Leksion 5

Ano an Katuyohan nin Dios Para sa Daga?

Taano ta linalang ni Jehova an daga? (1, 2)

Taano an daga ta bakong paraiso ngonyan? (3)

Ano an mangyayari sa maraot na mga tawo? (4)

Sa ngapit, ano an gigibohon ni Jesus para sa mga naghehelang? mga gurang? mga gadan? (5, 6)

Tanganing makapakikabtang sa mga bendisyon sa ngapit, ano an kaipuhan nindong gibohon? (7)

1. Linalang ni Jehova an dagang ini tanganing an mga tawo magayagayang mabuhay dian sagkod lamang. Boot nia na an daga perming pag-erokan nin matanos, maogmang mga tawo. (Salmo 115:​16; Isaias 45:18) An daga nungka na malalaglag; iyan magdadanay sagkod lamang.​—Salmo 104:​5; Eclesiastes 1:4.

2. Bago ginibo nin Dios an tawo, puminili Sia nin sarong sadit na kabtang kan daga asin ginibo iyan na magin magayon na paraiso. Inapod nia iyan na tatamnan nin Eden. Digdi nia ibinugtak an enot na lalaki asin babae, si Adan asin Eva. Katuyohan nin Dios na sinda magkaaki asin panoon ninda an bilog na daga. Luway-luway kutana na gigibohon nindang magin paraiso an enterong daga.​—Genesis 1:​28; 2:​8, 15.

3. Nagkasala si Adan asin Eva paagi sa tuyong paglapas sa ley nin Dios. Kaya pinaluwas sinda ni Jehova sa tatamnan nin Eden. Nawara an paraiso. (Genesis 3:​1-6, 23) Alagad ta dai liningawan ni Jehova an saiyang katuyohan para sa dagang ini. Sia nanunuga na gibohon iyan na magin paraiso, na dian mabubuhay sagkod lamang an mga tawo. Paano nia gigibohon ini?​—Salmo 37:29.

4. Bago magin paraiso an dagang ini, kaipuhan na haleon an maraot na mga tawo. (Salmo 37:38) Ini mangyayari sa Armagedon, na iyo an ralaban nin Dios sa pagtapos sa karatan. Sunod, ibibilanggo si Satanas sa laog nin 1,000 taon. Ini nangangahulogan na mayo nin itatadang mga maraot tanganing manraot sa daga. Solamente banwaan nin Dios an makaliligtas.​—Kapahayagan 16:​14, 16; 20:​1-3.

5. Dangan mamamahala si Jesu-Cristo  bilang Hade sa dagang ini sa laog nin 1,000 taon. (Kapahayagan 20:6) Luway-luway niang hahaleon an kasalan sa satong isip asin hawak. Kita magigin sangkap na mga tawo arog ni Adan asin Eva bago sinda nagkasala. Dangan mawawara na an helang, paggurang, asin kagadanan. Maoomayan an mga may helang, asin mahoben liwat an mga gurang.​—Job 33:​25; Isaias 33:​24; Kapahayagan 21:​3, 4.

6. Sa panahon kan Sangribong Taon na Paghade ni Jesus, an fiel na mga tawo magtatrabaho tanganing gibohon na paraiso an bilog na daga. (Lucas 23:43) Siring man, minilyon na gadan an bubuhayon liwat bilang tawo digdi sa daga. (Gibo 24:15) Kun gigibohon ninda an kahagadan sa sainda nin Dios, sinda magpapadagos na mabuhay digdi sa daga sagkod lamang. Kun dai, sinda lalaglagon sagkod lamang.​—Juan 5:​28, 29; Kapahayagan 20:​11-15.

7. Sa siring magigin mapanggana an orihinal na katuyohan nin Dios para sa daga. Boot daw nindong makikabtang sa mga bendisyon na ini sa ngapit? Kun iyo, kaipuhan na padagos kamong mag-adal manongod ki Jehova asin kumuyog sa saiyang mga kahagadan. An pag-atender sa mga pagtiripon sa lokal na Kingdom Hall kan Mga Saksi ni Jehova makatatabang sa saindo na magibo iyan.​—Isaias 11:​9; Hebreo 10:​24, 25.

[Ritrato sa pahina 10]

Nawarang paraiso

[Mga ritrato sa pahina 11]

Pakalihis kan Armagedon, an daga gigibohon na magin paraiso