Igwa kita nin apat na video na para sa pag-adal sa Bibliya na magagamit sa ministeryo. Ginibo an kada video na iyan para sa anong katuyuhan?

• An Ta’no ta Kaipuhan Mag-adal nin Bibliya?—Bilog na Video dinisenyo para pukawon an interes sa Bibliya nin sarong tawo ano man an relihiyosong mga paniniwala niya. Dinadagka kaiyan an mga naghihiling na hanapon sa Bibliya an simbag sa importanteng mga hapot sa buhay asin nagtatao iyan nin halimbawa nin lohikal na simbag na mahihiling sa Bibliya. Ipinapaliwanag man kaiyan kun paano mag-request nin pag-adal sa Bibliya.

• An Ta’no ta Kaipuhan Mag-adal nin Bibliya? (pinahalipot na bersiyon) kapareho man kan bilog na bersiyon kan video pero mas halipot iyan. Puwedeng mas epektibo iyan sa mga teritoryo na sibot an mga tawo.

• An Paano Ginigibo an Pag-adal sa Bibliya? dinisenyo para pukawon an interes sa satong libreng pag-adal sa Bibliya asin para simbagon an nagkapirang parating mga ihinahapot manungod diyan, kaiba na kun paano mag-request nin pag-adal sa Bibliya.

• An Welcome sa Saimong Pag-adal nin Bibliya dinisenyo para ipahiling sa mga tinutukduan sa Bibliya. Dawa ngani an videong iyan iinintrodusir sa pahina dos kan librong Mabuhay nin Maugma Sagkod Pa Man! puwede iyan ipahiling pag pinag-uulayan an brosyur na Mabuhay nin Maugma Sagkod Pa Man! Mahihiling sa video an sumaryo kan mga laog kan libro asin kun ano an aasahan kan tinutukduan sa mga pag-adal ninda.

Dawa ngani an kada video dinisenyo para sa sarong partikular na katuyuhan, an arin man sa mga iyan puwedeng ipahiling o ipadara sa kiisay man pag angay iyan para sa sainda. Dinadagka an mga parahayag na magin pamilyar sa mga iyan asin gamiton iyan na marhay sa ministeryo.