Kabtang 8

An Katuyohan nin Dios Nag-aabante Pasiring sa Kaotoban

1, 2. Paano an Dios naggigibo nin probisyon na haleon an kasakitan?

 AN PAGHADE nin rebeldeng mga tawo asin demonyo dakol nang siglong ginuguyod an pamilya nin tawo paibaba. Pero, dai iniignoro nin Dios an satong mga kasakitan. Imbes, sa gabos na siglong nag-agi, sia naggigibo nin probisyon na kaldahon an katawohan sa gapos nin karatan asin kasakitan.

² Kan panahon nin pagrebelde sa Eden, pinonan nin Dios na ipahayag an saiyang katuyohan na gumibo nin gobyerno na magibo sa dagang ini na paraisong erokan nin mga tawo. (Genesis 3:15) Kan huri, bilang pangenot na representante nin Dios, ginibo ni Jesus na tema kan saiyang pagtotokdo an nagdadangadang na gobyernong ini nin Dios. Sinabi nia na iyan an solamenteng paglaom nin katawohan.​—Daniel 2:44; Mateo 6:​9, 10; 12:21.

3. Ano an iinapod ni Jesus sa nagdadangadang na gobyerno sa daga, asin taano?

³ Inapod ni Jesus an nagdadangadang na gobyerno nin Dios na iyan na “kahadean kan kalangitan,” ta iyan maghahade hale sa langit. (Mateo 4:17) Inapod man nia iyan na “kahadean nin Dios,” ta an Dios iyo an magigin Autor kaiyan. (Lucas 17:20) Sa nag-aging mga siglo pinasabngan nin Dios an saiyang mga parasurat na sumurat nin mga hula manongod sa mga makompuwesto sa gobyernong iyan asin sa gigibohon kaiyan.

An Bagong Hade sa Daga

4, 5. Paano ipinaheling nin Dios na si Jesus an saiyang aprobadong Hade?

⁴ Si Jesus, kaidtong haros duwang ribong taon na an nakaagi, iyo an nakaotob sa dakol na hula manongod sa saro na magigin Hade sa Kahadean nin Dios. Sia an napatunayan na pinili nin Dios na Hade sa langitnon na gobyernong iyan sa katawohan. Asin pagkagadan nia, binuhay liwat nin Dios si Jesus sa langit bilang makapangyarihan, inmortal na espiritung linalang. Kadakol kan saksi sa saiyang pagkabuhay liwat.​—Gibo 4:10; 9:​1-9; Roma 1:​1-4; 1 Corinto 15:​3-8.

⁵ Dangan si Jesus “nagtukaw sa too nin Dios.” (Hebreo 10:12) Duman sia naghalat kan panahon na sia tatawan nin Dios nin kapangyarihan na humiro bilang Hade sa langitnon na Kahadean nin Dios. Inotob kaini an hula sa Salmo 110:​1, na dian sinasabihan sia nin Dios: “Tumukaw ka sa sakong too sagkod na ibugtak ko an saimong mga kaiwal na tongtongan kan saimong mga bitis.”

6. Paano ipinaheling ni Jesus na sia kuwalipikadong magin Hade sa Kahadean nin Dios?

⁶ Kan nasa daga, ipinaheling ni Jesus na sia kuwalipikado para sa siring na katongdan. Sa ibong nin paglamag, pinili niang magdanay sa saiyang integridad sa Dios. Sa paggibo nin siring, ipinaheling nia na nagputik si Satanas kan sia magsabi na mayo nin tawong magdadanay na maimbod sa Dios sa irarom nin pagbalo. Ipinaheling ni Jesus, sarong tawong sangkap, an ‘ikaduwang Adan,’ na an Dios dai nasala sa paglalang sa sangkap na mga tawo.​—1 Corinto 15:​22, 45; Mateo 4:​1-11.

7, 8. Anong marahay na mga bagay an ginibo ni Jesus kan yaon sa daga, asin ano an ipinaheling nia?

⁷ Siisay na hade an nakagibo nin karahayan na arog kan nagibo ni Jesus sa laog kan pirang taon kan saiyang ministeryo? Tinawan nin kapangyarihan kan banal na espiritu nin Dios, pinaomayan ni Jesus an mga may helang, pilay, buta, bongog, pula. Binuhay pa ngani nia an mga gadan! Ipinaheling nia nin kadikit kun ano an gigibohon nia para sa katawohan sa bilog na globo kun sia magkapot na kan kapangyarihan sa Kahadean.​—Mateo 15:​30, 31; Lucas 7:​11-16.

⁸ Kadakol kan karahayan na ginibo ni Jesus kan sia nasa daga kaya an disipulo niang si Juan nagsabi: “Igwa pa, sa katunayan, nin dakol na ibang  bagay na ginibo man ni Jesus, na, kun iyan isurat sa kabilogan, paghona ko sana, minsan an kinaban dai magkakaigo na bugtakan kan mga balumbon na ikasusurat.”​—Juan 21:25. a

9. Taano ta burunyog na nagdorolok ki Jesus an mga tawong may sadiosan na puso?

⁹ Si Jesus maboot asin maheherakon, may dakulaon na pagkamoot sa mga tawo. Tinabangan nia an mga dukha asin inaapi, pero dai man nia inapi an mga mayaman o may katongdan. An mga tawong may sadiosan na puso naghimate sa mamomoton na pangagda ni Jesus kan sia magsabi: “Madia kamo sa sako, kamo gabos na napapagal asin nagagabatan, asin tatawan ko kamo nin kaginhawahan. Pasana nindo an sakong sakal asin magin sakong mga disipulo, huli ta ako maboot asin mapakumbaba sa puso, asin makakukua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.” (Mateo 11:​28-30) An mga matatakton sa Dios nagdorolok sa saiya nin burunyog asin naglaom sa saiyang paghade.​—Juan 12:19.

Kairibang Hade

10, 11. Siisay an makiiiba ki Jesus sa paghade sa bilog na daga?

¹⁰ Kun paanong an mga gobyerno nin tawo may kairibang administrador, iyo man an langitnon na Kahadean nin Dios. May iba apuwera ki Jesus na makihihiras sa paghade sa daga, ta pinanugaan ni Jesus an saiyang dayupot na mga kairiba na sinda maghahade sa katawohan kaiba nia.​—Juan 14:​2, 3; Kapahayagan 5:10; 20:6.

¹¹ Kaya, kaiba ni Jesus, an limitadong bilang nin mga tawo bubuhayon man sa langitnon na buhay. Sinda an minakompuwesto sa Kahadean nin Dios na magtatao nin daing sagkod na katoninongan sa katawohan. (2 Corinto 4:14; Kapahayagan 14:​1-3) Kaya sa nag-aging mga siglo, ibinugtak ni Jehova an pundasyon para sa paghade na magtatao nin daing katapusan na mga bendisyon sa pamilya nin tawo.

Matatapos an Independienteng Paghade

12, 13. An Kahadean nin Dios andam na ngonyan na gibohon an ano?

¹² Sa siglong ini an Dios direktang nakilabot sa mga nangyayari sa daga. Siring sa ipaliliwanag kan Kabtang 9 kan pulyetong ini, ipinaheheling kan hula sa Biblia na an Kahadean nin Dios sakop ni Cristo inestablisar kan 1914 asin ngonyan andam nang ronoton an bilog na palakaw ni Satanas. An Kahadean na iyan andam nang ‘mandaog sa tahaw kan mga kaiwal’ ni Cristo.​—Salmo 110:2.

¹³ Mapadapit digdi an hula sa Daniel 2:44 nagsasabi: “Sa mga aldaw kan mga hadeng iyan [na nag-eeksister ngonyan] an Dios nin langit mapatindog nin sarong kahadean [sa langit] na dai noarin man malalaglag, ni iwawalat man sa ibang banwaan an soberaniya kaiyan [an paghade nin tawo nungka  pang totogotan]. Pipiropidasohon kaiyan [kan Kahadean nin Dios] an gabos na kahadean na ini asin tatapuson iyan, asin iyan magdadanay sagkod lamang.”​—Revised Standard Version.

14. Ano an pirang bendisyon na maabot bilang resulta kan pagkatapos kan paghade nin tawo?

¹⁴ Mantang nahale na an gabos na paghade na independiente sa Dios, magigin lubos an paghade sa daga kan Kahadean nin Dios. Asin huling an Kahadean magsasakop hale sa langit, iyan nungka na mapararaot nin mga tawo. An kapangyarihan sa pamamahala mamumugtak sa namugtakan kaiyan sa kapinonan, sa langit, sa Dios. Asin mantang an paghade nin Dios mamomogol sa bilog na daga, dai na madadaya an siisay man nin falsong mga relihiyon o dai nagpapanigong mga pilosopiya nin tawo asin politikal na mga teoriya. Dai na totogotan na magdanay an siring na mga bagay.​—Mateo 7:​15-23; Kapahayagan, kapitulo 17 sagkod 19.

[Nota sa Ibaba]

[Mga Hapot Para sa Pag-adal]

[Ritrato sa pahina 18]

Kan nasa daga pinaomayan ni Jesus an mga may helang asin binuhay liwat an mga gadan tanganing ipaheling an gigibohon nia sa bagong kinaban

[Ritrato sa pahina 19]

An langitnon na Kahadean nin Dios roronoton sagkod na mapara an gabos na klase nin paghade na independiente sa saiya