Leksion 6

Ano an Kahadean nin Dios?

Saen namumugtak an Kahadean nin Dios? (1)

Siisay an Hade kaiyan? (2)

May iba daw na makikakabtang sa pamamahala kaiba kan Hade? Kun igwa, pira? (3)

Ano an nagpapaheling na nabubuhay kita sa huring mga aldaw? (4)

Ano an gigibohon kan Kahadean nin Dios para sa katawohan sa ngapit? (5-7)

1. Kan sia yaon digdi sa daga, tinokdoan ni Jesus an saiyang mga parasunod na mamibi para sa Kahadean nin Dios. An kahadean sarong gobyerno na pinamamayohan nin sarong hade. An Kahadean nin Dios sarong espesyal na gobyerno. Iyan tinindog sa langit asin mamamahala sa dagang ini. Papakangbanalon kaiyan an ngaran nin Dios. Papangyayarihon kaiyan na gibohon an kabotan nin Dios digdi sa daga kun paanong iyan ginigibo sa langit.​—Mateo 6:​9, 10.

2. Ipinanuga nin Dios na si Jesus an magigin Hade sa Saiyang Kahadean. (Lucas 1:​30-33) Kan si Jesus yaon digdi sa daga, pinatunayan nia na sia magigin maboot, makatanosan, asin sangkap na Namamahala. Kan sia bumuelta sa langit, dai sia tolos-tolos pinatukaw sa trono bilang Hade sa Kahadean nin Dios. (Hebreo 10:​12, 13) Kan 1914, itinao ni Jehova ki Jesus an autoridad na ipinanuga Nia sa saiya. Poon kaidto, si Jesus namahala sa langit bilang Hade na nombrado ni Jehova.​—Daniel 7:​13, 14.

3. Puminili man si Jehova nin nagkapirang fiel na lalaki asin babae sa daga na magduman sa langit. Sinda mamamahala kaiba ni Jesus bilang mga hade, hokom, asin saserdote sa katawohan. (Lucas 22:​28-30; Kapahayagan 5:​9, 10) Inapod ni Jesus na “sadangoton na aripompon” an kairibang mamamahala na ini sa saiyang Kahadean. Sinda may kabilangan na 144,000.​—Lucas 12:​32; Kapahayagan 14:​1-3.

4. Kan oras na magin Hade si Jesus, iinapon nia si Satanas asin an maraot na mga anghel kaini hale sa langit asin pasiring sa namumugtakan kan daga. Iyan an dahelan na nagin maraoton an kamugtakan nin mga bagay digdi sa daga poon kan 1914. (Kapahayagan 12:​9, 12) Mga guerra, gutom, peste, naggagrabeng katampalasanan​—ini gabos kabtang nin sarong “tanda” na nagpaparisa  na si Jesus namamahala asin na nasa huring mga aldaw na kaiyan an palakaw na ini.​—Mateo 24:​3, 7, 8, 12; Lucas 21:​10, 11; 2 Timoteo 3:​1-5.

5. Dai na mahahaloy hohokoman ni Jesus an mga tawo, na binubulagbulag sinda kun paanong ibinubulag nin pastor an mga karnero sa mga kanding. An “mga karnero” iyo an mga nagpatunay na sinda maimbod niang mga sakop. Sinda mag-aako nin buhay na daing katapusan digdi sa daga. An “mga kanding” iyo an mga nagsikwal sa Kahadean nin Dios. (Mateo 25:​31-34, 46) Sa harani nang ngapit, lalaglagon ni Jesus an gabos na arog-kanding. (2 Tesalonica 1:​6-9) Kun gusto nindong magin saro sa “mga karnero” ni Jesus, dapat kamong maghinanyog sa mensahe kan Kahadean asin humiro oyon sa saindong nanonodan.​—Mateo 24:14.

6. Ngonyan baranga an daga sa dakol na nasyon. An lambang saro may sadiring gobyerno. An mga nasyon na ini parateng nagraralabanlaban. Alagad ta sasalidahan kan Kahadean nin Dios an gabos na gobyerno nin tawo. Iyan mamamahala bilang an solamenteng gobyerno sa enterong daga. (Daniel 2:44) Dangan mawawara na an guerra, krimen, asin kadahasan. An gabos na tawo mag-eerok na iriba na may katoninongan asin pagkasararo.​—Miqueas 4:​3, 4.

7. Sa panahon kan Sangribong Taon na Paghade ni Jesus, an fiel na mga tawo magigin sangkap, asin an bilog na daga magigin paraiso. Sa katapusan kan sangribong taon, nagibo na ni Jesus an gabos na ipinagibo sa saiya nin Dios. Dangan ieentrega nia an Kahadean sa saiyang Ama. (1 Corinto 15:24) Taano ta dai sabihan an saindong mga katood asin namomotan manongod sa gigibohon kan Kahadean nin Dios?

[Ritrato sa pahina 13]

Sa pamamahala ni Jesus, mawawara na an pagkaongis o prehuwisyo