An mga visual aid nakakatabang para makua an atensiyon kan satong kaulay asin paagi kaiyan mas masasabutan saka matatandaan niya an mga nanudan niya. An satong Kahuruhalangkawing Instruktor, si Jehova, naggamit kaiyan tanganing magtukdo nin mahahalagang leksiyon. (Ge 15:5; Jer 18:1-6) Siring man si Jesus, an Dakulang Paratukdo. (Mat 18:2-6; 22:19-21) An sarong klase nin visual aid na talagang nagin kapaki-pakinabang sa nag-aging mga taon iyo an video. Ginagamit mo daw na marhay an mga video sa saimong pagtutukdo nin Bibliya?

May inandam na sampulong video para tabangan kita na itukdo an mga leksiyon sa brosyur na Maogmang Bareta Hale sa Dios! Sa pangkagabsan, an titulo kan kada video katumbas kan saro sa mga hapot na nasa brosyur na nakasurat sa mas maitom na letra. An digital na bersiyon kaiyan na nasa jw.org igwa nin mga link na mapagirumdom sa sato kun nuarin ipapahiling an kada video. Apuwera diyan, igwa pa nin ibang mga video na puwede tang ipahiling pag nagtutukdo kita gamit an manlain-lain na publikasyon sa pag-adal na yaon sa satong Toolbox sa Pagtutukdo.

Nadidipisilan daw an tinutukduan mo na sabuton an pinag-uulayan nindong tema sa Bibliya? O may inaagihan daw siyang partikular na problema? Maghanap sa mga video sa jw.org® asin JW Broadcasting® tanganing makakua nin video na makakatabang sa saiya. Puwede nindong sabay na hilingon an saro sa mga iyan, dangan pag-ulayan iyan.

May mga bagong video na ilinuluwas kada bulan. Mantang hinihiling mo iyan, pag-isipan kun paano mo iyan magagamit sa pagtutukdo sa iba.