Kabtang 7

Ano an Nagin Resulta nin Pagrebelde?

1-3. Paano pinatunayan nin panahon na tama si Jehova?

 MAPADAPIT sa isyu kan diretso nin Dios na maghade, ano an nagin resulta kan gabos na siglong ini nin paghade nin tawo na independiente sa Dios? Napatunayan daw na mas matibay na maghade an mga tawo kisa sa Dios? Kun huhusgaran niato basado sa rekord kan panriringis nin tawo sa kapwa tawo, dai nanggad.

² Kan isikwal kan enot niatong mga magurang an paghade nin Dios, suminunod an kalamidad. Tinawan ninda nin kasakitan an saindang sadiri asin an bilog na pamilya nin tawo na guminikan sa sainda. Asin mayo sinda nin mababasol kundi an sainda man sana. An Tataramon nin Dios nagsasabi: “Sinda guminawe nin kapahapahamak sa sadiri ninda; sinda bako niang mga aki, an kasalan sadiri ninda.”​—Deuteronomio 32:5.

³ Ipinaheling nin kasaysayan na tama an patanid nin Dios ki Adan asin Eva na kun sinda maluwas sa pagpasakop sa mga probisyon nin Dios, sinda manluluya asin sa huri magagadan. (Genesis 2:17; 3:19) Sinda talagang luminuwas sa pagpasakop sa paghade nin Dios, asin pag-abot nin panahon sinda talagang nanluya asin nagadan.

4. Taano ta kita gabos namundag na bakong sangkap, madaling maghelang asin magadan?

⁴ An nangyari pakalihis kaiyan sa gabos nindang gikan siring sa ipinaliliwanag kan Roma 5:12: “Paagi sa sarong tawo [si Adan, an payo kan pamilya  nin katawohan] an kasalan naglaog sa kinaban asin an kagadanan huli sa kasalan, asin kaya an kagadanan nakalakop sa gabos na tawo.” Kaya kan an enot niatong mga magurang magrebelde tumang sa pagkaparaataman nin Dios, sinda nagin may depektong mga parakasala. Kaoyon sa ley nin henetika, an ibinungang pagkabakong sangkap iyo na sana an ikapamamana ninda sa saindang mga aki. Iyan an dahelan na kita gabos namundag na may depekto, na madaling maghelang asin magadan.

5, 6. Ano an ipinaheling nin kasaysayan manongod sa mga paghihingoa nin tawo na magtao nin tunay na katoninongan asin prosperidad?

⁵ Dakol nang siglo an nag-agi. Nagpasarusalida na an mga imperyo. Prinobaran na an gabos na klase nin gobyerno. Alagad ta, paorootro, nangyari an makatatakot na mga bagay sa pamilya nin tawo. Pakalihis nin anom na ribong taon, hohonaon nin saro na an mga tawo nagprogreso na sagkod sa punto na maestablisar an katoninongan, hustisya, asin prosperidad sa bilog na daga asin na eksperto na sinda sa positibong mga halaga nin kabootan, pagkaherak, asin kooperasyon.

⁶ Alagad ta kabaliktaran an katunayan. Mayo nin nagibong gobyerno nin tawo na nagtao nin tunay na katoninongan asin prosperidad sa gabos. Sa ika-20 siglo sanang ini, naheling niato an sistematikong paggadan sa minilyon kaidtong Holocaust asin sa labing 100 milyones sa mga guerra. Sa panahon niato dai mabilang na mga tawo an pinasakitan, ginadan, asin ibinilanggo huli sa pagkapanatiko asin dai pagkaparareho sa politika.

An Situwasyon Ngonyan

7. Paano ikalaladawan an kamugtakan ngonyan kan pamilya nin tawo?

⁷ Dugang pa, horophoropa an pankagabsan na kamugtakan kan pamilya nin tawo ngonyan. Lakop an krimen asin kadahasan. Epidemya an pag-abuso sa droga. Lakop na gayong epidemya an mga helang na ikinaoolakit sa pagdodorog. An kinatatakotan na helang na AIDS nakaaapektar sa minilyon na tawo. Manampulong milyon an nagagadan sa gutom o helang kada taon, mantang an nagkapira mayamanon. Inaatian asin linalaglag nin mga tawo an daga. Nalaglag na an mga pamilya asin moral na mga pamantayan sa gabos na lugar. Tunay na an buhay ngonyan nagpaparisa kan makanos na paghade kan ‘dios kan kinaban na ini,’ si Satanas. An kinaban na pinaghahadean nia daing pagkamoot, daing herak, asin biyong maraot.​—2 Corinto 4:4.

8. Taano ta dai niato maaapod na tunay na pag-oswag an mga nagibo nin katawohan?

⁸ Itinao nin Dios sa mga tawo an bastanteng panahon na sinda makaabot sa kulminasyon kan saindang sientipiko asin materyal na pag-oswag. Alagad ta tunay daw na pag-oswag kun an busog asin pana nasasalidahan nin mga masinggan, tangke, mga parabombang jet, asin nuklear na mga misil? Pag-oswag daw kun an mga tawo nakapagbibiyahe pasiring sa espasyo pero dai nakapag-iiribang may katoninongan digdi sa daga? Pag-oswag daw kun an mga tawo natatakot na maglakaw sa tinampo kun banggi, o pati kun aldaw sa ibang lugar?

 An Ipinaheling kan Panahon

9, 10. (a) Ano an malinaw na ipinaheling kan nakaaging mga siglo? (b) Taano ta habo nin Dios na haleon an libreng kabotan?

⁹ An ipinaheling kan pagbalo nin ginatos na taon iyo na bakong posible para sa mga tawo na magiyahan nin mapanggana an saindang mga lakad na siblag sa paghade nin Dios. Dai ninda kayang gibohon iyan kun paanong dai ninda kayang mabuhay na dai nagkakakan, nag-iinom, asin naghahangos. Malinaw an ebidensia: Kita dinisenyo na magsarig sa paggiya kan satong Kaglalang kun paanong kita linalang na magsarig sa pagkakan, tubig, asin aire.

¹⁰ Sa pagtogot sa karatan, ipinaheling nin Dios nin permanente an mamondong mga resulta nin salang paggamit sa libreng kabotan. Asin an libreng kabotan napakahalagang balaog kaya imbes na haleon iyan sa mga tawo, itinogot nin Dios na maheling ninda kun ano an kahulogan kan salang paggamit dian. An Tataramon nin Dios nagsasabi kan katotoohan sa pagsabi kaiyan: “Mayo sa tawong naglalakaw an kakayahan na giyahan an saiyang lakad.” Nagsasabi man iyan kan katotoohan sa pagsabing: “An tawo nagsakop sa tawo sa saiyang ikararaot.”​—Jeremias 10:23; Eclesiastes 8:9.

11. May klase daw nin paghade nin tawo na nakahale sa kasakitan?

¹¹ An pagtogot nin Dios sa paghade nin tawo sa laog nin anom na ribong taon mapuwersang nag-iilustrar na dai kaya nin tawo na haleon an kasakitan. Dai nia iyan nagibo minsan kasuarin. Halimbawa, kan saiyang kaaldawan si Hadeng Salomon nin Israel, sa ibong kan gabos niang kadonongan, kayamanan, asin kapangyarihan, dai kayang resolberan an kamondoan na bunga kan paghade nin tawo. (Eclesiastes 4:​1-3) Siring man, sa satong kaaldawan an mga namomoon sa kinaban, dawa sa ibong kan pinakabago nindang mga pag-oswag sa teknolohiya, dai kayang haleon an kasakitan. Mas grabe pa, ipinaheheling nin kasaysayan na an mga tawong independiente sa paghade nin Dios dinugangan pa an kasakitan imbes na haleon iyan.

An Harayoan na Pananaw nin Dios

12-14. Ano an haloyan na mga pakinabang bunga kan pagtogot nin Dios sa kasakitan?

¹² An pagtogot nin Dios sa kasakitan nagin makolog para sa sato. Alagad ta nagin harayoan an pananaw nia, sa pakaaram kan marahay na ibubunga sa huri. An pananaw nin Dios magtatao nin pakinabang sa mga linalang, bako sanang sa laog nin pirang taon o pirang ribo, kundi sa minilyon na taon, iyo, sagkod lamang.

¹³ Kun lumataw liwat an situwasyon sa ano man na panahon sa ngapit na an saro gamiton sa sala an libreng kabotan tanganing ibugtak sa pagduda an paagi nin Dios, dai na kaipuhan na tawan sia nin panahon na patunayan an saiyang mga opinyon. Mantang tinawan na nin rinibong taon an mga rebelde, an Dios nag-establisar nin legal na ehemplo na ikaaaplikar sagkod lamang saen man sa uniberso.

 ¹⁴ Huli ta itinogot ni Jehova an karatan asin kasakitan sa panahon na ini, napatunayan na nin bastante na mayo nin ano man na bakong oyon sa saiya an magigin mapanggana. Ikinapaheling na nin daing duda na mayo nin independienteng pakana nin mga tawo o espiritung mga linalang na makatatao nin nagdadanay na pakinabang. Kaya, sa panahon na iyan an Dios may lubos na katanosan na ronoton tolos an siisay man na rebelde. “An gabos na maraot saiyang paparaon.”​—Salmo 145:20; Roma 3:4.

[Mga Hapot Para sa Pag-adal]

[Ritrato sa pahina 15]

Pakatapos na pilion kan enot niatong mga magurang an independensia sa Dios, sinda sa katapustapusi naggurang asin nagadan

[Mga ritrato sa pahina 16]

An paghade nin tawo na siblag sa Dios nagin kapahapahamak

[Credit Line]

Retrato kan Coast Guard sa E.U.