Sa dai na nanggad mahahaloy mauubos na an pasensiya ni Jehova sa kinaban na ini. Lalaglagon an palsong relihiyon, sasalakayon kan koalisyon nin mga nasyon an banwaan nin Diyos, asin pupuhuon ni Jehova an mga maraot sa Armagedon. Hinahalat-halat na kan mga Kristiyano an mahalagang mga pangyayaring ini.

Siyempre, dai ta man aram an gabos na detalye manungod sa dakulang kasakitan. Halimbawa, dai ta aram kun nuarin iyan eksaktong mapuon. Dai ta aram kun ano an mga dahilan na gagamiton kan mga pulitikal na kapangyarihan para salakayon an mga relihiyon. Dai ta aram kun gurano kalawig an pagsalakay kan mga nasyon sa banwaan nin Diyos o kun ano an mga mangyayari diyan. Dai ta man aram kun ano an eksaktong gagamiton ni Jehova para puhuon an mga maraot sa Armagedon.

Alagad, itinatao sa sato kan Kasuratan an gabos na impormasyon na kaipuhan niyato para maatubang ta nin may kumpiyansa asin kusog nin buot an mga mangyayari sa maabot. Halimbawa, aram niyato na nabubuhay na kita sa puro kan “huring mga aldaw.” (2Ti 3:1) Aram ta na an pagsalakay sa mga relihiyon “papahaliputon” tangani na dai malaglag an tunay na relihiyon. (Mat 24:22) Aram ta na ililigtas ni Jehova an saiyang banwaan. (2Pe 2:9) Asin aram ta na an Saro na pinili ni Jehova na malaglag sa mga maraot asin magliligtas sa dakulang kadaklan sa Armagedon matanos asin makapangyarihan.—Kap 19:11, 15, 16.

Dahil sa mga mangyayari sa maabot siguradong “magkakadirismayo an mga tawo sa takot.” Pero, paagi sa pagbasa asin paghurop-hurop sa mga ginibong pagliligtas ni Jehova kaidto asin sa mga ihinayag niya na mga mangyayari sa maabot, ‘makakatindog kita nin tanos asin maiitaas niyato an satong payo,’ na nagtitiwala na harani na an pagliligtas sa sato.—Lu 21:26, 28.