Leksion 13

Paano Nindo Manonompongan an Tunay na Relihion?

Ikinaoogma daw nin Dios an gabos na relihion, o saro sana? (1)

Taano ta kadakol kan relihion na naghihingakong Kristiano? (2)

Paano nindo mamimidbid an tunay na mga Kristiano? (3-7)

1. Pinonan ni Jesus an sarong tunay na Kristianong relihion. Kaya ngonyan segurado na saro sana an grupo nin tunay na mga nagsasamba ki Jehova Dios. (Juan 4:​23, 24; Efeso 4:​4, 5) Itinotokdo kan Biblia na pipira sana an nasa hayakpit na dalan pasiring sa buhay.​—Mateo 7:​13, 14.

2. Ihinula kan Biblia na pagkagadan kan mga apostol, an salang mga katokdoan asin mga gibong bakong sa Kristiano luway-luway na makalalaog sa Kristianong kongregasyon. Guguyodon nin mga tawo an mga nagtutubod na sumunod sa sainda imbes na ki Cristo. (Mateo 7:​15, 21-23; Gibo 20:​29, 30) Iyan an dahelan na naheheling niato an kadakol na laen-laen na relihion na naghihingakong Kristiano. Paano niato mamimidbid an tunay na mga Kristiano?

3. An pinakalataw na tanda nin tunay na mga Kristiano iyo na sinda may tunay na pagkaminorootmootan. (Juan 13:​34, 35) Dai sinda tinotokdoan na isipon na sinda mas marahay kisa sa mga iba an rasa o kolor nin kublit. Ni tinotokdoan man sinda na ikaongis an mga tagaibang nasyon. (Gibo 10:​34, 35) Kaya dai sinda nakikakabtang sa mga guerra. An tunay na mga Kristiano tinatrato an lambang saro na magturugang.​—1 Juan 4:​20, 21.

4. An saro pang tanda nin tunay na relihion iyo na an mga miembro kaiyan may hararom na paggalang sa Biblia. Inaako ninda iyan bilang an Tataramon nin Dios asin tinutubod an sinasabi kaiyan. (Juan 17:​17; 2 Timoteo 3:​16, 17) Ibinibilang ninda an Tataramon nin Dios na mas mahalaga kisa sa mga ideya o kostumbre nin mga tawo. (Mateo 15:​1-3, 7-9) Hinihingoa nindang mamuhay sono sa Biblia sa saindang pan-aroaldaw na buhay. Kaya dai sinda naghuhulit  nin sarong bagay dangan iba man an ginigibo.​—Tito 1:​15, 16.

5. An tunay na relihion dapat man na magtao nin onra sa ngaran nin Dios. (Mateo 6:9) Ipinamidbid ni Jesus sa iba an ngaran nin Dios na Jehova. Dapat na arog man kaiyan an gibohon nin tunay na mga Kristiano. (Juan 17:​6, 26; Roma 10:​13, 14) Sairisay sa saindong komunidad an nagsasabi sa iba manongod sa ngaran nin Dios?

6. An tunay na mga Kristiano dapat na maghulit manongod sa Kahadean nin Dios. Iyan ginibo ni Jesus. Permi siang nagtaram manongod sa Kahadean. (Lucas 8:1) Pinagbotan nia an saiyang mga disipulo na ihulit man an mensaheng ini sa bilog na daga. (Mateo 24:​14; 28:​19, 20) An tunay na mga Kristiano nagtutubod na solamente an Kahadean nin Dios an magtatao nin tunay na katoninongan asin katiwasayan sa dagang ini.​—Salmo 146:​3-5.

7. An mga disipulo ni Jesus dapat na bakong kabtang kan maraot na kinaban na ini. (Juan 17:16) Dai sinda nakilalabot sa politikal na mga aktibidad asin sosyal na mga kontrobersia kan kinaban na ini. Linilikayan ninda an nakadadanyar na gawe, mga gibo, asin kaisipan na uso sa kinaban. (Santiago 1:​27; 4:4) May midbid daw kamong relihiosong grupo sa saindong komunidad na igwa kan mga tandang ini nin tunay na Kristianismo?

[Mga ritrato sa pahina 26, 27]

An tunay na mga Kristiano nagkakaminootan, iginagalang an Biblia, asin naghuhulit manongod sa Kahadean nin Dios