Ginigibo na Ngonyan an Pundasyon kan Bagong Kinaban
Kabtang 11
Ginigibo na Ngonyan an Pundasyon kan Bagong Kinaban
1, 2. Bilang kaotoban kan hula sa Biblia, ano an nangyayari sa atubangan mismo kan satong mga mata?
AN SARO pang makangangalas iyo an bagay na ginigibo mismo ngonyan an pundasyon kan bagong kinaban nin Dios, mantang nagraraot an daan na kinaban ni Satanas. Sa atubangan mismo kan satong mga mata, tinitipon nin Dios an mga tawo hale sa gabos na nasyon asin binibilog sinda na magin pundasyon nin sarong bagong daganon na sosyedad na madali nang sumalida sa barangang kinaban ngonyan. Sa Biblia, sa 2 Pedro 3:13, an bagong sosyedad na ini inaapod na “bagong daga.”
2 An hula sa Biblia nagsasabi man: “Sa huring kabtang kan mga aldaw [an panahon na nabubuhayan niato ngonyan] . . . , dakol na banwaan an maduruman asin masarabi: ‘Madia kamo, banwaan, asin magtukad kita sa bukid ni Jehova [an tunay na pagsamba sa saiya], . . . asin totokdoan nia kita dapit sa saiyang mga dalan, asin kita maglalakaw sa saiyang mga dana.’”—Isaias 2:2-3.
3. (a) Sa tahaw niisay naootob an hula ni Isaias? (b) Paano nagkomento digdi an huring libro kan Biblia?
3 An hulang iyan naootob na ngonyan sa tahaw kan mga nagpapasakop sa ‘mga dalan nin Dios asin naglalakaw sa saiyang mga dana.’ An huring libro kan Biblia inaapod an mamomoton sa katoninongan na internasyonal na sosyedad na ini nin mga tawo na “sarong dakulang kadaklan . . . hale sa gabos na nasyon asin tribo asin banwaan patin tataramon,” tunay na panglobong kasararoan nin magturugang na sararong naglilingkod sa Dios. Asin an Biblia nagsasabi pa: “An mga ini an nagluwas sa dakulang kahorasaan.” An boot sabihon, makaliligtas sinda sa katapusan kan maraot na palakaw na ini nin mga bagay.—Kapahayagan 7:9, 14; Mateo 24:3.
Tunay na Internasyonal na Kasararoan nin Magturugang
4, 5. Taano ta posible an pankinaban na kasararoan nin magturugang kan mga Saksi ni Jehova?
4 An minilyon na Saksi ni Jehova odok na naghihingoang mamuhay oyon sa mga instruksion asin dalan nin Dios. An paglaom ninda na buhay na daing sagkod napasisikad sa bagong kinaban nin Dios. Paagi sa pamumuhay aroaldaw na nagkukuyog sa mga pagboot nin Dios, ipinaheheling ninda sa saiya an kabotan ninda na pumasakop sa saiyang paagi nin paghade ngonyan asin sa bagong kinaban. Sa gabos na lugar, ano man an saindang nasyonalidad o rasa, parareho an pamantayan na kinukuyog ninda—an ibinugtak nin Dios sa saiyang Tataramon. Iyan an dahelan na sinda tunay na internasyonal na kasararoan nin magturugang, sarong sosyedad na pambagong kinaban na ginibo nin Dios.—Isaias 54:13; Mateo 22:37, 38; Juan 15:9, 14.
5 An mga Saksi ni Jehova dai kinukua an kaomawan sa saindang pagigin pambihirang panglobong kasararoan nin magturugang. Aram ninda na ini bunga kan makapangyarihan na espiritu nin Dios na naghihiro sa mga tawo na nagpapasakop sa saiyang mga pagboot. (Gibo 5:29, 32; Galacia 5:22, 23) An Dios an kaggibo kaiyan. Arog kan sabi ni Jesus, “an mga bagay na dai mahihimo nin mga tawo mahihimo nin Dios.” (Lucas 18:27) Kaya an Dios na nagpangyari sa nagdadanay na uniberso iyo man an nagpapangyari sa magdadanay na sosyedad na pambagong kinaban.
6. Taano ta maaapod na modernong milagro an kasararoan nin magturugang kan mga Saksi ni Jehova?
6 Kaya, an paagi nin paghade ni Jehova sa bagong kinaban maheheling na sa saiyang ginigibo sa pundasyon kan bagong kinaban na binibilog na ngonyan. Asin an ginibo nia sa saiyang mga Saksi, sa sarong sentido, modernong milagro. Taano? Huli ta inorganisar nia an mga Saksi ni Jehova na magin tunay na pankinaban na kasararoan nin magturugang, na dai noarin man malalaglag nin nakababangang nasyonal, rasyal, o relihiyosong intereses. Minsan ngani an mga Saksi minilyon an kabilangan asin nag-iistar sa labing 200 na kadagaan, sinda borogkos sa sarong dai mapapatod na relasyon. An pankinaban na kasararoan nin magturugang na ini, na pambihira sa bilog na kasaysayan, talagang modernong milagro—ginibo nin Dios.—Isaias 43:10, 11, 21; Gibo 10:34, 35; Galacia 3:28.
Pakamidbid sa Banwaan nin Dios
7. Paano sinabi ni Jesus na mamimidbid an tunay niang mga parasunod?
7 Paano pa maaaraman kun sairisay an ginagamit nin Dios bilang pundasyon para sa saiyang bagong kinaban? Bueno, siisay an nag-ootob sa mga tataramon ni Jesus sa Juan 13:34, 35? Sia nagsabi: “Tinatawan ko kamo nin bagong togon, na kamo magkaminorootmootan; siring sa pagkamoot ko sa saindo, na kamo man magkaminorootmootan. Paagi kaini an gabos makaaaram na kamo an sakong mga disipulo, kun kamo nagkakaminorootmootan.” An mga Saksi ni Jehova nagtutubod sa mga tataramon ni Jesus asin kinukuyog iyan. Arog kan pagboot kan Tataramon nin Dios, sinda may “makosog na pagkamoot sa lambang saro.” (1 Pedro 4:8) ‘Isinosolog ninda an pagkamoot, huli ta iyan sangkap na bogkos nin pagkasararo.’ (Colosas 3:14) Kaya an pagkamoot sa tugang an “kola” na nagdudukot sa sainda sa bilog na kinaban.
8. Paano dugang pang ipinamimidbid kan 1 Juan 3:10-12 an banwaan nin Dios?
8 Siring man, an 1 Juan 3:10-12 nagsasabi: “An mga aki nin Dios asin an mga aki kan Diablo namimidbid sa bagay na ini: An gabos na dai naggigibo nin katanosan bakong gikan sa Dios, ni an saro na dai namomoot sa saiyang tugang. Huli ta ini an mensahe na saindong nadangog poon sa kapinonan, na kita maninigong magkaminorootmootan; bakong arog ki Cain, na naggikan sa maraot asin guminadan sa saiyang tugang.” Kaya, an banwaan nin Dios naglilikay sa kadahasan, panglobong kasararoan nin magturugang.
Saro Pang Nagpapamidbid na Bagay
9, 10. (a) Paagi sa anong gibohon na an mga lingkod nin Dios mamimidbid sa huring mga aldaw? (b) Paano inotob kan mga Saksi ni Jehova an Mateo 24:14?
9 May saro pang paagi na mamidbid an mga lingkod nin Dios. Sa saiyang hula manongod sa katapusan kan kinaban, may dakol na sinabi si Jesus na matanda sa panahon na ini bilang an huring mga aldaw. (Helingon an Kabtang 9.) An sarong pundamental na kabtang kan hulang ini sinasabi sa saiyang mga tataramon sa Mateo 24:14: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”
10 Naheling daw niatong naootob an hulang iyan? Iyo. Poon kan magpoon an huring mga aldaw kan 1914, an mga Saksi ni Jehova ihinulit an maogmang bareta kan Kahadean nin Dios sa bilog na kinaban sa paagi na ipinagboot ni Jesus, sa harong kan mga tawo. (Mateo 10:7, 12; Gibo 20:20) Minilyon na Saksi an nagsosongko sa mga tawo sa lambang nasyon tanganing makipag-olay sa sainda manongod sa bagong kinaban. Ini nagbunga kan pag-ako nindo kan pulyetong ini, ta kaiba sa gibohon kan mga Saksi ni Jehova an pag-imprenta asin pagwaras nin binilyon na literatura manongod sa Kahadean nin Dios. May midbid daw kamong iba na naghuhulit manongod sa Kahadean nin Dios sa harong-harong sa bilog na kinaban? Asin ipinaheheling kan Marcos 13:10 na an paghuhulit asin pagtotokdong ini kaipuhan na gibohon “nguna,” bago umabot an katapusan.
Pagsimbag sa Ikaduwang Dakulang Isyu
11. Ano pa an nagigibo kan mga Saksi ni Jehova sa pagpasakop sa paghade nin Dios?
11 Paagi sa pagpasakop sa mga pagboot asin prinsipyo nin Dios, may nagigibo pa an mga Saksi ni Jehova. Ipinaheheling ninda na putikon si Satanas kan sabihon nia na an mga tawo dai kayang magmaimbod sa Dios kun nasa irarom nin pagbalo, sa siring sinisimbag an ikaduwang dakulang isyu, na napapalabot an integridad nin tawo. (Job 2:1-5) Sa pagigin sarong sosyedad nin minilyon na tawo hale sa gabos na nasyon, ipinaheheling kan mga Saksi, bilang sarong grupo, an kaimbodan sa paghade nin Dios. Minsan sinda mga tawong bakong sangkap, sinusuportaran ninda an lado nin Dios sa isyu manongod sa unibersal na soberaniya, sa ibong kan pangigipit ni Satanas.
12. Paagi sa saindang pagtubod, siisay an inaarog kan mga Saksi?
12 Ngonyan, an minilyon na Saksi ni Jehova idinudugang an saindang patotoo sa patotoo nin halawig na linya nin iba pang saksi kan mga nakaagi na nagpaheling nin kaimbodan sa Dios. An iba digdi si Abel, Noe, Job, Abraham, Sara, Isaac, Jacob, Debora, Rut, David, asin Daniel, sa pagsambit nin pira. (Hebreo, kapitulo 11) Sinda, arog kan sinasabi kan Biblia, ‘dakulang panganoron nin maimbod na mga saksi.’ (Hebreo 12:1) An mga ini asin iba pa pati an mga disipulo ni Jesus nagdanay sa saindang integridad sa Dios. Asin si Jesus mismo an nagtao kan pinakadakulang halimbawa paagi sa pagdadanay sa sangkap na integridad.
13. Anong mga tataramon ni Jesus manongod ki Satanas an napatunayan na totoo?
13 Pinatutunayan kaini na totoo an isinabi ni Jesus sa mga namomoon nin relihiyon manongod ki Satanas: “Alagad ngonyan pinagmamaigotan nindong ako gadanon, sarong tawo na nagsabi saindo kan katotoohan na nadangog ko sa Dios. . . . Gikan kamo sa saindong ama na Diablo, asin boot nindo na gibohon an mga horot kan saindong ama. An sarong iyan sarong paragadan sa kapinonan nia, asin dai sia nagdanay sa katotoohan, huli ta mayo sa saiya an katotoohan. Kun sia nagtataram nin putik, sia nagtataram oyon sa saiyang sadiring boot, huli ta sia sarong putikon asin iyo an ama kan kaputikan.”—Juan 8:40, 44.
Ano an Pipilion Nindo?
14. Ano an nangyayari sa pundasyon kan bagong kinaban ngonyan?
14 An pundasyon kan bagong kinaban na ginigibo ngonyan nin Dios sa internasyonal na sosyedad nin mga Saksi ni Jehova padagos na nagkokosog. Taon-taon ginatos na ribo an ginagamit an libre nindang kabotan, basado sa tamang kaaraman, na akoon an paghade nin Dios. Sinda nagigin kabtang kan sosyedad na pambagong kinaban, nagsusuportar sa lado nin Dios sa isyu kan unibersal na soberaniya, asin pinatutunayan na putikon si Satanas.
15. Anong gibong pagbubulagbulag an ginigibo ni Jesus sa satong kaaldawan?
15 Sa pagpili sa paghade nin Dios, sinda nagigin kuwalipikadong ibugtak sa “too” ni Cristo mantang ibinubulag nia an “mga karnero” sa “mga kanding.” Sa hula nia manongod sa huring mga aldaw, ihinula ni Jesus: “An gabos na nasyon titiponon sa atubang nia, asin pagbubulagbulagon nia an mga tawo, kun paanong ibinubulag nin pastor an karnero hale sa mga kanding. Asin ibubugtak nia an mga karnero sa saiyang too, alagad an mga kanding sa saiyang wala.” An mga karnero mapakumbabang mga tawo na nakiiiba asin nagsusuportar sa mga tugang ni Cristo, na nagpapasakop sa paghade nin Dios. An mga kanding matatagas an payo na nagsisikwal sa mga tugang ni Cristo asin daing ginigibo sa pagsuportar sa paghade nin Dios. Na may anong resulta? Sinabi ni Jesus: “An mga ini [mga kanding] maduman sa pagkaparang daing katapusan, alagad an mga matanos [mga karnero] sa buhay na daing katapusan.”—Mateo 25:31-46.
16. Ano an kaipuhan nindong gibohon kun boot nindong mag-erok sa maabot na Paraiso?
16 Tunay na nagmamakolog sa sato an Dios! Dai na mahahaloy itatao nia an makawiwiling daganon na paraiso. Boot daw nindong mag-erok sa Paraisong iyan? Kun iyo, ipaheling an pag-apresyar nindo sa mga probisyon ni Jehova paagi sa pag-adal manongod sa saiya asin paghiro oyon sa saindong nanodan. “Hanapa nindo si Jehova, banwaan, mantang sia makukua pa. Mag-apod kamo sa saiya mantang sia harani pa. An maraot magbaya na sa saiyang dalan, asin an maliwag na tawo sa saiyang mga kaisipan; asin magbalik sia ki Jehova, na maheherak sa saiya.”—Isaias 55:6, 7.
17. Taano ta daing panahon na dapat na sayangon sa pagpili kun siisay an saindong paglilingkodan?
17 Mayo nin panahon na dapat na sayangon. Haranihon na an katapusan kan daan na palakaw na ini. An Tataramon nin Dios nagsasadol: “Dai kamo mamoot sa kinaban o sa mga bagay kan kinaban. Kun an siisay man namomoot sa kinaban, an pagkamoot kan Ama mayo sa saiya . . . Siring man, an kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.”—1 Juan 2:15-17.
18. Anong paggawe an magpapangyari saindo na may kompiansang makalaom na mabuhay sa makangangalas na bagong kinaban nin Dios?
18 An banwaan nin Dios tinotokdoan na ngonyan para sa buhay na daing katapusan sa bagong kinaban. Nanonodan ninda an espirituwal asin iba pang abilidad na kaipuhan sa paggibo nin paraiso. Sinasadol mi kamo na pilion an Dios bilang Hade asin suportaran an nagliligtas-buhay na gibohon na ipinagigibo nia sa bilog na daga ngonyan. Adalan an Biblia kaiba kan mga Saksi ni Jehova, asin midbidon an Dios na talagang nagmamakolog sa saindo asin matapos sa kasakitan. Sa paaging ini puwede man kamong magin kabtang kan pundasyon kan bagong kinaban. Sa siring kamo may kompiansang makalalaom na magkaigwa kan pag-oyon nin Dios asin mabuhay sagkod lamang sa makangangalas na bagong kinaban na iyan.
[Mga Hapot Para sa Pag-adal]
[Ritrato sa pahina 31]
An mga Saksi ni Jehova igwa nin tunay na internasyonal na kasararoan nin magturugang
[Ritrato sa pahina 32]
An pundasyon kan bagong kinaban nin Dios ginigibo na ngonyan
