Paggibo nin mga Babasahon sa Biblia sa Pag-omaw sa Dios

An mga Saksi ni Jehova midbid huli sa saindang paghuhulit kan Kahadean nin Dios paagi sa mga babasahon. Poon 1920 ginamit na kan Watch Tower Society an boluntaryong mga trabahador sa mga Saksi tanganing mag-imprenta nin mga magasin asin libro para ikawaras. Ini tanganing makaseguro sa masasarigan na pag-imprenta nin babasahon sa pinakahababang halaga.

Sa laog nin mga 60 taon, pinaoswag asin pinahiwas kan Sosyedad an pag-imprenta nin mga babasahon sa Biblia, primero sa Brooklyn dangan sa ibang nasyon. An gabos na trabaho ginibo nin nagdadakol na mga boluntaryo.

Kan mga huring taon nin 1970 an tradisyonal na mga paagi nin paggibo asin pag-imprenta nin mga letra hinahale tanganing salidahan nin computer processing, phototypesetting, asin offset printing. An problema digdi iyo na limitado sana an kabilangan nin mga tataramon na kayang gibohon nin komersial na mga makina. Minsan siring, mga 160 tataramon na an ginagamit kan Sosyedad sa paggibo nin babasahon, asin kaipuhan an mas dakol pa.

Kaya, inapod an mga boluntaryo tanganing gumibo nin multilanguage electronic phototypesetting system. Nakaoogma an resulta. Nagibo an kinakaipuhan na teknikal na progreso, asin nagibo an text-entry, composition, asin phototypesetting system, na inaapod MEPS. Kaya kaini an haros 200 na tataramon. Puwede pang dagdagan.

Ngonyan an text entry asin graphics units nin MEPS, na ginibo kan mga Saksi ni Jehova, ginagamit sa 25 nasyon, asin may dagdag pang pinaplano. An mga boluntaryong trabahador hale sa mga nasyon na ini tinokdoan na gumamit asin mag-asikaso sa makinang ini. An Sosyedad ngonyan nag-iimprenta nin magasin sa labing 100 na tataramon sa 36 na nasyon, asin sa 5 kan mga nasyon na ini ginigibo man an mga libro asin Biblia.

Kaipuhan an mga tawo tanganing magibo an trabahong ini—mga parasurat, parasalin, proofreader, paraimprenta, paragibo nin libro, asin trabahador sa pagpaktura. An iba kaipuhan man na mag-asikaso kan pakipagkomunikar sa mga  kongregasyon. An iba nagtatrabaho sa pagprodusir nin pagkakan, an iba nagluluto, naglilinig, naglalaba asin namamalantsa, saka iba pa. Ini gabos ginigibo nin boluntaryong mga trabahador na nagpepresentar kan saindang sadiri sa laen-laen na nasyon. Sa bilog na kinaban kaidtong 1985, may 8,438 boluntaryong trabahador na naglingkod sa laen-laen na opisina, pabrika, erokan asin farm.

Sairisay an mga tawong ini? Sinda mga lalaki asin babae, daing agom asin may agom, hoben asin gurang, gabos nagdusay na Saksi ni Jehova. An iba 40, 50, asin 60 anyos na sa trabahong ini. Sa promedyo kisuerra 44 oras an ginagamit ninda sa saindang trabaho serosemana, na may ekstrang oras kun kaipuhan. An mga banggi asin katapusan nin semana idinudusay sa paghuhulit kan maogmang bareta sa harong-harong, asin iba pang aktibidad kan kongregasyon.

Sa bilog na kinaban an mga trabahador na ini tinatawan nin simpleng erokan asin pagkakan sa saro kan mga erokan kan Sosyedad, na inaapod Bethel Home. Dugang pa sinda nag-aako nin kadikit na abono para sa mga pagbiyahe ninda sa saindang ministeryo asin sa personal na mga pangangaipo.

Poon kan 1920, an boluntaryong mga trabahador na ini nakapag-imprenta nin labing nuwebe bilyones na Biblia, libro, magasin, asin pampleta sa mga 200 na tataramon tanganing ikawaras sa bilog na kinaban. Ginigibo ninda an saindang kabtang tanganing an daing katapusan na maogmang bareta ikapahayag bilang nakaoogmang bareta sa lambang nasyon asin tribo asin tataramon patin banwaan.—Kapahayagan 14:6, 7.

• Anong mga imprentahan igwa an Watch Tower Society, asin taano?

• Sairisay an nagtatrabaho sa gabos na ini, asin paano sinda nabubuhay?

[Mga ritrato sa pahina 24]

Mga boluntaryo na naggigibo nin mga trabaho na may koneksion sa paggibo nin mga babasahon sa Biblia sa pabrika, erokan, opisina, asin farm, sa Brooklyn asin sa Wallkill, Nueva York, E.U.A.

[Mga ritrato sa pahina 25]

Mga boluntaryo na naggigibo nin laen-laen na trabaho na direkta o bakong direktang konektado sa paggibo nin mga Biblia asin babasahon sa Biblia

España

Alemania

Finland

Canada

Denmark

Sweden

South Africa

Brazil

Netherlands

Australia