An Memoryal nagtatao sa sato nin marahay na oportunidad na hurop-hurupon an maabot na mga bendisyon na nagin posible huli sa pantubos, arog kan pagkabuhay liwat. Dai nuarin man nagin katuyuhan ni Jehova na magadan an mga tawo. Kaya an pagmundo pag nagadanan nin mahal sa buhay an saro sa pinakamakulog na naeeksperyensiyahan ta. (1Co 15:26) Nakulgan si Jesus kan mahiling niyang nagtatangis an mga disipulo niya sa pagkagadan ni Lazaro. (Ju 11:33-35) Huling si Jesus an perpektong ladawan kan saiyang Ama, makakasiguro kitang nakukulgan man si Jehova pag nahihiling kitang nagmumundo sa pagkagadan kan satong mga mahal sa buhay. (Ju 14:7) Gustong-gusto na ni Jehova na mag-abot an panahon na buhayon niya na an saiyang mga lingkod, asin siyertong iyo man kita.—Job 14:14, 15.

Huling Diyos nin areglo si Jehova, rasonable sanang isipon na magigin areglado an pagbuhay liwat. (1Co 14:33, 40) Imbes na areglo sa paglubong, posibleng magkaigwa nin mga areglo sa pagsabat sa mga binuhay liwat. Hinuhurop-hurop mo daw an pagkabuhay liwat, lalo na sa panahon nin grabeng kamunduan? (2Co 4:17, 18) Pinapasalamatan mo daw si Jehova sa itinao niyang pantubos asin sa paghahayag sa Kasuratan na an mga gadan mabubuhay liwat?—Col 3:15.

• Siisay na mga amigo asin paryente mo an gustong-gusto mo nang mahiling giraray?

• Siisay na mga karakter sa Bibliya an gustong-gusto mong mahiling asin makaulay?