Leksion 14

Kun Paano Inoorganisar an Mga Saksi ni Jehova

Kasuarin nagpoon sa modernong aldaw an Mga Saksi ni Jehova? (1)

Paano ginigibo an mga pagtiripon kan Mga Saksi ni Jehova? (2)

Paano naaasikaso an mga gastos? (3)

Siisay an nangengenot sa lambang kongregasyon? (4)

Anong mas darakulang pagtiripon an ginigibo kada taon? (5)

Ano an ginigibong trabaho sa saindang opisina prinsipal asin mga sangang opisina? (6)

1. An Mga Saksi ni Jehova nagpoon sa modernong aldaw kaidtong mga taon nin 1870. Kan primero, sinda inapod na Mga Estudyante sa Biblia. Alagad kan 1931 inako ninda an Makakasuratan na ngaran na Mga Saksi ni Jehova. (Isaias 43:10) Poon sa saradit na kapinonan an organisasyon duminakula sagkod na magin minilyon na Saksi, na sibot na naghuhulit sa labing 230 kadagaan.

2. An kadaklan na kongregasyon nin Mga Saksi ni Jehova may pagtiripon tolong beses kada semana. Imbitado kamong umatender sa arin man sa mga ini. (Hebreo 10:​24, 25) An Biblia an basihan sa itinotokdo. An pagtiripon pinoponan asin tinatapos nin pamibi. Inaawit man sa kadaklan na pagtiripon an odok sa pusong “espirituwal na mga awit.” (Efeso 5:​18, 19) Mayo nin bayad an paglaog, asin mayo nin pangongolekta.​—Mateo 10:8.

3. An kadaklan na kongregasyon nagtitiripon sa sarong Kingdom Hall. Sa parate an mga ini simpleng mga edipisyo na itinogdok nin boluntaryong mga Saksi. Mayo kamong maheheling na ano man na imahen, krus, o mga bagay na arog kaini sa Kingdom Hall. An mga gastos binabayadan nin boluntad na mga donasyon. Para sa mga gustong magdonar, igwa nin  kahon nin kontribusyon.​—2 Corinto 9:7.

4. Sa kada kongregasyon, igwa nin mga magurang, o paraataman. Sinda an nangengenot sa pagtotokdo sa kongregasyon. (1 Timoteo 3:​1-7; 5:17) Tinatabangan sinda nin ministeryal na mga lingkod. (1 Timoteo 3:​8-10, 12, 13) An mga lalaking ini bakong mas halangkaw sa ibang miembro kan kongregasyon. (2 Corinto 1:24) Dai sinda tinatawan nin espesyal na mga titulo. (Mateo 23:​8-10) An gubing ninda dai napapalaen sa iba. Dai man sinda binabayadan para sa saindang gibohon. An mga magurang gikan sa boot na nag-aasikaso sa espirituwal na mga pangangaipo kan kongregasyon. Sinda makatatao nin pagranga asin paggiya sa mga panahon nin kadepisilan.​—Santiago 5:​14-16; 1 Pedro 5:​2, 3.

5. An Mga Saksi ni Jehova nagkakaigwa man nin darakulang asamblea o kombension kada taon. Sa mga panahon na ini dakol na kongregasyon an nagtitiripon para sa sarong espesyal na programa nin pagtotokdo sa Biblia. An pagbautismo sa bagong mga disipulo regular na kabtang kan kada programa sa asamblea o kombension.​—Mateo 3:​13-17; 28:​19, 20.

6. An pankinaban na opisina prinsipal kan Mga Saksi ni Jehova yaon sa Nueva York. Yaon duman an Namamahalang Grupo, na nagdidirehir na grupo nin eksperyensiadong mga magurang na nangangataman sa pambilog na kinaban na kongregasyon. Igwa man nin labing 100 na sangang opisina sa bilog na kinaban. Sa mga lugar na ini, an mga boluntaryo nagtatabang sa pag-imprenta asin pagpadara nin mga literatura sa Biblia. Itinatao man an pagdirehir sa pag-organisar kan gibong paghuhulit. Taano ta dai magplanong songkoon an sangang opisina na pinakaharani sa saindo?