Arog kan gabos na pagtiripon kan kongregasyon, an mga pagtiripon bago maglingkod sa langtad, sarong probisyon hali ki Jehova para mapahiro an lambang saro na magpahiling nin pagkamuot asin marahay na mga gibo. (Heb 10:24, 25) Dapat na lima sagkod pitong minuto sana iyan, kaiba na diyan an pag-organisar kan grupo, pagpili kan teritoryo, saka pagpamibi. (Kun may nainot nang pagtiripon bago kaiyan, dapat na mas halipot pa iyan.) Dapat na maghanda an manginginot nin sarong tema na magagamit kan mga malingkod sa ministeryo sa aldaw na iyan. Halimbawa, pag Sabado dahil dakul sa mga yaraon an dai nakapaglingkod nin haros sarong semana, tibaad mas marahay na ipakipag-ulay kun ano an sasabihon sa kagharong. Anong iba pang kapaki-pakinabang na mga tema an puwedeng ipakipag-ulay?

• Sarong sampol na pakikipag-ulay na hali sa An Satong Kristiyanong Pamumuhay Asin Ministeryo—Workbook Para sa Pagtiripon

• Kun paano gagamiton an sarong bagong bareta o pangyayari para makapuon nin pag-uulay

• Kun paano sisimbagon an sarong parating pagkontra

• Kun paano masimbag sa sarong ateista, ebolusyonista, iba an lengguwahe, o sa saro na an relihiyon bakong pamilyar sa saindong teritoryo

• Kun paano gagamiton an sarong feature kan website na jw.org, kan JW Library^® app, o kan Bibliya

• Kun paano gagamiton an saro sa mga tool sa Toolbox sa Pagtutukdo

• Kun paano gigibuhon an sarong espesipikong paagi nin paglilingkod, arog kan pagpapatotoo sa telepono, paggibo nin surat, pagpapatotoo sa publiko, pagdalaw liwat, o pag-Bible study

• Mga pagirumdom manungod sa kaligtasan, pagigin madaling makibagay, marahay na ugali, pagigin positibo, o mga bagay na arog kaiyan

• Sarong leksiyon o video hali sa brosyur na Magin Mahusay sa Pagbasa Asin Pagtutukdo

• Kun paano papakusugon saka tatabangan an kapartner mo sa ministeryo

• Sarong teksto na konektado sa paghuhulit o sarong nakakapakusog na eksperyensiya sa ministeryo