Tinitipon Asin Sinasangkapan ni Jehova an Saiyang Banwaan Para sa Gibohon

Sa nag-aging mga siglo, an apostasiya nakalakop sa bilog na daga. An dakol na denominasyon kan mga iglesya igwa nin pirang katokdoan sa Biblia alagad sa pangenot nagkuyog sa mga tradisyon nin mga tawo asin sa dakol na kaugalean na gikan sa pagano. An paghalat sa pagbuwelta ni Cristo sa kadaklan natahoban.—Ikomparar an Mateo 13:24-30, 37-43.

Minsan siring, si Jesus nagsabi na magbantay para sa saiyang pagbuwelta! An sarong grupo na naggigibo kaini yaon kaidto sa Allegheny, Pennsylvania, E.U.A. Kan enot na mga taon nin 1870 si Charles Taze Russell asin an nagkapira sa saiyang mga katood pinonan an lubos, daing denominasyon na pag-adal sa Biblia mapadapit sa pagbuwelta ni Cristo. Pinonan man nindang hanapon an katotoohan kan Biblia manongod sa dakol na iba pang pundamental na mga katokdoan. Ini an kapinonan kan mga gibohon kan mga Saksi ni Jehova sa modernong aldaw.—Mateo 24:42.

Nasabotan kan grupong ini na an doktrina nin Trinidad bakong sono sa Biblia kundi na si Jehova an solamenteng makakamhan sa gabos na Dios asin Kaglalang; si Jesu-Cristo iyo an Saiyang enot na linalang asin bugtong na Aki; asin an banal na espiritu bakong persona kundi an dai naheheling na puwersa aktiba nin Dios. Nasabotan kan grupong ini na an kalag bakong daing kagadanan kundi magagadanon, na an paglaom para sa mga gadan pagkabuhay liwat, asin na an padusa sa daing pagsolsol na karatan bakong daing sagkod na pasakit kundi pagkapara.

An pagtao ni Jesus kan saiyang buhay bilang pantubos para sa katawohan nasabotan na sarong pundamental na katokdoan sa Biblia. Primero, an 144,000 na lalaki asin babae, na pinili poon kan enot na siglo sagkod sa satong panahon, babalukaton hale sa daga tanganing magin kairibang paramana ni Cristo sa langitnon na Kahadean. Dangan paagi sa pantubos ni Jesus an binilyon na katawohan, na an kadaklan bubuhayon liwat hale sa mga gadan, makaaabot sa pagkasangkap nin tawo na may paglaom na mabuhay nin daing katapusan sa daga sakop kan Kahadean.

Nasabotan man ni Russell asin kan saiyang kairiba na an presensia ni Cristo dai maheheling, sa espiritu. An Mga Panahon nin mga Hentil, na sa laog kan panahon na iyan an soberaniya nin Dios dai ipahahayag paagi sa arin man na gobyerno digdi sa daga, matatapos sa 1914. Dangan an Kahadean nin Dios patitindogon sa langit. An mga katokdoan na ini midbid na sa mga Saksi ni Jehova ngonyan.

Ipinahayag ni Russell asin kan saiyang kairiba an mga katotoohan na ini paagi sa mga pahayag asin babasahon. Kan Hulyo 1879 pinonan na ipublikar ni Russell an Zion’s Watch Tower (na ngonyan inaapod na The Watchtower). Nagdesisyon sia na an paghuhulit kan mga Estudyante sa Biblia maninigong biyong magsarig sa boluntaryong mga donasyon asin na daing gigibohon na pagkolekta. Siring man, an mensahe maninigong ilakop paagi sa dai binabayadan, boluntaryong mga paghihingoa kan mga nagtubod. Si Russell mismo nagdonar hale sa natipon nia sa negosyo sagkod kan panahon na idto.

An mga Estudyante sa Biblia nagtiripon sa mga klase, na apod kaidto sa saindang mga kongregasyon. Nagtiripon sinda sagkod sa tolong beses kada semana, para sa mga pahayag, pag-adal sa Kasuratan, asin katiriponan sa testimonyo. Regular sindang nagpili nin responsableng mga lalaki bilang kamagurangan na magdidirehir sa espirituwal na mga gibohon kan kada klase.

Kan 1884 an Zion’s Watch Tower Tract Society nainkorporar sa Pennsylvania  bilang sarong korporasyon na bakong sa pagnegosyo. Kaipuhan na pilion taon-taon an sarong presidente kan korporasyon. Ini nagtao nin legal na instrumento, na dai nasasarig sa buhay nin siisay man na indibiduwal, tanganing iabante an gibong pagtotokdo kan Biblia. Si Charles T. Russell napiling presidente, asin an saiyang opisina ibinilang na opisina prinsipal.

Ginibo an dakulang mga paghihingoa na darahon an gibohon sa ibang nasyon. Iyan nakaabot sa Canada asin Inglaterra kan enot na mga taon nin 1880. Kan 1891 linibot ni Russell an Europa asin Tahaw na Sirangan tanganing helingon kun ano an magigibo tanganing orog na ikalakop an katotoohan duman. Kan enot na mga taon nin 1900, an mga sangang opisina kan Sosyedad naestablisar sa Britania, Alemania, asin Australia.

Kan 1909 an opisina prinsipal kan Watch Tower Society ibinalyo sa Brooklyn, Nueva York, tanganing mas ikalakop an paghuhulit sa laen-laen na nasyon. Kinaipuhan na gumibo nin asosyadong korporasyon sa irarom kan ley kan Estado nin Nueva York, na ngonyan midbid bilang an Watchtower Bible and Tract Society of New York, Inc. Kan 1914 an International Bible Students Association ginibo sa Londres, Inglaterra, tanganing mapaoswag an mga aktibidad kan mga Estudyante sa Biblia sa bilog na British Commonwealth. Sa ngonyan mga 70 korporasyon asin asosasyon na ginibong legal sa dakol na nasyon sa bilog na kinaban an nag-ootob sa mga katuyohan kan Watch Tower Society. An gabos pilantropiko, na suportado nin boluntaryong mga donasyon asin boluntaryong mga trabahador.

Kan 1916 nagadan si Charles Taze Russell, asin si Joseph Franklin Rutherford an suminalihid sa saiya bilang presidente kan Watch Tower Society. Kan huring mga taon nin Guerra Mundial I, an mga Estudyante sa Biblia nabalong gayo nin paglamag, na natapos sa bakong makatanosan na pagkabilanggo nin walong tugang na naglilingkod sa responsableng mga katongdan sa opisina prinsipal kan Sosyedad sa Amerika. Garo baga namemeligro an gibohon kan mga Estudyante sa Biblia. Minsan siring, kan 1919 an mga tugang na ini pinaluwas asin ipinahayag na daing kasalan, asin nagpoon kaidto an mas mahiwas na pag-oswag kan paghuhulit.

Paagi sa opisina prinsipal kan Sosyedad, an sararong grupo nin linahidan na Kristianong mga Estudyante sa Biblia nagpadagos na magtagama nin espirituwal na kakanon sa igong panahon para sa gabos na asosyado sa organisasyon. Kun paanong an kongregasyon nin linahidan na mga Kristiano kan enot na siglo iyo an “maimbod asin madonong na oripon” na isinabi ni Jesus, an linahidan man na grupo nin nagdusay na mga Estudyante sa Biblia, na naggigibo kan gibohon sa Kahadean, iyo an minakompuwesto sa “maimbod asin madonong na oripon” sa satong panahon. Sa pagdatong ni Jesus tanganing siyasaton an kongregasyon, nanompongan nia an grupong ini na nagtatagama nin kakanon para sa mga katabang kan harong; sa siring iyan ninombrahan nia na mamahala sa gabos niang rogaring.—Mateo 24:45-47; Lucas 12:42.

Dai nahaloy pakalihis kan Guerra Mundial I, malinaw na naheling na an Kahadean nin Dios paagi ki Cristo Jesus napatindog na sa kalangitan kan 1914. Kaya an mga tataramon ni Jesus puwede na ngonyan na magkaigwa nin lubos na kaotoban: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”  Si Joseph F. Rutherford an nangenot na an mensaheng ini kan Kahadean ikapaabot sa mas dakol pa.—Mateo 24:14.

Kaya, an Sosyedad nagdesisyon na iyo na mismo an mag-imprenta na ginagamit an nagdusay na boluntaryong mga trabahador, tanganing maseguro an daing ontok na paggibo nin mga babasahon sa Biblia sa pinakahababang halaga. An gabos na Estudyante sa Biblia sinadol na regular na makikabtang sa paghuhulit kan maogmang bareta kan Kahadean. An pagbrodkast sa radyo nin mga pahayag sa Biblia ginamit sa nagkapirang nasyon.

Bago kan 1918 nasabotan kan mga Estudyante sa Biblia na an katuyohan ninda sa paghuhulit tiponon an mga natatada pa sa mga pinili na makaibanan ni Cristo Jesus sa langit asin patanidan an kinaban manongod sa nagdadangadang na paghokom nin Dios. Daing gayo tinawan nin atension an pagtipon sa mga maliligtas sa katapusan kan presenteng maraot na palakaw tanganing mag-erok sa daga. Dangan poon kan 1918 padagos an pahayag na “An Minilyon na Nabubuhay Ngonyan Puwedeng Dai na Noarin Man Magadan!” itinao sa dakol na lugar.

Kan 1923 an pag-adal sa parabola ni Jesus manongod sa mga karnero asin kanding sa Mateo 25:31-46 nagpaheling na bago an Armagedon an mamomoton sa katanosan na mga tawo na bakong para sa langitnon na Kahadean magkakamit man kan pag-oyon nin Dios asin makaliligtas sa Armagedon. Kan 1935 an orog pang pag-adal nagpaheling na an mga arog-karnerong ini iyo man sana an dakula, daing kabilangan na kadaklan nin mga tawo na sinasabi sa Kapahayagan 7:9-17. An mga ini titiponon hale sa gabos na nasyon asin magkakaigwa kan paglaom na makaligtas sa Dakulang Kahorasaan asin magkamit nin buhay na daing katapusan sa daga. An pakasabot na ini nagtao nin makosog na motibasyon sa paghuhulit.—Juan 10:16.

Kan 1931 pormal na inako kan mga Estudyante sa Biblia an ngaran na Mga Saksi ni Jehova. Bago kaidto sinda midbid bilang mga Estudyante sa Biblia, Internasyonal na mga Estudyante sa Biblia, mga nagpapahayag kan Millennial Dawn, asin mga taga-Watch Tower. Binansagan pa ngani sindang Russellites asin Rutherfordites. Mayo sa mga ngaran na ini an nagpapamidbid sa sainda nin tama. Minsan ngani an ngaran na Kristiano, na itinao sa mga disipulo ni Jesus sa paggiya nin Dios kan enot na siglo, tunay na tama  man, iyan ginagamit man nin dakol na grupo na nagsusunod sa falsong mga katokdoan. Tanganing ipalaen an saindang sadiri sa minilyon na Kristiano sa ngaran sana, kaipuhan na may ngaran na magpapamidbid nanggad sa tunay na mga parasunod ni Cristo sa panahon na ini.

An pagsiyasat sa Kasuratan nagpaliwanag na kun paanong inapod ni Jehova an saiyang banwaan na Israel na saiyang mga saksi, siring man an saiyang banwaan sa pagtatapos kan palakaw nin mga bagay, na dusay sa pagpahayag kan saiyang ngaran asin katuyohan, maninigong apodon na mga Saksi ni Jehova. An ngaran na ini tamang ipinalaen an tunay na Kristianong mga parasamba ki Jehova sa gabos na iba na naghihingakong Kristiano ngonyan.—Salmo 83:18; Isaias 43:10-12.

Kan 1942, kaidtong Guerra Mundial II, si Joseph F. Rutherford nagadan, asin si Nathan H. Knorr an suminalihid sa saiya bilang presidente kan Watch Tower Society. Nasabotan na ngonyan na an mga hula malinaw na nagpaparisa na magkakaigwa nin panahon nin limitadong katoninongan asin katalingkasan pakaguerra na matogot sa dakulang paglakop kan paghuhulit bago matapos an palakaw na ini. Kan Pebrero 1943 an Watchtower Bible School of Gilead inestablisar tanganing tokdoan an panbilog na panahon na mga ministro para sa pagmimisyonero sa ibang mga nasyon. Sa nahuhuring mga bulan kan taon na idto, idinugang an espesyal na programa nin pagtotokdo para sa pagmiministro sa semanal na iskedyul nin pagtiripon kan mga Saksi ni Jehova.

Kan 1950 pinonan na iluwas kan Sosyedad an mga kabtang kan New World Translation of the Holy Scriptures, nasa modernong Ingles na traduksion kan Biblia hale sa tekstong nasa orihinal na tataramon. An tama sa pagkatradusir, madaling masabotan na Bibliang ini, na ginibo sa hababang halaga sa mga imprentahan kan Sosyedad, nagin dakulang tabang sa paghuhulit. Sagkod ngonyan, labing 40 milyones na kopya an ikinapublikar na sa 11 tataramon.

Kan katapusan nin 1985, labi nang tolong milyon na Saksi ni Jehova an nakikikabtang sa paghuhulit sa labing 200 na kadagaan asin isla. Para sa Memorial kan kagadanan ni Cristo, an katiriponan na may pinakadakol na nag-atender sa arin man na ginibo sa saindang 49,716 na kongregasyon kan 1985, 7,792,109 gabos an presente.

Na talagang ginagamit nin Dios an mga Saksi ni Jehova maheheling sa saindang pagpapadagos na aktibo sa paglilingkod sa saiya, sa saindang pagkasararo sa bilog na kinaban, sa saindang kaigotan sa pagdepensa sa ngaran ni Jehova asin paghuhulit kan saiyang Kahadean, sa saindang malinig na mga pamantayan sa moral, sa saindang pag-ako sa bilog na Biblia bilang an dai nasasalang Tataramon nin Dios, asin sa saindang katalingkasan sa superstisyon asin espiritismo.

An minasunod na mga kabtang nagpapaliwanag kun paano kamo makikinabang sa pagbabalik na ini sa tunay na pagsamba sa Dios.

• Anong pundamental na mga katokdoan sa Biblia an nagpapalaen kan mga Estudyante sa Biblia sa mga denominasyon nin iglesya?

• Anong mga pag-oswag sa organisasyon an inagihan kan mga Estudyante sa Biblia sagkod kan 1918?

• Paano masasabi na an grupo nin linahidan na mga Estudyante sa Biblia minakompuwesto sa “maimbod asin madonong na oripon” sa Mateo 24:45-47?

• Anong pakasabot sa katuyohan nin Dios an nagtao nin makosog na motibasyon sa pagpahiwas kan paghuhulit?

• Anong katuyohan an naootob kan ngaran na Mga Saksi ni Jehova?

• Ano an mga ebidensia na talagang ginagamit nin Dios an mga Saksi ni Jehova?

[Mga ritrato sa pahina 8]

Si C. T. Russell kan 1879

An luwas na Hulyo 1879

Enot na Grupo nin mga Estudyante sa Biblia, Pittsburgh, Pa.

[Mga ritrato sa pahina 9]

Opisina prinsipal, 1889-1909, Pittsburgh, Pa.

Mayor na mga opisina, 1909-1918, Brooklyn, N.Y.

Erokan sa opisina prinsipal, poon 1909-1926, Brooklyn, N.Y.

[Mga ritrato sa pahina 10]

An pankinaban na opisina prinsipal nin mga Saksi ni Jehova, Brooklyn, Nueva York, E.U.A.

Sa itaas, sa wala: Opisina

Sa itaas, sa too: Mga edipisyong erokan

Sa ibaba, sa wala: Pabrika

Sa ibaba, sa too: Sentro nin pagpaktura

[Mga ritrato sa pahina 11]

Pagbrodkast sa radyo ni J. F. Rutherford

An enot na rotary press kan Watchtower Society, na ginagamit nin mga boluntaryo

An New World Translation kan Biblia, na ngonyan ipinupublikar sa 11 tataramon