An mga Ministrong Panbilog na Panahon Nangengenot sa Gibong Paghuhulit

Seguro an enot na Saksi ni Jehova na nagsongko sa saindo sarong panbilog na panahon na ministrong payunir o sarong misyonero. Mantang dai sinisuweldohan an mga ministro sa mga Saksi ni Jehova, tibaad naisip nindo kun paano nagigibo kan mga tawong ini an ministeryo nin bilog na panahon.

Gabos na Saksi ni Jehova na nagdusay asin bautisado ministro, alagad an kadaklan igwa nin pamilya o ibang mga obligasyon na nakaoolang sa sainda sa pagdusay nin labi sa pirang oras serosemana sa saindang ministeryo. Minsan siring, an rinibong Saksi sa bilog na kinaban ibinaba an saindang pamantayan sa pamumuhay tanganing masustentohan ninda an mas kadikit nindang mga gastuson paagi sa trabahong por ora sana dangan idusay an 1,000 oras o labi pa taon-taon sa ministeryo.

Totoo, an panbilog na panahon na mga ministrong payunir daing gayong kuwarta para sa saindang sadiri, alagad para sa sainda ini sarong paagi nin paghanap nguna sa Kahadean nin Dios. Asin sinda nag-aako nin dakol na bendisyon. An pakapakipag-olay sa iba manongod sa Tataramon nin Dios sa laog nin 90 oras o labi pa kada bulan saro na mismong marahay na eksperyensia. An panbilog na panahon na ministro napaooswag an saiyang abilidad sa ministeryo asin igwa man kan panahon na atamanon an mga nagpaheling nin interes. Ini nagbubunga nin nakakapakosog na gayong mga resulta. Igwa sinda kan pangangaipo ninda sa materyal, asin pinahahalagahan na gayo ninda an nasa sainda.—Mateo 6:33.

Kan Pebrero 1943, inestablisar kan Watch Tower Society an Watchtower Bible School of Gilead. An katuyohan tokdoan an eksperyensiadong panbilog na panahon na mga ministrong payunir na maglingkod bilang misyonero sa ibang nasyon. An limang bulan na kurso todo-todong pag-adal sa Biblia, kasaysayan kan Biblia, organisasyon ni Jehova, asin konektadong mga tema bilang preparasyon sa paglilingkod sa ibang nasyon.

An Sosyedad an nagbabayad sa transportasyon pasiring sa destino sa pagmimisyonero asin nagtatao nin masustansiang mga pagkakan asin simpleng istaran sa mga erokan nin misyonero. Iyan nagtatao man sa kada misyonero nin kadikit na  abono para sa personal na mga gastuson. An mga misyonero nagsasarusalida sa pag-asikaso sa harong paagi sa pagsaod, pagluto, asin paglinig. Paagi sa rasonableng pag-asikasong ini an mga misyonero nakakapagdusay nin kisuerra 140 oras kada bulan sa paghuhulit sa harong-harong asin pagkondukta nin mga pag-adal sa Biblia sa mga interesado.

An dakol sa mga misyonerong ini nadedestino sa mga lugar na rinibong milya an rayo sa sadiri nindang harong asin pamilya. Kaipuhan na sinda makibagay sa ibang pamumuhay asin kultura, sa bagong mga ugale sa pagkakan, sa ibang klima, asin sa pagtaram nin ibang lenguahe. Ginigibo ninda ini huli ta sinda namomoot sa mga tawo asin may makosog na pagmawot na tabangan sinda na makanood manongod sa Kahadean nin Dios.

Poon 1943 sagkod 1985, an Watchtower Bible School of Gilead nagkondukta nin 80 klase asin nagsugo nin labing 6,000 na misyonero. Sa pagdirehir kan Sosyedad, an mga ini nangenot sa pagpalakop kan pagtotokdo kan Biblia sa bilog na Aprika, Central asin South America, Oriente, South Pacific, asin dakula an nagibo ninda sa Europa.

Baga man an mga Saksi ni Jehova naggigibo kan ministeryo sa bilog na panahon bilang payunir o misyonero o bakong bilog na panahon, sinda naglilingkod na mayo nin pinansial na ganansia. Ginagasto ninda an sadiri nindang panahon asin kuwarta, asin an saindang sadiri, tanganing tabangan an iba na magkamit kan kaaraman na naggigiya pasiring sa buhay na daing katapusan.—Juan 17:3.

• Paano nahihimo kan iba sa mga Saksi ni Jehova na idusay an bilog nindang panahon sa ministeryo, asin taano ta ginigibo ninda ini?

• Paano tinotokdoan an mga ministro para sa gibong pagmimisyonero?

• Paano sinusustentohan an mga misyonero sa saindang destino sa ibang nasyon?

[Mga ritrato sa pahina 22]

Sa wala: Kuwartong pinag-aadalan sa Gilead School, Brooklyn, N.Y., E.U.A.

Sa too: Misyonero na nagtotokdo kan Tataramon nin Dios sa Papua New Guinea

[Mga ritrato sa pahina 23]

Mga ministrong payunir asin misyonero na naghuhulit kan Tataramon nin Dios sa laen-laen na nasyon

Brazil

Dominican Republic

España

Sierra Leone, Aprika