Ano an audio recording kan Bibliya? Iyan an rekording kan rebisadong New World Translation. Padikit-dikit iyan na pig-release sa dakul na lengguwaheng posible. An saro sa feature kan audio recording kan Bibliya iyo na iba-iba an nagboses sa kada karakter kan Bibliya. Binabasa an mga tataramon na may tamang pagduduon asin emosyon tanganing an mensahe kan Bibliya maipaabot nin tama.

Paano nakikinabang an nagkapira sa audio recording kan Bibliya? Gustong-gusto kan dakul sa mga regular na nagdadangog kan audio recording kan Bibliya kun paano kaiyan ginigibong buhay na buhay an Tataramon nin Diyos. Pag nadadangog ninda na iba-iba an nagbabasa kan kada karakter kan Bibliya, mas naiimahinar ninda an mga pangyayari sa Bibliya asin mas malinaw nindang nasasabutan an mga nakasurat diyan. (Tal 4:5) Narisa man kan dakul na pag nahahadit sinda, an pagdangog sa audio recording kan Bibliya nakakapaginhawa sa sainda.—Sal 94:19.

An pagdangog sa makusog na pagbasa kan Tataramon nin Diyos puwedeng magkaigwa nin dakulang epekto sa buhay ta. (2Cr 34:19-21) Kun igwa na nin porsiyon o kumpletong audio recording kan Bibliya sa lengguwaheng nasasabutan mo, puwede mo daw gibuhon na magin regular na kabtang kan saimong espirituwal na rutina an pagdangog kaiyan?

HILINGON AN VIDEO NA PAGPRODUSIR KAN AUDIO RECORDING KAN BIBLIYA—EXCERPT, DANGAN SIMBAGON AN MINASUNOD NA HAPOT:

Ano an hinahangaan mo kun manungod sa pagprodusir kan audio recording kan Bibliya?