Mga Kongregasyon na Inorganisar Para sa Paghuhulit kan Kahadean nin Dios

Kaidtong nasa daga, ihinulit ni Jesu-Cristo an Kahadean nin Dios, na nagduman sa mga baryo-baryo asin sa manlaenlaen na siudad. Tinokdoan man nia asin isinugo an saiyang mga disipulo na gumibo kaiyan. Bago nagsakat sa langit, pinagbotan nia an saiyang mga parasunod na gumibo nin mga disipulo sa mga tawo hale sa gabos na nasyon. Poon sa pagpopoon kaiyan, an enot na Kristianong kongregasyon inorganisar para sa paghuhulit kan maogmang bareta. Saen man magduman an mga disipulo, manonompongan sindang naghuhulit kan Kahadean nin Dios.—Mateo 4:17, 23; 10:1-16; 28:19, 20; Lucas 4:43, 44; 8:1; 10:1-9; Gibo 1:8; 4:31; 5:42; 8:12; 19:8; 28:23, 30, 31; Roma 10:9, 10, 14.

Sa hula ni Jesus manongod sa pagtatapos kan palakaw nin mga bagay, sia nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” An paghuhulit na ini pangenot na paninimbagan kan Kristianong kongregasyon ngonyan.—Mateo 24:14; Marcos 13:10.

Sa bilog na kinaban, an gabos na kongregasyon nin mga Saksi ni Jehova inoorganisar tanganing an saindang lugar malakopan sa sistematikong paagi kan paghuhulit kan maogmang bareta kan Kahadean nin Dios. Tangani iyan na magibo sa aregladong paagi, sa lambang nasyon an sangang opisina kan Watch Tower Society nag-aasignar sa kada kongregasyon nin lugar na huhulitan. Binabangabanga kan kongregasyon an asignadong teritoryong iyan sa mas saradit na parte, na iinaasignar man sa mga magsasaabaga kan paninimbagan na seguradohon na masongko an mga tawo.—1 Corinto 14:33, 40.

Parate na nakakaolay nin mga Saksi an mga tawo paagi sa pagharongharong. Sa mga pagtiripon kan saindang kongregasyon, an mga Saksi ni Jehova tinokdoan na gumibo nin haralipot na pag-aatubang kan mensahe kan Kahadean sa mga tata,  na ginagamit an saindang Biblia. An mga Saksi nagdadara nin mga babasahon sa Biblia na iwawalat sa mga kagharong na boot na magkamit nin orog na kaaraman sa Tataramon nin Dios.

Tanganing matawan an lambang saro sa teritoryo nin oportunidad na makadangog kan mahalagang mensahe kan Kahadean, an mga Saksi nagsasaray nin detalyadong rekord sa saindang pagharongharong, na isinusurat kun saen an harong na mayo nin tawo o an harong na huli sa ano man na dahelan dai nahimong makapagtao nin lubos na patotoo. Gigibohon an pagsongko sa ibang panahon. Kun may nagpaheling nin interes, iyan isinusurat, asin an mga Saksi minabuwelta tanganing magtao nin dugang pang impormasyon sa Kasuratan. Kun boot, gigibohon an regular na pag-adal sa Biblia. Ini gabos ginigibo na daing bayad.

An mga Saksi ni Jehova nag-aalok man nin mga magasin sa mga minaagi sa tinampo. Sa paaging ini nakakaolay ninda an dakol na tibaad dai ninda manonompongan sa harong. Ginigibo an tunay na paghihingoa na mapaabotan an gabos na gustong magdangog.—Gibo 17:17; Kapahayagan 14:6, 7; 22:17.

Taano ta pabalikbalik an mga Saksi mantang an kadaklan dai nagpapaheling nin interes? Naobserbaran na an kamugtakan nin mga tawo parateng nagliliwat asin sinda nagpapaheling nin positibong reaksion sa ibang pagsongko, o tibaad manompongan an ibang miembro kan pamilya na magpapaheling nin interes.

Si Jesus nagsabi sa saiyang mga disipulo: “Kaya padagos na hanapon nguna an kahadean asin an saiyang katanosan.” An paghuhulit kan Kahadean nin Dios may mahalagang kabtang sa satong paghanap nguna sa Kahadean, asin ini ginigibo kan mga Saksi ni Jehova na napakahalagang katuyohan sa saindang buhay.—Mateo 6:33; 2 Timoteo 4:2.

• Anong gibohon ni Jesus asin kan enot na mga Kristiano an ihinula na gigibohon man sa satong panahon?

• Paano inoorganisar an paghuhulit kan mga Saksi ni Jehova?

• Taano an mga Saksi ta pabalikbalik sa pagsongko mantang an kadaklan dai man nagpapaheling nin interes?

[Mga ritrato sa pahina 16, 17]

An mga Saksi ni Jehova na naghuhulit kan Kahadean nin Dios sa laen-laen na nasyon

Thailand

Mejico

Netherlands

Korea

Curaçao

Ghana

Britania

Australia