Pinaglalamag Huli sa Katanosan

Tibaad madangog nindo sa mga kaamigo asin paryentes na an mga Saksi ni Jehova nagkakaproblema sa ley, na sinda prohibido nin ibang gobyerno, o na sinda maraot na mga tawo. Taano ta may arog kaining magkakakontrang komento manongod sa sainda?

Ini bakong huli ta an mga Saksi daing paggalang sa ley kundi huli ta sinda nagsusunod sa lakad ni Jesus. Sinabihan ni Jesus an saiyang mga disipulo na tutuyaon sinda nin mga tawo, paglalamagon sinda, asin may kaputikan na magtataram kan gabos na klaseng karatan tumang sa sainda. Ini huli ta an pangenot na kaiwal nin Dios, si Satanas, iyo an dios kan kinaban na ini, asin boot nia na patalikodon an mga tawo sa paglilingkod sa Dios.—Mateo 5:10-12; 10:16-22, 34-39; 24:9, 10; Juan 15:17–16:3; 2 Timoteo 3:12; 1 Pedro 5:8; Kapahayagan 12:17.

Kan an mga apostol dakopon asin darahon sa hokoman, idto bakong huli ta sinda mga kriminal, madahas, o sedisyonista. Idto huli ta sinda naghuhulit kan maogmang bareta. Kan iapelar ni apostol Pablo an saiyang kaso sa mas halangkaw na mga hokoman, idto tanganing ipagdepensa asin legal na ikaestablisar an diretso nin mga Kristiano na maghulit kan maogmang bareta.—Gibo 4:18-20; 5:28-32; Filipos 1:7.

Ngonyan, an mga Saksi ni Jehova mga Kristianong makinuyog sa ley na nagbabayad kan saindang mga buhis asin nagpapaheling nin paggalang sa mga nasa autoridad. Itinatao ninda ki Cesar an mga bagay na ki Cesar asin sa Dios an mga bagay na sa Dios. Kun igwa man sinda nin dai pagkakaoyon sa ano man na autoridad nin gobyerno, iyan huli ta dai minimidbid kan gobyerno an saindang paghuhulit, o huli sa saindang paninindogan na neutral sa mga nangyayari sa pag-oltanan nin mga nasyon. Alagad digdi an mga Saksi ni Jehova kaipuhan na manindogan arog kan mga apostol, na nagsabi: “Kami kaipuhan na magkuyog sa Dios bilang poon ki sa mga tawo.”—Gibo 5:29; Marcos 12:17; Juan 18:36; Tito 3:1, 2.

An mga Saksi ni Jehova dai naghahanap na paglamagon kundi mas bobooton nindang mamuhay nin toninong asin trangkilo. Minsan siring, kun huli sa pagkuyog ninda sa pagboot nin Dios asin sa halimbawa ni Jesu-Cristo sinda pinaglalamag, naoogma sindang tagalan iyan.—Mateo 5:10-12; Gibo 5:40, 41; 1 Corinto 4:12; 1 Timoteo 2:2; 1 Pedro 3:14, 15; 4:12-16.

• Taano ta tinutuya asin pinaglalamag an mga lingkod ni Jehova?

• Taano an mga Saksi ni Jehova ta kun minsan dai nakakaoyon nin mga autoridad nin gobyerno, arog kan Kristianong mga apostol?

• Ano an punto-de-vista nin mga lingkod ni Jehova sa paglamag?

[Mga ritrato sa pahina 29]

Si Jesus iinatubang ki Pilato asin si apostol Pablo nabilanggo huli sa paghuhulit kan Kahadean nin Dios