KUN TAANO TA MAHALAGA: Dapat na mag-apod an mga tawo sa pangaran ni Jehova tanganing maligtas. (Ro 10:13, 14) Alagad, bakong gabos na nag-aako nin pag-adal sa Bibliya gustong mamuhay kauyon kan mga pamantayan ni Jehova. Ginagamit niyato sa pinakamarahay na paagi an satong mahalagang marhay na panahon sa ministeryo paagi sa pagtabang sa mga indibidwal na tunay an pagmawot na gumibo nin mga pagbabago para mapaugma si Jehova. Kun sa paglihis nin rasonableng panahon dai pa man giraray nag-uuswag an sarong tinutukduan sa Bibliya, madunong na ipundo na niyato an pagtutukdo sa saiya asin gamiton an satong panahon para tabangan an iba na irinarani ni Jehova sa saiya saka sa saiyang organisasyon. (Ju 6:44) Pero kun sa pag-abot nin panahon magpahiling an tawong iyan nin “pusong nasa tamang kamugtakan para sa buhay na daing katapusan,” mauugma kitang ipadagos giraray an pagtutukdo sa saiya sa Bibliya.—Gi 13:48.

KUN PAANO GIGIBUHON:

• Komendaran an tinutukduan huli sa pagmawot niya na kumua nin tamang kaaraman.—1Ti 2:4

• Iduon sa saiya an kahalagahan kan pag-aplikar kan mga nanunudan niya.—Lu 6:46-49

• Mabuot na ipakipag-ulay an ilustrasyon ni Jesus mapadapit sa parasabwag, asin dagkahon siya na pag-isipan kun ano an nakakaulang sa saiya na iaplikar an mga nanunudan niya.—Mat 13:18-23

• Mataktikang ipaliwanag kun taano ta ipupundo mo na an pag-adal nindo

• Ipaaram saiya na sa pana-panahon, mabisita ka pa man giraray para pakusugon siya asin na puwedeng ipadagos an pag-adal pag handa na niyang iaplikar an saiyang mga nanudan

HILINGON AN VIDEO, DANGAN SIMBAGON AN MINASUNOD NA MGA HAPOT:

• Ano an nahiling mo sa pag-uulay na nagpaparisa na dai nag-uuswag sa espirituwal an tinutukduan?

• Paano tinabangan kan parahayag an tinutukduan na masabutan na kaipuhan kaining gumibo nin mga pagbabago?

• Paano siniyerto kan parahayag sa tinutukduan na puwede pa man nindang ipadagos an saindang pag-adal?