Leksion 16

An Saindong Desisyon na Maglingkod sa Dios

Ano an dapat nindong gibohon tanganing magin katood nin Dios? (1, 2)

Paano nindo ginigibo an saindong pagdusay sa Dios? (1)

Noarin kamo maninigong pabautismo? (2)

Paano nindo makakamtan an kosog na makapagdanay na fiel sa Dios? (3)

1. Tanganing magin katood nin Dios, dapat na kamo magkaigwa nin dakol-dakol na kaaraman sa katotoohan kan Biblia (1 Timoteo 2:​3, 4), tumubod sa mga bagay na saindong nanodan (Hebreo 11:6), magsolsol sa saindong mga kasalan (Gibo 17:​30, 31), asin magbakle sa saindong pamumuhay. (Gibo 3:19) Dangan an saindong pagkamoot sa Dios maninigong magpahiro sa saindo na idusay an saindong sadiri sa saiya. Ini nangangahulogan na sa sarong personal, pribadong pamibi sasabihon nindo sa saiya na itinatao na nindo an saindong sadiri sa saiya tanganing gibohon an saiyang kabotan.​—Mateo 16:​24; 22:37.

2. Pagkapagdusay nindo sa Dios, kamo maninigong bautismohan. (Mateo 28:​19, 20) Ipinaaaram kan bautismo sa gabos na kamo nagdusay na kan saindong sadiri ki Jehova. Kaya an bautismo para sana duman sa nasa tama nang edad na magdesisyon na maglingkod sa Dios. Kun an saro binabautismohan, an bilog niang hawak maninigong ilubog sa tubig sa kadikit na panahon. a​—Marcos 1:​9, 10; Gibo 8:36.

3. Pakapagdusay nindo, lalaoman kamo ni Jehova na mamuhay sono sa saindong panuga. (Salmo 50:​14; Eclesiastes 5:​4, 5) Pagmamaigotan kan Diablo na papondohon kamo sa paglilingkod ki Jehova. (1 Pedro 5:8) Alagad ta rumani kamo sa Dios sa pamibi. (Filipos 4:​6, 7) Adalan an saiyang Tataramon aroaldaw. (Salmo 1:​1-3) Magdanay na dayupot sa kongregasyon. (Hebreo 13:17) Paagi sa paggibo kaini gabos, makakamit nindo an kosog na makapagdanay na fiel sa Dios. Sa siring magigibo nindo an mga kahagadan sa saindo nin Dios sagkod lamang!

[Nota sa Ibaba]