Nagigin nang mas parati an pagkaigwa nin natural na mga kalamidad ngunyan. Pag may kalamidad, an pagtao nin ayuda kaipuhan na organisado saka aregladong marhay. Huli kaiyan, iinareglo kan Namamahalang Grupo na magkaigwa nin Disaster Relief Department sa lambang sangang opisina.

Pag naaraman kan mga tugang sa departamentong iyan na may nangyaring kalamidad, tulos-tulos nindang kokontakon an mga elder sa lugar na iyan para aramon kun ano an kaipuhan kan mga parahayag. Kun grabe an danyos kaya dai iyan kayang maasikaso kan mga parahayag sa lugar na iyan, maasignar an sangang opisina nin kuwalipikadong mga brother na manginginot sa pagtao nin ayuda. An mga brother na iyan puwedeng mangapudan nin mga boluntaryo o maghagad nin espesipikong mga donasyon, o puwede sindang magbakal sa lugar na iyan nin mga ididistribwir na kinakaipuhan na mga suplay.

Dakul an bentaha sa pag-asikaso sa mga bagay-bagay sa arog kaiyan na paagi. Nalilikayan kaiyan an pagkadoble kan mga trabaho, pagkaribaraw, asin pagkasayang kan pondo saka mga suplay, na iyo an puwedeng magin resulta kun basta-basta na sana mahiro an mga tugang sa sadiri nindang kabutan.

Puwedeng determinaran kan mga brother na inasignaran kan sangang opisina kun pirang pondo asin pirang boluntaryo an kaipuhan sa pagtao nin ayuda. Puwede man sindang makipag-ulay sa mga lokal na opisyal, na sa parati nakakatabang sa sato na maparikas an pagtao ta nin ayuda. Kaya dai dapat basta-basta mangulekta nin pondo, magpadara nin mga ayuda, o magduman sa apektadong lugar an mga indibidwal apuwera na sana kun ipinapagibo iyan sa sainda.

Pero, pag nagkaigwa nin kalamidad, gusto ta man giraray magtabang. (Heb 13:16) Namumutan ta an satong mga tugang! Ano an puwede tang gibuhon? An pinakaimportante na magigibo ta iyo na ipamibi an mga naapektaran kan kalamidad asin an mga nagtatao nin ayuda. Puwede man kitang magdonar sa pambilog na kinaban na gibuhon. Sa paggiya kan Namamahalang Grupo, an mga sangang opisina an mas nakakaaram kun paano magagamit an mga pondong iyan sa pinakamarahay na paagi. Asin kun gusto niyato talagang magboluntaryo para magtabang, puwede tang ipaaram na available kita paagi sa pag-fill out kan Local Design/Construction Volunteer Application (DC-50).

HILINGON AN VIDEO NA MAPANDESTROSONG BAHA SA BRAZIL, ASIN SIMBAGON AN MINASUNOD NA HAPOT:

Ano an hinangaan mo sa pagtaong ayuda na ginibo kan mga Saksi ni Jehova pagkatapos kan baha sa Brazil kan 2020?