Pinaaaram Kita nin Dios Manongod sa Saiyang mga Katuyohan
Kabtang 4
Pinaaaram Kita nin Dios Manongod sa Saiyang mga Katuyohan
1, 2. Paano niato naaaraman na an Dios nagtatao nin simbag sa mga odok na naghahapot?
AN MAMOMOTON na Dios tunay na nagpapahayag kan saiyang mga katuyohan sa mga odok na naghahanap sa saiya. Sia nagtatao nanggad sa naghahapot na mga tawo nin mga simbag sa mga hapot na arog baga kan kun taano ta itinogot nia an kasakitan.
2 An Biblia nagsasabi: “Kun hanapon mo [an Dios], mapakua sia sa saimo.” “Igwa nin sarong Dios sa kalangitan na iyo an Parapahayag kan mga hilom.” “An Soberanong Kagurangnan na Jehova dai magibo nin ano man sagkod na dai pa nia ikinakapahayag an saiyang hilom sa saiyang mga lingkod na propeta.”—1 Cronica 28:9; Daniel 2:28; Amos 3:7.
Haen an mga Simbag?
3. Saen niato maaaraman kun taano ta itinogot nin Dios an kasakitan?
3 An simbag sa mga hapot na arog kan kun taano ta itinotogot nin Dios an kasakitan asin kun ano an gigibohon nia manongod dian manonompongan sa rekord na ipinasabong nia para sa satong kapakinabangan. An rekord na iyan iyo an saiyang Tataramon, an Banal na Biblia. “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, andam nanggad para sa lambang marahay na gibo.”—2 Timoteo 3:16, 17.
4, 5. Ano an minagibo sa Biblia na pambihirang libro?
4 An Biblia tunay na pambihirang libro. Iyan igwa kan pinakatamang rekord kan kasaysayan nin tawo asin nagsasaysay kan panahon bago pa ngani lalangon an mga tawo. Iyan napapanahon man, ta an mga hula kaiyan may koneksion sa mga pangyayari sa satong panahon asin sa harani man na ngapit.
5 Mayo nin ibang libro na may siring na mga kredensial para sa pagigin tama sa kasaysayan. Halimbawa, pipira sanang manuskrito nin suanoy na mga klasikong parasurat an yaon. Alagad ta yaon an dakol na manuskrito, an iba parsial asin an iba kompleto, kan Biblia: mga 6,000 kan Hebreong Kasuratan (an 39 libro kan “Daan na Tipan”) asin mga 13,000 kan Kristianong Griegong Kasuratan (an 27 libro kan “Bagong Tipan”).
6. Taano ta masisierto niato na an Biblia ngonyan kapareho kaidtong ipinasabong iyan nin Dios?
6 Sinierto kan Makakamhan sa gabos na Dios, na nagpasabong kan Biblia, na napreserbar an tekstuwal na katamaan kaiyan sa manuskritong mga kopyang iyan. Kaya an satong mga Biblia ngonyan kapareho kan orihinal na ipinasabong na mga kasuratan. An saro pang bagay na nakatatabang sato na maapresyar ini iyo na an ibang manuskritong kopya kan Kristianong Griegong Kasuratan kaidto pang mga sanggatos na taon pa sana poon kan isurat an orihinal. An pipirang manuskritong kopya kan suanoy na mga sekular na parasurat na nag-eeksister pa bihirang magkapetsa nin minsan mga pirang siglo man lamang poon kan iyan isurat kan orihinal na mga autor.
Balaog nin Dios
7. Gurano kahiwas kan sirkulasyon kan Biblia?
7 An Biblia iyo an may pinakamahiwas na sirkulasyon na libro sa kasaysayan. Mga tolong bilyon na kopya na an naimprenta. Mayo nin ibang libro na nakararani man lamang sa kabilangan na iyan. Asin an Biblia o an mga kabtang kaiyan ikinasalin na sa mga 2,000 na tataramon. Kaya, kinakarkulo na an 98 porsiento kan populasyon sa satong planeta puwedeng makabasa kan Biblia.
8-10. Ano an pirang dahelan kun taano ta angay na siyasaton niato an Biblia?
8 Tunay na an libro na naghihingakong gikan sa Dios asin igwa kan gabos na panluwas asin panlaog na ebidensia nin pagkamasasarigan angay na siyasaton niato. a Iyan nagpapaliwanag kan katuyohan nin buhay, kan kahulogan kan mga kamugtakan sa kinaban, asin kun ano an natatagama sa ngapit. Mayo nin ibang libro na makagigibo kaiyan.
9 Iyo, an Biblia iyo an pakikomunikar nin Dios sa pamilya nin tawo. Giniyahan nia an pagsurat kaiyan paagi sa saiyang puwersa aktiba, o espiritu, na mga 40 katawo an nagsurat. Kaya an Dios nagtataram sa sato paagi sa saiyang Tataramon, an Banal na Biblia. Si apostol Pablo nagsurat: “Kan akoon nindo an tataramon nin Dios, na nadangog nindo sa samo, iyan inako nindo, bakong siring sa mga tataramon nin tawo, kundi, siring sa iyo man nanggad, siring sa tataramon nin Dios.”—1 Tesalonica 2:13.
10 Si Abraham Lincoln, an ika-16 na presidente kan Estados Unidos, inapod an Biblia na “an pinakamarahay na balaog na itinao nin Dios sa tawo . . . Kun mayo iyan dai niato maaaraman an kalaenan nin tama sa sala.” Kun siring, ano an sinasabi sato kan pinakamarahay na balaog na ini manongod sa kun paano nagpoon an kasakitan, kun taano ta itinogot iyan nin Dios, asin kun ano an gigibohon nia manongod kaiyan?
[Nota sa Ibaba]
a Para sa mas detalyadong impormasyon manongod sa pagkamasasarigan kan Biblia, helingon an librong The Bible—God’s Word or Man’s?, na ipinublikar kaidtong 1989 kan Watchtower Bible and Tract Society of New York, Inc.
[Mga Hapot Para sa Pag-adal]
[Ritrato sa pahina 10]
An Biblia, na ipinasabong nin Dios, iyo an pakikomunikar nin Dios sa pamilya nin tawo
