Nasusuportaran sa Pinansial kan Boluntaryong mga Kontribusyon

An gabos na aktibidad na isinaysay sa enotan suportado nin boluntaryong mga trabahador, sa siring pinabababa an halaga. An ministeryo sa harong-harong asin pagwaras nin mga babasahon boluntaryong ginigibo nin mga Saksi ni Jehova. Sinda an nagbabayad sa sadiri nindang gastos. An kamagurangan na nagdidirehir sa mga kongregasyon, na tinatabangan nin ministeryal na mga lingkod, dai binabayadan para sa saindang mga paglilingkod. Sinda an nagbabayad sa gabos nindang gastos.

Minsan an mga miembro kan Namamahalang Grupo asin an gabos pang iba na bilog na panahon na nagtatrabaho sa pag-andam asin pag-imprenta nin mga Biblia asin babasahon sa Biblia nag-aako sana nin istaran asin pagkakan saka kadikit na abono sa mga nagastos. Iyo man an bilog na panahon na mga nagbibiyaheng paraataman.

Ipinupublikar an satong mga babasahon tanganing tabangan an mga tawo na nagpapaheling nin tunay na interes sa Biblia. An pundamental na mga gastos sa materyales, pag-imprenta, asin pagpadara nababayadan nin boluntaryong mga donasyon nin interesadong mga tawo asin nadudugangan nin mga kontribusyon, pamana, asin iba pa, kan mga Saksi ni Jehova mismo.

Sa gabos na pagtiripon nin mga Saksi ni Jehova, sa lokal man o sa mga asamblea, igwa nin mga kahon nin kontribusyon na yaon para sa mga boot na tumao nin kontribusyon. Daing ginigibong pagkolekta. Mayo nin mga babayadan o tinagba na kaipuhan na itao. Arog kan sinasabi sa Kasuratan, an balang saro puwedeng magkontribuwir siring sa napagdesisyonan sa saiyang puso.—2 Corinto 8:12; 9:7.

• Paano nasusuportaran sa pinansial an gabos na aktibidad kan mga Saksi ni Jehova?