Kabtang 9

Kun Paano Niato Naaaraman na Kita Nasa “Huring mga Aldaw”

1, 2. Paano niato maaaraman kun baga kita nasa huring mga aldaw na?

 PAANO niato masisierto na kita nabubuhay sa panahon na an Kahadean nin Dios mahiro tumang sa presenteng palakaw na ini nin paghade nin tawo? Paano niato maaaraman na kita haranihon na sa panahon na tatapuson nin Dios an gabos na karatan asin kasakitan?

² Boot kan mga disipulo ni Jesu-Cristo na maaraman an mga bagay na iyan. Ihinapot ninda sa saiya kun ano an magigin “tanda” kan saiyang presensia sa kapangyarihan kan Kahadean asin kan “pagtatapos kan palakaw nin mga bagay.” (Mateo 24:3) Si Jesus nagsimbag paagi sa pagdetalye kan nakatatanyog sa kinaban na mga pangyayari asin kamugtakan na mag-iiriba sa pagpaheling na an katawohan naglaog na sa “panahon kan katapusan,” “huring mga aldaw” kan palakaw na ini nin mga bagay. (Daniel 11:40; 2 Timoteo 3:1) Naheling na daw niato na nasa siglong ini an may dakol na kabtang na tandang iyan? Iyo nanggad!

Mga Guerra Mundial

3, 4. Paano an mga guerra sa siglong ini tamang-tama sa hula ni Jesus?

³ Ihinula ni Jesus na “an nasyon matindog tumang sa nasyon asin an kahadean tumang sa kahadean.” (Mateo 24:7) Kan 1914 an kinaban napalabot sa sarong guerra na dian inandam sa pakikiguerra an mga nasyon asin kahadean sa paagi na napapalaen sa arin man na guerrang naenot dian. Bilang pagmidbid sa bagay na iyan, an mga historyador kaidto inapod iyan na Dakulang Guerra. Idto an enot na guerrang arog kaidto sa bilog na kasaysayan, an enot na guerra mundial. Mga 20,000,000 na soldados asin sibilyan an nawaran nin buhay, na labi nanggad kisa arin pa man na naenot na guerra.

⁴ An Guerra Mundial I iyo an nagtanda sa kapinonan kan huring mga aldaw. Sinabi ni Jesus na ini asin an iba pang pangyayari magigin “kapinonan nin kasakitan.” (Mateo 24:8) Iyan nagkatotoo, ta an Guerra Mundial II mas nakagagadan pa, na  mga 50,000,000 na soldados asin sibilyan an nawaran kan saindang buhay. Sa ika-20 siglong ini, labing 100,000,000 katawo an nagadan sa mga guerra, labi nin apat na doble sa nagadan kaidtong nakaaging 400 na taon! Kanigoan kadakulang pagkondenar sa paghade nin tawo!

Iba Pang mga Ebidensia

5-7. Ano an iba pang ebidensia na kita nasa huring mga aldaw na?

⁵ May iiniba pa si Jesus na ibang bagay na makadudungan sa huring mga aldaw: “Magkakaigwa nin makokosog na linog, asin sa manlaenlaen na lugar mga peste [mga epidemyang helang] asin pagkulang nin kakanon.” (Lucas 21:11) Tamang-tama iyan sa mga nangyari poon kan 1914, ta nadugangan na marhay an mga kasakitan gikan sa mga kalamidad na iyan.

⁶ An makokosog na linog danay na nangyayari, na minakua nin dakol na buhay. Idto sanang trangkaso Española guminadan sa mga 20,000,000 katawo pakalihis kan Guerra Mundial I​—na an ibang karkulo 30,000,000 o labi pa. An AIDS kuminua nin ginatos na ribong buhay asin puwedeng kumua nin minilyon pa sa haraning ngapit. Taon-taon minilyon an nagagadan sa mga helang sa puso, kanser, asin iba pang helang. Minilyon pa an luway-luway na nagagadan sa gutom. Daing duwa-duwa na an ‘mga parakabayo sa Apocalipsis’ minagadan sa dakol na miembro kan pamilya nin tawo poon kan 1914 paagi sa saindang mga guerra, kakulangan nin kakanon, asin mga epidemyang helang.​—Kapahayagan 6:​3-8.

⁷ Ihinula man ni Jesus an pagdakol nin krimen na nangyayari sa dakol na kadagaan. Sia nagsabi: “Huli sa pag-orog nin katampalasanan an pagkamoot nin dakol malipot.”​—Mateo 24:12.

8. Paano an hula sa 2 Timoteo kapitulo 3 tama sa satong panahon?

⁸ Saro pa, ihinula kan Biblia an pagbagsak nin moral na risang marhay sa bilog na kinaban ngonyan: “Sa huring mga aldaw maabot an delikadong mga panahon na masakit pakibagayan. Huli ta an mga tawo magigin mamomoton sa sainda man sana, mamomoton sa pirak, maabhaw, mapalangkaw, mga paralanghad, masumbikal sa mga magurang, dai tataong magbalos, bakong maimbod, dai nin pagkamoot, dai maoyonan, mga parapakaraot, mayong pagpopogol sa sadiri, maringis, mayong pagkamoot sa karahayan, mga parapasaloib, mga matagas an payo, mga mahambog, mga mamomoton sa kasingawan kisa magin mamomoton sa Dios, na may porma nin diosnon na debosyon alagad nagpapainda sa kapangyarihan kaiyan . . . An mga maraot asin madaya orog na magraraot.” (2 Timoteo 3:​1-13) Iyan gabos naotob sa atubangan mismo kan satong mga mata.

Saro Pang Dahelan

9. Ano an nangyari sa langit na nakadungan kan pagpopoon kan huring mga aldaw digdi sa daga?

⁹ May saro pang dahelan an grabeng pag-orog nin kasakitan sa siglong ini. Kadungan kan kapinonan kan huring mga aldaw kan 1914, may nangyari  na nagbugtak sa katawohan sa orog pang peligro. Kan panahon na idto, arog kan isinasaysay nin hula sa huring libro kan Biblia: “Puminotok an ralaban sa langit: si Miguel [si Cristo na may langitnon na kapangyarihan] asin an saiyang mga anghel nakipaglaban sa dragon [si Satanas], asin an dragon asin an mga anghel kaiyan [an mga demonyo] nakipaglaban alagad ta dai iyan nanggana, ni may nanompongan pa man na lugar para sa sainda sa langit. Kaya ihinolog an dakulang dragon, an enot na halas, an inaapod Diablo asin Satanas, na nandadaya sa bilog na ineerokan na daga; ihinolog sia sa daga, asin an saiyang mga anghel ihinolog sa kaibanan nia.”​—Kapahayagan 12:​7-9.

10, 11. Paano naapektaran an katawohan kan iholog sa daga si Satanas asin an saiyang mga demonyo?

¹⁰ Ano an ibinunga para sa pamilya nin tawo? An hula nagpapadagos: “Herak man kan daga asin kan dagat, huli ta huminilig na dian saindo an Diablo, na may dakulang kaanggotan, sa pakaaram na halipot na sana an saiyang panahon.” Iyo, aram ni Satanas na harani na sa katapusan an saiyang palakaw, kaya ginigibo nia an gabos na paagi na mapatalikod an mga tawo sa Dios bago sia asin an saiyang kinaban haleon. (Kapahayagan 12:12; 20:​1-3) Kanigoan karigsok kan espiritung mga linalang na iyan ta ginamit ninda sa sala an saindang libreng kabotan! Kanigoan kamiserable kan mga kamugtakan sa daga sa irarom kan saindang impluwensia, nangorogna poon kan 1914!

¹¹ Bakong makangangalas na ihinula ni Jesus manongod sa satong panahon: “Sa daga kahandalan nin mga nasyon, na dai naaaraman an gigibohon . . . An mga tawo nalulunosan huli sa takot asin paghalat sa mga bagay na maabot sa ineerokan na daga.”​—Lucas 21:​25, 26.

Harani Na an Katapusan kan Paghade nin mga Tawo Asin Demonyo

12. Ano an saro sa natatada pang mga hula na maootob bago matapos an palakaw na ini?

¹² Pira pang hula sa Biblia an maootob bago laglagon nin Dios an presenteng palakaw? Pipira na sana! An saro sa ultimo yaon sa 1 Tesalonica 5:​3, na nagsasabi: “Mantang sinda nagtataram manongod sa katoninongan asin katiwasayan, sa panale madatong sainda an kalamidad.” (The New English Bible) Ipinaheheling kaini na an katapusan kan palakaw na ini mapoon “mantang sinda nagtataram.” Dai naheheling kan kinaban, an kalaglagan maabot sa panahon na iyan dai linalaoman, na an atension nin mga tawo yaon sa saindang linalaoman na katoninongan asin katiwasayan.

13, 14. Anong panahon nin kasakitan an ihinula ni Jesus, asin paano iyan matatapos?

¹³ Nauubos na an panahon para sa kinaban na ini na nasa irarom kan impluwensia ni Satanas. Sa dai na mahahaloy iyan maabot sa katapusan kaiyan sa panahon nin kariribokan na sinabi ni Jesus: “Sa panahon na iyan magkakaigwa nin dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.”​—Mateo 24:21.

¹⁴ An magigin kulminasyon kan “dakulang kahorasaan” iyo an ralaban nin Dios sa Armagedon. Iyan an panahon na sinabi ni propeta Daniel na an Dios ‘roronoton asin tatapuson an gabos na kahadean na ini.’ Ini mangangahulogan kan katapusan kan gabos na presenteng paghade nin tawo na independiente sa Dios. Dangan an pagsakop kan saiyang Kahadean hale sa langit iyo na an lubos na mamomogol sa gabos na gibo-gibo nin tawo. Nungka pa, an hula ni Daniel, na an kapangyarihan sa pamamahala ipaniniwala sa “ibang banwaan.”​—Daniel 2:44; Kapahayagan 16:​14-16.

15. Ano an mangyayari sa impluwensia ni Satanas asin kan saiyang mga demonyo?

¹⁵ Sa panahon na iyan an gabos na impluwensiang sataniko asin sa demonyo maontok man. An rebeldeng espiritung mga linalang na iyan hahaleon tanganing dai na sinda ‘makadaya sa mga nasyon.’ (Kapahayagan 12:9; 20:​1-3) Sinda sinentensiahan na magadan asin naghahalat na laglagon. Kanigoan na kaginhawahan para sa katawohan na makalda sa saindang nagpaparigsok na impluwensia!

Siisay an Makaliligtas? Siisay an Dai?

16-18. Siisay an makaliligtas sa katapusan kan palakaw na ini, asin siisay an dai?

¹⁶ Kun gibohon na an mga paghokom nin Dios tumang sa kinaban na ini, siisay an makaliligtas? Siisay an dai? Ipinaheheling kan Biblia na an mga  gusto sa paghade nin Dios iingatan asin makaliligtas. An mga habo sa paghade nin Dios dai iingatan kundi lalaglagon kaiba kan kinaban ni Satanas.

¹⁷ An Talinhaga 2:​21, 22 nagsasabi: “An mga matanos [an mga nagpapasakop sa paghade nin Dios] iyo an mag-eerok sa daga, asin an mga daing kanawayan iyo an matatada dian. Kun manongod sa mga maraot [an mga dai nagpapasakop sa paghade nin Dios], sinda popohoon sa daga; asin kun manongod sa mga madaya, sinda hahaleon dian.”

¹⁸ An Salmo 37:​10, 11 nagsasabi man: “Dai na mahahaloy, asin ta an maraot mawawara na . . . Alagad an mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan.” Idinugang pa kan Salmo 37 bersikulo 29: “An mga matanos mismo magmamana kan daga, asin sinda mag-eerok dian sagkod lamang.”

19. Anong hatol an maninigo niatong isapuso?

¹⁹ Maninigong isapuso niato an hatol kan Salmo 37:​34, na nagsasabi: “Maglaom ki Jehova asin otobon an saiyang dalan, asin ika ilalangkaw nia na makasadiri sa daga. Kun pohoon na an mga maraot, maheheling mo iyan.” An Salmo 37 bersikulo 37 asin 38 nagsasabi: “Pagmasdan mo an daing kanawayan asin helingon mo an matanos, huli ta an ngapit kan tawong iyan magigin matoninong. Alagad an mga paralapas tunay na iribang paparaon; an ngapit kan mga maraot tunay na tatapuson.”

20. Taano ta masasabi niato na nakaoogmang mabuhay sa mga panahon na ini?

²⁰ Nakararanga nanggad, iyo, nakapakokosog sa boot na maaraman na an Dios tunay na may pagmakolog asin na sa madali na tatapuson nia an gabos na karatan asin kasakitan! Nakaoogmang maaraman na an kaotoban kan mamuraway na mga hulang iyan kadikit na sanang panahon asin maabot na!

[Mga Hapot Para sa Pag-adal]

[Ritrato sa pahina 20]

Ihinula kan Biblia an mga pangyayari na makompuwesto sa “tanda” kan huring mga aldaw

[Ritrato sa pahina 22]

Sa dai na mahahaloy, sa Armagedon, an mga dai nagpapasakop sa paghade nin Dios popohoon. An mga nagpapasakop makaliligtas pasiring sa matanos na bagong kinaban