Kun Taano ta Itinogot nin Dios an Kasakitan
Kabtang 6
Kun Taano ta Itinogot nin Dios an Kasakitan
1, 2. Paano rinaot kan enot niatong mga magurang an marahay na kapinonan na itinao sa sainda nin Dios?
ANO an nagkadiperensia? Ano an nangyari na nakaraot sa marahay na kapinonan na itinao nin Dios sa enot niatong mga magurang sa Paraiso nin Eden? Taano ta, imbes na katoninongan asin pagkaoroyon sa Paraiso, karatan asin kasakitan an naglakop sa rinibong taon?
2 An dahelan iyo na ginamit ni Adan asin Eva sa salang paagi an saindang libreng kabotan. Nalingawan ninda an bagay na sinda dai linalang na magin mapanggana na siblag sa Dios asin sa saiyang mga ley. Nagdesisyon sindang magin independiente sa Dios, sa paghona na pakakarhayon kaini an saindang buhay. Kaya luminuwas sinda sa ibinugtak nin Dios na mga sagkodan nin libreng kabotan.—Genesis, kapitulo 3.
An Isyu nin Unibersal na Soberaniya
3-5. Taano ta dai na sana linaglag nin Dios si Adan asin Eva dangan nagpoon liwat?
3 Taano ta dai linaglag nin Dios si Adan asin Eva saka nagpoon liwat sa saro pang mag-agom na tawo? Huli ta an saiyang unibersal na soberaniya, an boot sabihon, an saiyang dai mahahaleng diretso na maghade, inangat.
4 An hapot: Siisay an may diretsong maghade, asin kiisay na paghade an tama? An saiyang pagigin makakamhan sa gabos asin Kaglalang kan gabos na linalang nagtatao sa Dios kan diretso na maghade sa sainda. Mantang sia madonong sa gabos, an saiyang paghade iyo an pinakamarahay para sa gabos na linalang. Alagad ta inangat ngonyan an paghade nin Dios. Saro pa, may diperensia daw an saiyang linalang—an tawo? Sisiyasaton niato sa huri kun paano kalabot an isyu sa integridad nin tawo.
5 Sa pagigin independiente nin tawo sa Dios, may saro pang hapot na ipinarisa: Mas marahay daw an magigin kamugtakan nin mga tawo kun dai paghahadean nin Dios? Aram nanggad kan Kaglalang an simbag, pero an seguradong paagi na iyan maaraman nin mga tawo iyo an pagtogot kan biyong katalingkasan na gusto ninda. Pinili ninda an dalan na iyan sa sadiri nindang kabotan, kaya itinogot iyan nin Dios.
6, 7. Taano ta itinogot nin Dios sa mga tawo an lubos na katalingkasan sa haloyon na panahon?
6 Sa pagtao sa mga tawo nin igong panahon na mag-eksperimento sa lubos na katalingkasan, mapatutunayan nin Dios sagkod lamang kun baga mas marahay an kamugtakan nin mga tawo kun sakop kan paghade nin Dios o kun nagsosolo. Asin an panahon na itinao kaipuhan na halawig nin igo tanganing an mga tawo makaabot sa ibinibilang nindang kulminasyon kan saindang politikal, industriyal, sientipiko, asin medikal na mga nagibo.
7 Kun siring, itinao nin Dios sa tawo an bilog na oportunidad sagkod sa satong aldaw na patunayan na dai nin ano man na pagduda na puwedeng magin mapanggana an paghade nin tawo na independiente sa saiya. Kaya nakapamili an tawo sa kabootan asin karingisan, sa pagkamoot asin pagkaongis, sa katanosan asin karatan. Pero napaatubang man saiya an mga resulta kan saiyang pinili: karahayan asin katoninongan o karatan asin kasakitan.
Pagrebelde nin Espiritung mga Linalang
8, 9. (a) Paano nagpoon an pagrebelde sa lugar nin mga espiritu? (b) Siisay pa apuwera ki Adan asin Eva an inimpluwensiahan ni Satanas na magrebelde?
8 May saro pang dapat na konsideraron. An orihinal niatong mga magurang bako sanang iyo an nagrebelde tumang sa paghade nin Dios. Alagad ta siisay pa an nabubuhay kan panahon na idto? Espiritung mga linalang. Bago lalangon nin Dios an mga tawo, naglalang sia nin mas halangkaw na porma nin buhay, dakolon na mga anghel, na mag-iistar sa langitnon na lugar. Sinda man linalang na may libreng kabotan saka nin pangangaipo na pumasakop sa paghade nin Dios.—Job 38:7; Salmo 104:4; Kapahayagan 5:11.
9 Ipinaheheling kan Biblia na an pagrebelde enot na nangyari sa lugar nin mga espiritu. An sarong espiritung linalang boot na magkaigwa nin lubos na katalingkasan. Boot pa ngani nia na sambahon sia nin mga tawo. (Mateo 4:8, 9) An rebeldeng espiritung ini iyo an nag-impluwensia ki Adan asin Eva na magrebelde, na putik na hinihingako na may ipinangunguri an Dios na marahay sa sainda. (Genesis 3:1-5) Kaya inaapod siang Diablo (Parapakaraot) asin Satanas (Kaiwal). Kan huri, inimpluwensiahan nia an ibang espiritung linalang na magrebelde. Sinda inapod na mga demonyo.—Deuteronomio 32:17; Kapahayagan 12:9; 16:14.
10. Ano an ibinunga kan pagrebelde nin mga tawo asin nin espiritung mga linalang?
10 An mga tawo, sa pagrebelde tumang sa Dios, napaimpluwensia ki Satanas asin sa saiyang mga demonyo. Iyan an dahelan na inapod kan Biblia si Satanas na “dios kan palakaw na ini nin mga bagay,” na ‘buminuta sa isip kan mga dai nagtutubod.’ Kaya, an Tataramon nin Dios nagsasabi na “an bilog na kinaban namumugtak sa kapangyarihan kan maraot.” Si Jesus mismo inapod si Satanas na “an poon kan kinaban na ini.”—2 Corinto 4:4; 1 Juan 5:19; Juan 12:31.
Duwang Isyu
11. Mapadapit sa ano pang isyu na inangat ni Satanas an Dios?
11 Pinalataw ni Satanas an saro pang isyu na nag-angat sa Dios. Garo man sana pinagsahotan nia an Dios na nasala sa pagkalalang Nia sa tawo asin na mayo nin magugustong gumibo kan tama kun gigipiton. An totoo, hiningako nia na kun babaloon susumpaon pa ngani ninda an Dios. (Job 2:1-5) Sa paaging ini ibinugtak ni Satanas sa pagduda an integridad kan mga tawong linalang.
12-14. Paano ipahahayag nin panahon an katotoohan manongod sa duwang isyu na pinalataw ni Satanas?
12 Kaya, tinawan nin Dios nin igong panahon na maheling nin gabos na intelihenteng linalang kun paano mareresolberan an isyung ini saka an isyu sa soberaniya nin Dios. (Ikomparar an Exodo 9:16.) An mangyayari sa kasaysayan nin tawo iyo an mapahayag kan katotoohan manongod sa duwang isyung ini.
13 Enot sa gabos, ano daw an ipahahayag nin panahon manongod sa isyu nin unibersal na soberaniya, an pagigin tama kan paghade nin Dios? Kaya daw nin mga tawo na pamahalaan an saindang sadiri nin mas marahay kisa pamamahala nin Dios? An arin man daw na palakaw nin paghade nin tawo na siblag sa Dios makatatao nin maogmang kinaban na mayo nin guerra, krimen, asin inhustisya? Igwa daw nin makahahale sa kadukhaan asin makatatao nin prosperidad sa gabos? May makahahale daw sa kahelangan, paggurang, asin kagadanan? An paghade nin Dios dinisenyo na gibohon gabos iyan.—Genesis 1:26-31.
14 Mapadapit sa ikaduwang isyu, ano daw an ipahahayag kan panahon kun manongod sa halaga nin mga linalang na tawo? Nasala daw an Dios sa paglalang sa tawo nin siring sa ginibo nia? Igwa daw sa sainda nin magibo kan tama kun binabalo? May mga tawo daw na magpapatunay na gusto ninda an paghade nin Dios imbes na an independienteng paghade nin tawo?
[Mga Hapot Para sa Pag-adal]
[Ritrato sa pahina 13]
Itinogot nin Dios an panahon na an mga tawo makaabot sa kulminasyon kan saindang mga ginibo
[Credit Line]
Sasakyan na ida y buwelta sa espasyo: Basado sa retrato kan NASA
