An Makangangalas na Balaog na Libreng Kabotan
Kabtang 5
An Makangangalas na Balaog na Libreng Kabotan
1, 2. Anong makangangalas na balaog an kabtang kan satong naturalesa?
TANGANING masabotan kun taano ta itinogot nin Dios an kasakitan asin kun ano an gigibohon nia manongod dian, kaipuhan na masabotan niato kun paano nia kita ginibo. An ginibo nia labi pa sa paglalang sato na may hawak asin hotok. Linalang man nia kita na may espesyal na mental asin emosyonal na mga kuwalidad.
2 An pundamental na kabtang kan satong mental asin emosyonal na naturalesa iyo an libreng kabotan. Iyo, itinanom sato nin Dios an kakayahan na katalingkasan sa pagpili. Iyan makangangalas nanggad na balaog gikan sa saiya.
Kun Paano Kita Ginibo
3-5. Taano ta inaapresyar niato an libreng kabotan?
3 Helingon niato kun paano kalabot an libreng kabotan sa pagtogot nin Dios sa kasakitan. Primero, isip-isipa ini: Inaapresyar daw nindo an pagkaigwa kan katalingkasan na pilion kun ano an saindong gigibohon asin sasabihon, kun ano an saindong kakakanon asin isusulot, kun ano an magigin trabaho nindo, asin kun saen asin paano kamo mamumuhay? O boot daw nindo na may magdikta saindo kan kada tataramon asin hiro sa kada segundo kan saindong buhay?
4 Mayo nin normal na tawo na magugustong biyong haleon sa saiyang pamomogol an saiyang buhay. Taano ta mayo? Huli sa pagkagibo sato nin Dios. Sinasabi sato kan Biblia na linalang nin Dios an tawo sa saiyang ‘ladawan asin kaagid,’ asin an saro sa mga kakayahan nin Dios mismo iyo an katalingkasan sa pagpili. (Genesis 1:26; Deuteronomio 7:6) Kan lalangon nia an mga tawo, itinao nia sa sainda an makangangalas na kakayahan na iyan—an balaog na libreng kabotan. Iyan an sarong dahelan na nanluluyang marhay an satong boot kun inooripon kita nin mapan-aping mga namomoon.
5 Kaya an pagmawot nin katalingkasan bakong aksidente, ta an Dios Dios nin katalingkasan. An Biblia nagsasabi: “Kun saen an espiritu ni Jehova, yaon an katalingkasan.” (2 Corinto 3:17) Kaya, itinao sato nin Dios an libreng kabotan bilang kabtang kan mismong naturalesa niato. Mantang aram nia kun paano an dalagan kan satong isip asin emosyon, aram nia na kita magigin pinakamaogma kun igwa nin libreng kabotan.
6. Paano linalang nin Dios an satong hotok na umandar kaoyon kan libreng kabotan?
6 Kaiba kan balaog na libreng kabotan, tinawan kita nin Dios kan kakayahan na mag-isip, magturotimbang, magdesisyon, asin mamidbid an kalaenan nin tama sa sala. (Hebreo 5:14) Kaya, an libreng kabotan basado sa intelihenteng pagpili. Dai kita ginibo na siring sa daing isip na mga robot na daing sadiring kabotan. Ni linalang man kita na gumawe sono sa instinto siring sa mga hayop. Imbes, an makangangalas na hotok niato dinisenyo na umandar kaoyon kan satong katalingkasan sa pagpili.
An Pinakamarahay na Kapinonan
7, 8. Anong marahay na kapinonan an itinao nin Dios sa enot niatong mga magurang?
7 Tanganing ipaheling kun gurano an pagmakolog nin Dios, kaiba kan balaog na libreng kabotan, an enot niatong mga magurang, si Adan asin Eva, tinawan kan gabos na rasonableng mamawoton nin siisay man. Ibinugtak sinda sa mahiwas, garo-parkeng paraiso. Abunda sinda sa materyal. Sangkap an saindang isip asin hawak, kaya dai sinda kaipuhan na gumurang o maghelang o magadan—puwede kutana sindang mabuhay sagkod lamang. Puwede kutana sindang magkaigwa nin sangkap na mga aki na magkakaigwa man kutana nin maogma, daing katapusan na ngapit. Asin an nagdadakol na populasyon magkakaigwa kutana kan nakakokontentong trabaho na sa katapustapusi gibohon na paraiso an entirong daga.—Genesis 1:26-30; 2:15.
8 Mapadapit sa itinao, an Biblia nagsasaysay: “Naheling nin Dios an gabos niang ginibo asin, uya! idto marahayon.” (Genesis 1:31) An Biblia nagsasabi man manongod sa Dios: “Sangkap an saiyang gibo.” (Deuteronomio 32:4) Iyo, tinawan nin sangkap na kapinonan kan Kaglalang an pamilya nin tawo. Dai nin marahay pa dian. Sia nagin mapagmakolog nanggad na Dios!
Katalingkasan sa Laog nin mga Sagkodan
9, 10.Taano ta dapat na kontrolon nin tama an libreng kabotan?
9 Minsan siring, katuyohan daw nin Dios na an libreng kabotan daing sagkodan? Imahinara an sarong matawong siudad na mayo nin mga ley sa trapiko, na an gabos puwedeng magpadalagan nin sasakyan sa ano man na direksion sa ano man na rikas. Bobooton daw nindong magpadalagan nin sasakyan sa siring na mga kamugtakan? Dai, iyan magigin anarkiya sa trapiko asin seguradong magbubunga nin dakol na aksidente.
10 Iyo man an balaog nin Dios na libreng kabotan. An daing kasagkodan na katalingkasan mangangahulogan nin anarkiya sa sosyedad. Kaipuhan na may mga ley na maggigiya sa mga aktibidad nin tawo. An Tataramon nin Dios nagsasabi: “Gumawe kamo siring sa mga tawong talingkas, asin noarin man dai paggamiton an saindong katalingkasan bilang sarahotan sa karatan.” (1 Pedro 2:16, JB) Boot nin Dios na an libreng kabotan kontrolon para sa ikararahay kan gabos. An katuyohan nia kita magkaigwa, bakong nin lubos na katalingkasan, kundi nin limitadong katalingkasan, na sakop nin ley.
Kiisay na mga Ley?
11. Kiisay na mga ley kita dinisenyong kumuyog?
11 Kiisay na mga ley kita dinisenyong kumuyog? An saro pang kabtang kan teksto sa 1 Pedro 2:16 ( JB) nagsasabi: “Bako kamong oripon nin siisay man kundi nin Dios.” Ini dai nangangahulogan nin mapan-aping kaoripnan, kundi, imbes, iyan nangangahulogan na kita dinisenyo na magin pinakamaogma kun sakop kan mga ley nin Dios. (Mateo 22:35-40) An saiyang mga ley, labi kisa ano pa man na ley na ginibo nin mga tawo, nagtatao kan pinakamarahay na giya. “Ako, si Jehova, an saimong Dios, an Saro na nagtotokdo saimo na pakinabangon an saimong sadiri, an Saro na nagpapangyari saimo na maglakaw sa dalan na maninigo mong lakawan.”—Isaias 48:17.
12. Ano an katalingkasan niato sa pagpili sa laog kan mga ley nin Dios?
12 Kadungan kaiyan, an mga ley nin Dios minatogot sa dakulang katalingkasan sa pagpili sa laog kan mga sagkodan kaiyan. Ini nagbubunga nin pagkaralaenlaen asin ginigibong makawiwili an pamilya nin tawo. Isip-isipa an laen-laen na klase nin pagkakan, gubing, musika, arte, asin harong sa bilog na kinaban. Sierto na mas gusto niatong kita an pumili sa siring na mga bagay imbes na may ibang tawo na magdesisyon para sa sato.
13. Anong pisikal na mga ley an kaipuhan niatong kuyogon para sa sadiri niatong ikararahay?
13 Kaya linalang kita na magin pinakamaogma kun sakop kan mga ley nin Dios para sa gawe-gawe nin tawo. Iyan kapareho kan pagigin sakop kan pisikal na mga ley nin Dios. Halimbawa, kun dai niato iintindihon an ley nin grabidad asin tumagbang kita hale sa halangkaw na lugar, kita mapipilay o magagadan. Kun dai niato iintindihon an panlaog na mga ley kan satong hawak asin mapondo kita sa pagkakan, pag-inom, o paghangos, magagadan kita.
14. Paano niato naaaraman na an mga tawo dai linalang na magin independiente sa Dios?
14 Kun paanong kita linalang na may pangangaipong pumasakop sa pisikal na mga ley nin Dios, linalang man kita na may pangangaipong pumasakop sa moral asin sosyal na mga ley nin Dios. (Mateo 4:4) An mga tawo dai linalang na magin independiente sa saindang Kaggibo asin magin mapanggana pa man giraray. Si propeta Jeremias nagsasabi: “Mayo sa tawong naglalakaw an kakayahan na giyahan an saiyang lakad. Tanosan ako, O Jehova.” (Jeremias 10:23, 24) Kaya sa gabos na paagi an mga tawo linalang tanganing mamuhay na sakop kan paghade nin Dios, bakong kan saindang sadiri.
15. Magigin magabat daw kutana an mga ley nin Dios para ki Adan asin Eva?
15 An pagkuyog sa mga ley nin Dios dai man kutana magigin magabat sa enot niatong mga magurang. Imbes, iyan sa ikararahay kutana ninda asin kan bilog na pamilya nin tawo. Kun an enot na mag-agom nagdanay sa laog kan mga sagkodan kan mga ley nin Dios, marahay kutana an kaaabtan nin gabos. An totoo, kita kutana ngonyan nag-eerok sa sarong magayonon na paraiso nin kaogmahan bilang nagkakaminootan, sararong pamilya nin tawo! Mayo kutana nin karatan, kasakitan, asin kagadanan.
[Mga Hapot Para sa Pag-adal]
[Ritrato sa pahina 11]
Tinawan kan Kaglalang nin sangkap na kapinonan an mga tawo
[Ritrato sa pahina 12]
Bobooton daw nindong magpadalagan nin sasakyan sa surusuan na trapiko kun mayo nin mga ley sa trapiko?
