Ano Gusto Nindong Makaaram Pa nin Orog Manongod sa Biblia?

 Taano ta Dapat Basahon an Biblia?

AN Biblia laen sa arin man na ibang libro​—yaon dian an mamomoton na pagtotokdo nin Dios. (1 Tesalonica 2:13) Kun saindong iaaplikar an itinotokdo kan Biblia, makikinabang kamo nin dakula. Madudugangan nindo an saindong pagkamoot sa Dios asin mapaparani kamo sa saiya, an Paratao kan “lambang marahay na balaog asin lambang sangkap na regalo.” (Santiago 1:17) Makakanood kamo kun paano madolok sa saiya sa pamibi. Sa mga panahon nin kapurisawan, maeeksperyensiahan nindo an tabang nin Dios. Kun iooyon nindo an saindong buhay sa mga pamantayan na sinasabi sa Biblia, tatawan kamo nin Dios nin buhay na daing katapusan.​—Roma 6:23.

An Biblia may mga katotoohan na nagtatao nin kaliwanagan. An mga nagkakamit nin kaaraman sa Biblia nakatatalingkas sa mga salang paghona na nagdodominar sa buhay nin minilyon. Halimbawa, an pakaaram kan katotoohan manongod sa nangyayari pagkagadan niato ilinilibre kita sa takot na puede kitang gibohan nin maraot kan mga gadan o na nagdudusa an nagadan niatong mga paryente asin katood. (Ezequiel 18:4) An katokdoan kan Biblia manongod sa pagkabuhay liwat nagtatao nin karangahan sa mga nagadanan nin mga namomotan. (Juan 11:25) An pakaaram kan katotoohan manongod sa maraot na mga anghel nag-aabiso  sa sato sa mga peligro nin espiritismo asin tinatabangan kitang masabotan kun taano ta kadakol kan problema sa daga.

An diosnon na mga prinsipyo sa Biblia nagtotokdo sa sato kun paano mamumuhay sa paagi na nagtatao nin pisikal na mga pakinabang. Halimbawa, an pagigin “tamang-tama sana sa mga pag-uugale” nakakokontribwir sa marahay na salud. (1 Timoteo 3:2) Paagi sa ‘pagpakalinig niato sa lambang ramog nin laman asin espiritu,’ nalilikayan niatong danyaran an satong salud. (2 Corinto 7:1) An pag-aplikar kan hatol nin Dios na yaon sa Biblia nagpapaoswag man nin kaogmahan sa pag-agom asin paggalang sa sadiri.​—1 Corinto 6:18.

Kun iinaaplikar nindo an Tataramon nin Dios, kamo magigin mas maogma. An kaaraman sa Biblia nakatatabang sa sato na makanompong nin katoninongan nin isip asin pagkakontento saka nagtatao sa sato nin paglaom. Tinatabangan kita kaiyan na mapatalubo an nakaaakit na mga kualidad na arog baga kan pakikidamay, pagkamoot, kagayagayahan, katoninongan, kabootan, asin pagtubod. (Galacia 5:​22, 23; Efeso 4:​24, 32) An siring na mga kualidad nakatatabang na kita magin mas marahay na agom na lalaki o babae, ama o ina, aking lalaki o babae.

 Ano napag-isip-isip na nindo an ngapit? An mga hula kan Biblia nagtotokdo sa sato kun saen na kita sa sulog nin panahon. An mga hulang ini bako sanang nagsasabi kan mga kamugtakan sa kinaban ngonyan kundi nagtotokdo man an mga iyan na madali nang gibohon nin Dios na paraiso an daga.​​—Kapahayagan 21:​3, 4.

Tabang na Masabotan an Biblia

Tibaad prinobaran na nindong basahon an Biblia alagad nasakitan kamong saboton iyan. Tibaad dai nindo aram kun saen hahanapon sa Biblia an simbag sa saindong mga hapot. Kun iyo, bako sana kamo an siring. Kita gabos nagkakaipo nin tabang na masabotan an Tataramon nin Dios. An Mga Saksi ni Jehova, sa mga 235 kadagaan, nagtatao nin daing bayad na pagtotokdo sa Biblia sa minilyon na tawo. Maoogma sindang tabangan man kamo.

Parate na pinakamarahay na progresibong adalan an Biblia, poon sa pundamental na mga katokdoan. (Hebreo 6:1) Mantang kamo nagpapadagos, mas makakaya nindong ilaog sa isip an “matagas na kakanon”​—an boot sabihon, mas harararom na katotoohan. (Hebreo 5:14) An Biblia an autoridad. An mga publikasyon na basado sa Biblia, arog baga kan libro na Ano Man Nanggad an Itinotokdo kan Biblia?, matabang sa saindo na masabotan an teksto sa Kasuratan manongod sa laen-laen na tema.

 Andam daw Kamong Magtao nin Panahon Serosemana sa Pagsabot sa Biblia?

Parate na puedeng iareglo an pag-adal sa Biblia sa oras asin lugar na kombenyente para sa saindo. An dakol nag-aadal sa harong mismo ninda. An nagkapira ngani nag-aadal paagi sa telepono. An programa sa pag-adal bakong sarong klase na dakol an tawo kundi pribadong areglo na ibinagay sa personal nindong kamugtakan, pati sa grado kan saindong kaaraman asin inadalan. Mayo nin mga eksaminasyon, asin dai kamo susupogon. Masisimbag an mga hapot nindo sa Biblia, asin makakanood kamo kun paano marani sa Dios.

Dai nindo kaipuhan na bayadan an siring na pag-adal sa Biblia. (Mateo 10:8) Iinaalok iyan nin daing bayad sa mga tawong gabos na klase an relihion asin sa mga mayo nin relihion alagad odok na interesado na madugangan an saindang kaaraman sa Tataramon nin Dios.

Siisay an puedeng makikabtang sa orolay? An bilog nindong pamilya. Puede man na makikabtang an siisay man na katood na gusto nindong imbitaran. O kun gusto nindo, puedeng kamo sana an kaolay.

An dakol nagtatagama nin sarong oras serosemana na mag-adal sa Biblia. Kun kaya nindong tumao nin mas dakol na oras o kun mas kadikit an oras nindo kada semana, an mga Saksi magibo nin paagi na matabangan kamo.

 Imbitasyon na Makanood

Iniimbitaran niamo kamo na kontakon an Mga Saksi ni Jehova. An sarong paagi na magigibo nindo ini iyo an pagsurat sa sarong adres na nasa ibaba. Dangan gigibohon an areglo na may mamayo sa daing bayad na pakipag-adal sa saindo sa Biblia.

□ Interesado akong magkaigwa nin kopya kan libro na Ano Man Nanggad an Itinotokdo kan Biblia?

□ Tabi na kontakon ako may labot sa daing bayad na pag-adal sa Biblia.

Laen sana kun may ibang tanda, an gabos na kotasyon sa Biblia trinadusir hale sa Ingles na New World Translation of the Holy Scriptures.