An Makangangalas na Bagong Kinaban na Gigibohon nin Dios
Kabtang 10
An Makangangalas na Bagong Kinaban na Gigibohon nin Dios
1, 2. Ano an mangyayari pakalihis kan nakalilinig na ralaban nin Armagedon?
PAKALIHIS kan nakalilinig na ralaban nin Dios na Armagedon, ano na? Mapoon na an mamuraway na bagong panahon. An mga nakaligtas sa Armagedon, mantang napatunayan na an saindang kaimbodan sa paghade nin Dios, palalaogon sa bagong kinaban. Iyan magigin makaoogma nanggad na bagong panahon sa kasaysayan mantang nagbobolos hale sa Dios an makangangalas na mga pakinabang pasiring sa pamilya nin tawo!
2 Sa paggiya kan Kahadean nin Dios, poponan kan mga nakaligtas an paggibo nin paraiso. An saindang mga kosog idudusay sa daing kapasloan na mga gibo na magtatao nin pakinabang sa gabos na nabubuhay. An daga poponan na gibohon na magin magayon, matoninong, nakakokontentong istaran para sa katawohan.
An Katanosan Masalida sa Karatan
3. Anong kaginhawahan an tolos na mamamatean pakalihis kan Armagedon?
3 Ini gabos papangyayarihon kan paglaglag sa kinaban ni Satanas. Mayo na nin nakababangang falsong mga relihiyon, sosyal na mga palakaw, o gobyerno. Mayo na nin satanikong propaganda sa pagdaya sa mga tawo; an gabos na ahensiang nagpapaluwas kaiyan malalaglag kaiba kan palakaw ni Satanas. Isip-isipa na sana: an bilog na nakaiilong aire kan kinaban ni Satanas hahaleon na! Kanigoan na kaginhawahan an itatao kaiyan!
4. Iladawan an pagkaliwat nin pagtotokdo na mangyayari.
4 Sa panahon na iyan an mapanlaglag na mga ideya kan paghade nin tawo sasalidahan kan nakapakokosog na katokdoan gikan sa Dios. “An saimo gabos na aki magigin mga tawo na tinokdoan ni Jehova.” (Isaias 54:13) Huli sa marahay na pagtotokdong ini taon-taon, “an daga mapapano kan kaaraman dapit ki Jehova kun paanong an tubig nakatatahob sa mismong kadagatan.” (Isaias 11:9) An mga tawo dai na mag-aadal kan maraot, kundi “an katanosan iyo an manonodan kan mga nag-eerok sa mabungang daga.” (Isaias 26:9) An nakapakokosog na mga kaisipan asin hiro iyo an magigin ugale nin mga tawo.—Gibo 17:31; Filipos 4:8.
5. Ano an mangyayari sa gabos na karatan asin mga maraot?
5 Kaya, dai na magkakaigwa nin paggadan, kadahasan, panlulugos, paghabon, o iba pang krimen. Mayo na nin magsasakit huli sa maraot na mga gibo nin iba. An Talinhaga 10:30 nagsasabi: “Kun manongod sa matanos, sagkod sa panahon na daing katapusan dai sia papangyayarihon na magripaydipay; alagad kun manongod sa mga maraot, dai sinda magdadanay na mag-erok sa daga.”
Ibabalik an Sangkap na Salud
6, 7. (a) Anong makuring katunayan an tatapuson kan Kahadean? (b) Paano ini ipinaheling ni Jesus kan sia nasa daga?
6 Sa bagong kinaban, hahaleon an gabos na maraot na epekto kan orihinal na pagrebelde. Halimbawa, hahaleon kan pagsakop kan Kahadean an helang asin paggurang. Ngonyan, dawa kun marahay an saindong salud, an makuring katunayan iyo na mantang kamo naggugurang, minalibog an saindong mga mata, nalalapa an saindong mga ngipon, minaluya an saindong pagdangog, nangungurubot an saindong kublit, nararaot an saindong panlaog na mga organo, sagkod na sa huri nagagadan kamo.
7 Minsan siring, an makamomondong mga epektong iyan na minana niato sa enot niatong mga magurang sa madali na makalilihis. Nagigirumdoman daw nindo kun ano an ipinaheling ni Jesus manongod sa salud kan sia nasa daga pa? An Biblia nagsasaysay: “Nagdorolok sa saiya an darakulang kadaklan, na may darang mga pilay, kimay, buta, pula, asin dakol pang iba, asin haros iinapon ninda sinda sa saiyang pamitisan, asin pinaomayan nia sinda; kaya an kadaklan nagngaralas kan maheling ninda na an pula nagtataram asin an pilay naglalakaw patin an buta nakaheheling.”—Mateo 15:30, 31.
8, 9. Iladawan an kaogmahan na maabot sa bagong kinaban kun ibalik na an sangkap na salud.
8 Kanigoan na kaogmahan an maabot sa bagong kinaban mantang nahahale an gabos niatong kamatean! An kasakitan na bunga nin maluyang salud nungka pang magpapadusa sa sato. “Mayo nin nag-eerok na masabi: ‘Naghehelang ako.’” “Sa panahon na iyan an mga mata kan mga buta magkakaburuklat, asin an mismong mga talinga kan mga bongog magkakaburukasan. Sa panahon na iyan an pilay matukad na garo usa, asin an dila kan pula magkukurahaw sa kaogmahan.”—Isaias 33:24; 35:5, 6.
9 Bako daw na makaoogmang magmata kada aga asin marealisar na kamo may mabagsik nang salud? Bako daw na makaoogma para sa mga gurang na maaraman na sinda ibinalik na sa lubos na kosog nin pagkabarobata asin makaaabot sa pagkasangkap na enot na kinamtan ni Adan asin Eva? An panuga kan Biblia: “An saiyang laman magigin mas malomoy kisa kan sa aki; mabalik sia sa mga aldaw kan saiyang kosog sa pagkaaki.” (Job 33:25) Makaoogma nanggad na iapon an mga salming sa mata, pantabang sa pakadangog, saklay, wheelchair, asin bolong! Dai na nungka pang kakaipuhanon an mga ospital, doktor, asin dentista.
10. Ano an mangyayari sa kagadanan?
10 An mga tawo na igwa nin siring kabagsik na buhay dai magugustong magadan. Asin dai man kaipuhan, ta an katawohan dai na magagapos nin minanang pagkabakong sangkap asin kagadanan. Si Cristo “kaipuhan na maghade sagkod na ikinabugtak na nin Dios an gabos na kaiwal sa irarom kan saiyang mga mata.” “An regalo na itinatao nin Dios daing sagkod na buhay.”—1 Corinto 15:25, 26; Roma 6:23; helingon man an Isaias 25:8.
11. Paano sinusumaryo kan Kapahayagan an mga pakinabang kan bagong kinaban?
11 Sa pagsumaryo kan mga pakinabang na mabolos hale sa nagmamakolog na Dios pasiring sa pamilya nin tawo sa Paraiso, an ultimong libro kan Biblia nagsasabi: “Asin papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”—Kapahayagan 21:3, 4.
Mabubuhay Liwat an mga Gadan
12. Paano ipinaheling ni Jesus an saiyang kapangyarihan sa pagbuhay liwat na itinao nin Dios?
12 Si Jesus bako sanang nagpaomay sa mga may helang asin nagparahay sa mga pilay. Binuhay man nia liwat an mga gadan. Sa siring ipinaheling nia an makangangalas na kapangyarihan sa pagbuhay liwat na itinao sa saiya nin Dios. Nagigirumdoman daw nindo an okasyon na si Jesus nagduman sa harong nin sarong tawo na an aking daragita nagadan? Sinabihan ni Jesus an gadan na daragita: “Daraga, ako nagsasabi saimo, Bangon!” Ano an resulta? “Tolos-tolos an daraga nagbangon asin naglakaw.” Kan maheling idto, an mga tawo na yaon duman “nakamate nin labi-labing kaogmahan.” Haros dai ninda matios na dai ikapahayag an saindang kaogmahan!—Marcos 5:41, 42; helingon man an Lucas 7:11-16; Juan 11:1-45.
13. Anong klaseng mga tawo an bubuhayon liwat?
13 Sa bagong kinaban, “magkakaigwa nin pagkabuhay liwat an mga matanos asin an mga bakong matanos.” (Gibo 24:15) Sa panahon na iyan gagamiton ni Jesus an saiyang kapangyarihan na itinao nin Dios ta, arog kan sabi nia, “Ako iyo an pagkabuhay liwat asin an buhay. An naggigibo nin pagtubod sa sako, minsan pa sia magadan, mabubuhay.” (Juan 11:25) Sinabi man nia: “An gabos na nasa mga lolobngan nin girumdoman [nasa memorya nin Dios] makadadangog kan saiyang [ki Jesus] tingog asin maruluwas.”—Juan 5:28, 29.
14. Huling mawawara na an kagadanan, anong mga bagay an hahaleon?
14 Magigin dakulaon an kagayagayahan sa bilog na daga kun an sunod-sunod na grupo nin mga gadan mabuhay liwat tanganing umiba sa saindang mga namomotan! Mayo na nin mga paisi sa pagkagadan na magtatao nin kamondoan sa mga natada. Imbes, tibaad magkaigwa kan kabaliktaran: mga paisi sa bagong mga buhayon liwat na magtatao nin kagayagayahan sa mga namomoot sa sainda. Kaya mayo na nin mga lobong, gatong sa gadan, krematoryo, o sementeryo!
Sarong Kinaban na Tunay na Matoninong
15. Paano maootob an hula ni Miqueas sa pinakalubos na sentido?
15 Maootob an tunay na katoninongan sa gabos na parte nin buhay. An mga guerra, mga promotor nin guerra, asin paggibo nin mga armas magigin nang mga bagay kan nakaagi. Taano? Huli ta mawawara na an nakababangang nasyonal, pantribo, asin rasyal na mga intereses. Dangan, sa pinakalubos na sentido, “dai sinda mabingat nin minasbad, an nasyon tumang sa nasyon, ni mag-aadal pa man sinda sa pakilaban.”—Miqueas 4:3.
16. Paano sisiertohon nin Dios na magin imposible an mga guerra?
16 Ini tibaad garo makangangalas huli sa paha sa dugong kasaysayan nin tawo na daing ontok na pagguerra. Alagad ta iyan nangyari huli ta an katawohan nasakop nin paghade nin mga tawo asin demonyo. Sa bagong kinaban, sakop kan pamamahala kan Kahadean, ini an mangyayari: “Madia kamo, banwaan, helinga nindo an mga ginigibo ni Jehova . . . Pinaoontok nia an mga ralaban sagkod sa kaporoporohi kan daga. An arko saiyang binabari asin pinagpuputolputol an garod; an mga karro [sa pakikilaban] saiyang sinosolo sa kalayo.”—Salmo 46:8, 9.
17, 18. Sa bagong kinaban, ano an magigin relasyon nin tawo asin kan mga hayop?
17 An tawo asin hayop magigin matoninong man, arog kaidto sa Eden. (Genesis 1:28; 2:19) An Dios nagsasabi: “Para sa sainda magibo nanggad ako nin tipan sa aldaw na iyan dapit sa mabangis na hayop sa kapatagan asin sa naglalayog na linalang sa kalangitan patin sa nagkakanap sa daga, asin . . . pahihigdaon ko sinda sa katiwasayan.”—Oseas 2:18.
18 Gurano kahiwas kan katoninongan na iyan? “An lobo mag-eerok sa kadikit na panahon na kasaro kan kordero, asin an leopardo maghihigdang kadorog kan kanding, asin an bakang ogbon asin an leon saka an hayop na basog nag-iiriba; asin sarong aking sadang an mangengenot sa sainda.” Nungka pa na an mga hayop magigin peligro sa tawo o sa sainda man sana. Minsan “an leon masabsab nin dagami na siring kan baka”!—Isaias 11:6-9; 65:25.
An Daga Gigibohon na Paraiso
19. An daga gigibohon na ano?
19 An entirong daga gigibohon na paraisong istaran para sa katawohan. Iyan an dahelan na nakapanuga si Jesus sa sarong tawo na nagtubod sa saiya: “Ika makakaibahan ko sa Paraiso.” An Biblia nagsasabi: “An kapatagan asin an alang na lugar mag-oogma, asin an disyerto maggagayagaya patin mamumurak arog kan azafran. . . . Huli ta an katubigan maburakbusak sa kapatagan, asin an kasalogan sa disyerto.”—Lucas 23:43; Isaias 35:1, 6.
20. Taano ta nungka pang magpapasakit an gutom sa katawohan?
20 Sa pagsakop kan Kahadean nin Dios, nungka pang magugutom an minilyon. “Magkakaigwa nin kadakoldakol na tipasi sa ibabaw kan daga; magkakaigwa nin abundansia sa alitoktok kan kabukidan.” “An kahoy kan kahiwasan matao kan bunga kaiyan, asin an daga mismo mapaluwas kan bunga kaiyan, asin sinda mamumugtak sa saindang daga na dai nin pag-alaman.”—Salmo 72:16; Ezequiel 34:27.
21. Ano an mangyayari sa kadaihan nin harong, mga iskuwater, asin marahay na mga lugar?
21 Dai na magkakaigwa nin kadukhaan, mga tawong daing harong, iskuwater, o mga lugar na lakop an krimen. “Sinda siertong magtotogdok nin mga harong asin mag-oontok sinda dian; asin siertong magtatanom sinda nin mga ubasan asin kakakanon ninda an bunga kaiyan. Dai sinda magtotogdok asin iba an mag-oontok; dai sinda matanom asin iba an makakan.” “Sinda magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda.”—Isaias 65:21, 22; Miqueas 4:4.
22. Paano ilinaladawan kan Biblia an mga bendisyon kan paghade nin Dios?
22 An mga tawo bebendisyonan kan gabos na ini, asin labi pa, sa Paraiso. An Salmo 145:16 nagsasabi: “Binibiklad mo [nin Dios] an saimong kamot asin pinaninigoan an mawot nin lambang bagay na may buhay.” Bakong makangangalas na sinasabi kan hula sa Biblia: “An mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan. . . . An mga matanos mismo magmamana kan daga, asin sinda mag-eerok dian sagkod lamang.”—Salmo 37:11, 29.
Paghale sa Epekto kan Nakaagi
23. Paano hahaleon kan Kahadean nin Dios an gabos na kasakitan na naeksperyensiahan niato?
23 An Kahadean nin Dios hahaleon an gabos na danyos na ginibo sa pamilya nin tawo sa nakaaging anom na ribong taon. Sa panahon na iyan an mga kagayagayahan makalalabi nanggad sa ano man na kasakitan na inagihan nin mga tawo. An buhay dai didisturbohon nin ano man na maraot na pakagirumdom sa nakaaging kasakitan. An nakapakokosog na mga kaisipan asin aktibidad na magigin pan-aroaldaw na buhay nin mga tawo luway-luway na paparaon an makolog na mga memorya.
24, 25. (a) Ano an ihinula ni Isaias na mangyayari? (b) Taano ta makasisierto kita na mawawara an memorya nin nakaaging mga pagsakit?
24 An nagmamakolog na Dios nagsasabi: “Ako naglalalang nin bagong kalangitan [bagong langitnon na gobyerno sa katawohan] asin sarong bagong daga [matanos na sosyedad nin tawo]; asin an dating mga bagay dai na magigirumdoman, ni masabong pa iyan sa puso. Alagad ta maggayagaya kamo, kamong banwaan, asin mag-orogma kamo sagkod lamang sa sakong linalalang.” “An bilog na daga nahingaloan, nawaran nin karibokan. An mga tawo nag-ogma sa magayagayang mga kurahaw.”—Isaias 14:7; 65:17, 18.
25 Kaya paagi sa saiyang Kahadean, biyong babaliktaron nin Dios an marahay na situwasyon na haloyon nang yaon. Sa bilog na panahon na daing katapusan ipaheheling nia an saiyang dakulang pagmakolog sa sato paagi sa pagpaoran nin mga bendisyon na makababayad nin sobrang marhay sa ano man na kakologan na inako niato kan nakaagi. An nakaaging mga kasakitan na inagihan niato magigin malibog nang memorya, kun iyan gigirumdomon pa niato.
26. Taano ta mababayadan kita nin Dios para sa ano man na nakaaging kasakitan?
26 Iyan an paagi na babayadan nin Dios an kasakitan na tibaad tinios niato sa kinaban na ini. Aram nia na bako tang kasalan na kita namundag na bakong sangkap, ta nagmana kita nin pagkabakong sangkap sa enot niatong mga magurang. Bako tang kasalan na kita namundag sa sarong satanikong kinaban, ta kun nagmaimbod si Adan asin Eva, sa paraiso kutana kita namundag. Kaya may dakulang pagkaherak na babayadan nin Dios nin sobra pa an maraot na nakaagi na pinaagihan sa sato.
27. Anong mga hula an maootob sa makangangalas na paagi sa bagong kinaban?
27 Sa bagong kinaban, maeeksperyensiahan kan katawohan an katalingkasan na ihinula sa Roma 8:21, 22: “An linalang mismo bubutasan man hale sa kaoripnan nin kalapaan asin magkakaigwa kan mamuraway na katalingkasan kan mga aki nin Dios. Huli ta kita nakaaaram na an gabos na linalang padagos na nag-aaragrangay asin nagtitios nin kolog sagkod ngonyan.” Sa panahon na iyan maheheling nin mga tawo an lubos na kaotoban kan pamibi: “Dumatong logod an kahadean mo. Gibohon logod an boot mo, kun paano sa langit, siring man sa daga.” (Mateo 6:10) An makangangalas na mga kamugtakan sa Paraisong daga magpaparisa kan mga kamugtakan sa langit.
[Mga Hapot Para sa Pag-adal]
[Mga ritrato sa pahina 23]
Sa bagong kinaban, an mga gurang mabalik sa bagsik nin barobata
[Ritrato sa pahina 24]
An gabos na helang asin diperensia hahaleon sa bagong kinaban
[Ritrato sa pahina 25]
Sa bagong kinaban, an mga gadan bubuhayon liwat
[Ritrato sa pahina 26]
‘Dai na sinda mag-aadal sa pakilaban’
[Ritrato sa pahina 27]
An mga tawo asin mga hayop biyong magigin matoninong sa Paraiso
[Mga ritrato sa pahina 27]
‘Bibikladon nin Dios an saiyang kamot asin paninigoan an mawot nin lambang bagay na may buhay’
[Ritrato sa pahina 28]
An Kahadean nin Dios babayadan nin sobra pa an gabos na kasakitan na tibaad tinios ta
