7) Sa panahon ta ngunyan, an mga magurang asin iba pa sa kongregasyon puwedeng iistorya sa mga hoben an marahayon na mga bagay na nahiling nindang ginibo ni Jehova paagi sa saiyang organisasyon.

HILINGON AN VIDEO NA PADAGOS NA NAGKAKASARARO DAWA MAY PAGBABAWAL, DANGAN IHAPOT AN MINASUNOD:

• Paano tinabangan kan sangang opisina sa Austria an satong mga tugang na nasa mga nasyon na ipinagbabawal an satong gibuhon?

• Ano an ginibo kan mga tugang sa mga nasyon na ini para mapagdanay na makusog an saindang pagtubod?

• Taano ta dakul na parahayag sa Romania an naghali sa organisasyon ni Jehova, asin paano sinda nakabalik?

• Paano nakapakusog sa saimong pagtubod an mga eksperyensiyang ini?