Pag-ogma Asin Pag-omaw sa Dios sa mga Asamblea

Poon pa kan enot na mga taon nin 1880 naheling na kan mga Estudyante sa Biblia na, apuwera sa lokal na mga pagtiripon, magigin kapakipakinabang para sa sainda na makamidbid an saindang mga kapagtubod na tagaibang lugar. Kaya pinonan nindang mag-areglo nin taonan na mga kombension kan mga Estudyante sa Biblia hale sa bilog na Estados Unidos, asin kan huri hale man sa Canada. An mga ini panahon nin espirituwal na pagkakan; sa laog nin pirang aldaw itinatao an dakol na pagtotokdo sa Biblia asin an gabos nakakaeksperyensia nin makaoogmang pagriribayan nin pagpakosog. An pagbautismo sa bagong mga nagturubod nagin regular na kabtang nin mga kombension. An mga kombension ginamit man tanganing magtao nin mas mahiwas na patotoo sa publiko.—Roma 1:11, 12.

Ngonyan an mga Saksi ni Jehova igwa nin regular na mga asamblea. Parate na an mga 18 sagkod sa 25 kongregasyon pinagsasararo sa inaapod na sirkito, na sinosongko, o pinaglilingkodan, nin nagbibiyaheng mga paraataman. Duwang beses kada taon, iinaareglo an mga asamblea na dian an mga kongregasyon sa sarong sirkito, o kabtang kan sirkitong iyan, nagtitiripon sa Sabado asin/o Domingo.

Sarong beses kada taon, an mas darakulang tolo- o apat-na-aldaw na mga kombension, na inaapod pandistritong mga kombension, iinaareglo sa lambang nasyon, na dian puwedeng magkatiripon an rinibo sa sarong lugar. An mga kombension na ini nagtatao nin espirituwal na pagpakosog para sa mga Saksi ni Jehova asin iba pang interesado sa saindang gibohon, asin iyan nagtatao man nin patotoo sa publiko.

An programa para sa mga asamblea asin kombension na ini inaandam kan Namamahalang Grupo nin mga Saksi ni Jehova asin ibinabasar sa mga pangangaipo kan mga Saksi sa bilog na kinaban. Iyan mga pahayag, orolay, asin totoo-sa-buhay na mga pag-aatubang na inaapod demonstrasyon, na iinaatubang nin nagbibiyaheng mga paraataman asin kuwalipikadong mga Saksi hale sa mga kongregasyon. An nagkapira nagsasaysay man nin mga eksperyensia kun paano ninda inaatubang an angat na mamuhay bilang Kristiano sa sarong daing dios na kinaban o kun ano an mga resulta na nakakamtan ninda sa ministeryo. Sa pandistritong mga kombension igwa nin dagdag na kabtang—buhay na mga presentasyon sa porma nin drama sa Biblia o drama sa modernong aldaw, na nagpapaheling kun paano inaatubang nin mga Kristiano an mga problema ngonyan.

Itinatagama man an mga pagkakan asin meryenda. Ini nagtatao nin lugar sa makaoogmang asosasyon kun mayo nin sesyon. An gabos na trabahong kalabot sa mga okasyon na ini ginigibo nin mga boluntaryo hale sa tahaw kan mga Saksi ni Jehova. An gastos sa pasilidad asin iba pang binabayadan hale sa boluntaryong mga donasyon. Libre an pag-atender, asin mayo nin ginigibong pagkolekta.

Puwede nindong aramon sa lokal na kongregasyon nin mga Saksi ni Jehova kun noarin asin saen nakaiskedyul an mga pagtiripon na ini sa saindong lugar. Itatao man an impormasyon manongod sa ano man na areglo sa pagbiyahe, saka kun paano makakakua nin dadagusan.

An mga asamblea asin kombension na ini nakatatabang sa mga Saksi ni Jehova asin sa gabos na nakikiasosyar sa sainda na bako sanang an saindang lokal na kongregasyon an maheling asin maapresyar man an bilog na kasararoan kan saindang mga tugang sa kinaban.—1 Pedro 2:17.

• Anong mga pakinabang an nakamtan kan enot na mga Estudyante sa Biblia sa saindang mga kombension?

• Isaysay an areglo asin programa para sa mga pansirkitong asamblea asin pandistritong kombension.

 [Mga ritrato sa pahina 18]

Drama sa Biblia sa pandistritong kombension, Estados Unidos

Internasyonal na kombension, sa Polandia

Internasyonal na kombension, sa Argentina

Pansirkitong asamblea, sa Hapon

Mga delegadong minakua nin babasahon sa Biblia, Switzerland

Bautismo sa internasyonal na kombension, sa South Africa

Pagluwas nin bagong babasahon sa Biblia, sa Canada

An mga delegado sa kombension nag-aarawit, sa España