An sarong amigo “saro na dayupot sa sarong tawo huli sa pagpadangat o hararom na pagpapahalaga.” Halimbawa, si Jonathan saka si David nagin dayupot na marhay na mag-amigo pagkatapos na gadanon ni David si Goliat. (1Sa 18:1) Pareho sindang nagpahiling nin mga kuwalidad na nagin dahilan na gustuhon nindang magin amigo an kada saro. Kaya, an pagigin dayupot na mag-amigo nakabasar sa tamang kaaraman. Nangangaipo nin panahon asin paghihinguwa tanganing mabisto an sarong tawo. Pero sa mga social network, an mga tawo puwedeng magin “friends” sa saro sanang pindot. Asin dahil puwedeng planuhon na marhay kan mga tawo kun ano an sasabihon ninda online asin makontrol kun ano an magigin paghiling sa sainda kan iba, madali sana para sa sainda na itago kun siisay talaga sinda. Kaya, madunong na pag-isipan na marhay kun siisay an mga aakuon mo na magin online friend. Dai matakot na i-ignore o i-reject an mga friend request kan mga tawo na dai mo man talaga bisto ta iniisip mong tibaad makulgan mo an buot ninda. Dahil sa posibleng mga peligro, pinili kan iba na dai na talaga maggamit nin mga social network. Pero kun nagdesisyon kang maggamit nin social network, ano an dapat mong tandaan?

HILINGON AN VIDEO NA MAGIN MADUNONG SA PAGGAMIT NIN SOCIAL NETWORK, DANGAN SIMBAGON AN MINASUNOD NA MGA HAPOT:

• Ano an dapat mong pag-isipan bago ka mag-post nin mga comment asin mga ritrato?

• Taano ta dapat mong maingat na pilion kun siisay an magigin mga online friend mo?

• Taano ta dapat kang magbugtak nin limitasyon sa panahon na ginagamit mo sa social network?—Efe 5:15, 16