Mga Kongregasyon Para sa Pagpakosog sa Pagkamoot Asin Pagkasararo

Tibaad nakaatender na kamo sa mga pagtiripon kan kongregasyon kan mga Saksi ni Jehova na harani sa saindong istada. Yaon duman an gabos na klase nin tawo—mga pamilya, daing agom, gurang asin hoben. Sinda gabos sararo sa saindang pagsamba asin interesadong tumabang sa iba.

Sa arin man na areglo na an dakol na tawo boot na magtrabahong may pagkasararo, kaipuhan na may magdirehir. An Dios sarong Dios nin areglo; kaya, an areglong iyan maninigong marisa sa kongregasyon kan saiyang banwaan. Arog kan enot na siglo, ngonyan man, an kuwalipikado, maygurang, asin may kabatidan na Kristianong mga lalaki ninonombrahan na kamagurangan, o mga paraataman. An mga ini an nagdidirehir sa kongregasyon asin nag-aasikaso sa espirituwal na mga pangangaipo kaiyan. Sinda tinatabangan nin iba pang maimbod na mga lalaki na inaapod ministeryal na mga lingkod. An mga lalaking ini daing inaakong suweldo o iba pang pinansial na pakinabang kundi naglilingkod nin boluntaryo, na ginagastusan an sadiri, sa kadaklan hale sa saindang hanapbuhay.—1 Corinto 14:33, 40; Filipos 1:1; 1 Timoteo 3:8, 9.

Paano pinipili an mga ini? Kaipuhan na sinda maimbod na mga lingkod nin Dios na nagpapaheling nin nagkapirang kuwalipikasyon na sono sa Kasuratan. An iba kaini iyo an: pagigin ‘tamang-tama sana sa pag-uugale, marahay an kaisipan, areglado, mapagpasakat, kuwalipikadong magtokdo, asin makatanosan; bakong mamomoton sa pirak; nangangataman sa saiyang pamilya sa marahay na paagi; bakong tawong bagong makombertir; igwa nin marahay na patotoo hale sa mga tawo sa luwas’; ‘marigon na nangangapot sa maimbod na tataramon kun dapit sa abilidad sa pagtokdo.’—1 Timoteo 3:1-15; Tito 1:7-9.

An mga lalaking ini dai iniilehir kan kongregasyon sa katongdan, na an kadaklan dian tibaad bago pa sanang mga Kristiano. Imbes, sinda irenerekomendar nin maygurang asin may kabatidan na mga lalaki na kamagurangan asin igwa nin pagmansay kun gurano naaabot kan mga pinaplanong irekomendar an mga kahagadan sa Kasuratan. Dangan an pagnombra sa kamagurangan asin ministeryal na  mga lingkod ginigibo sa pamamahala kan Namamahalang Grupo nin mga Saksi ni Jehova, na sinusundan an arogan na itinao kan Kristianong kongregasyon kan enot na siglo.

An kamagurangan, o mga paraataman na ini, bakong sarong grupong klero; sinda bakong kagurangnan nin iba. Arog kan sabi ni Jesus, an siisay man na nangengenot kaipuhan na oripon kan gabos. Sa kongregasyon nin mga Saksi ni Jehova, an kamagurangan tunay na mga katabang sa gibohon para sa Kahadean nin Dios.—Mateo 20:26, 27; 23:8-11; Roma 12:8; 1 Corinto 3:5; 4:1, 2; Colosas 4:11; 1 Tesalonica 5:12-14.

Bilang mga paraataman, sinda an nagdidirehir sa pagtotokdo na itinatao sa pagtiripon asin nangengenot sa paghuhulit. An paghuhulit kan maogmang bareta kan Kahadean sa bilog na teritoryong asignado dian sarong pangenot na katuyohan kan kongregasyon. An mga paraataman naglilingkod man bilang mga pastor, na sinosongko an mga miembro kan kongregasyon tanganing pakosogon sinda sono sa pangangaipo.—Mateo 24:14; Gibo 1:8; 1 Tesalonica 2:11, 12; 5:14, 15; 2 Timoteo 2:24-26; Hebreo 13:17; Santiago 5:13-16; 1 Pedro 5:1-4.

An kamagurangan igwa man kan paninimbagan na sagweon asin disiplinahon an siisay man na tibaad naglalakaw sa salang dalan asin nagsasapeligro kan espirituwal asin moral na kalinigan asin pagkasararo kan kongregasyon.—1 Corinto 5:4, 5, 7, 11-13; Tito 1:9; 2:15; 3:10, 11.

An regular na pakikiasosyar sa kongregasyon magtatao saindo nin marahay na pakikipag-iba-iba asin dakol na espirituwal na pakinabang.—Salmo 35:18; 84:10.

• Siisay an nagdidirehir sa gibohon kan indibiduwal na mga kongregasyon?

• Basado sa ano pinipili an mga paraataman?

• Ano an saindang mga paninimbagan?

[Mga ritrato sa pahina 13]

An mga paraataman nagtotokdo sa kongregasyon, nangengenot sa paghuhulit sa harong-harong, nagpapakosog paagi sa mga pagsongko sa pagpastor, nagtatao nin sadol asin pagsagwe kun kaipuhan