An librong Teach Us (mayo sa Bicol) asin Itinotokdo kan Biblia magkapareho. Ipinepresentar kan duwang kasangkapan na ini sa satong toolbox sa pagtutukdo an parehong mga katotoohan, sa parehong pagkasunod-sunod. Pero sa librong Teach Us, simple an mga tataramon asin pangangatanusan. Ginibo iyan para sa mga nasasakitan sa librong Itinotokdo kan Biblia. Imbes na apendise, an librong Teach Us igwa nin endnotes na may simpleng paliwanag sa nagkapirang termino asin katukduan na yaon sa mga kapitulo kan libro. An kada kapitulo mayo nin pambukas na mga hapot o kahon sa pagrepaso. Imbes, mababasa sa katapusan kaiyan an sumaryo kan mga katotoohan sa Bibliya na ipinaliwanag sa mga parapo. Arog kan librong Itinotokdo kan Biblia, an librong Teach Us puwede man ialok dawa bako iyan an itinatampok sa sarong partikular na bulan. Paano ta magagamit an magayon na mga feature kan librong Teach Us kun nagkokondukta nin pag-adal sa Bibliya?

SUMMARY: Sa kadaklan, epektibo an nakatudan ta nang paagi nin pagkondukta sa pag-adal—pagbasa kan parapo sa librong Itinotokdo kan Biblia dangan pagsimbag kan hapot. Pero paano kun an tinutukduan mo bakong gayong pamilyar sa lengguwaheng ginagamit mo sa pagkondukta o daing gayo nakakabasa? Pag arog kaiyan, puwede mong gamiton an librong Teach Us. An sumaryo kan kapitulo an puwedeng magin basehan sa pag-adal asin puwedeng dagkahon an tinutukduan na personal na sanang basahon an mga parapo sa kapitulo. Sa pangkagabsan, puwedeng maitukdo sa laog nin mga 15 minutos an sarong katotoohan sa Bibliya. May mga detalye na iprinesentar sa kapitulo na dai kaiba sa sumaryo, kaya dapat na mag-andam na marhay an nagtutukdo, na isinasaisip an pangangaipo kan tinutukduan. Kun an mga parapo an ginagamit sa pag-adal, puwedeng gamiton sa pagrepaso an sumaryo.

ENDNOTES: An mga termino asin katukduan sa laog kaini pigsunod-sunod sigun sa paglataw kaiyan sa mga kapitulo kan libro. Nasa nagkokondukta kun iiiba niya sa pag-adal an endnotes sa librong Teach Us.