Leksion 7

Pagrani sa Dios sa Pamibi

Taano ta mahalaga na mamibi nin dayaday? (1)

Kiisay kita maninigong mamibi, asin paano? (2, 3)

Ano an tamang mga tema para sa pamibi? (4)

Noarin kamo maninigong mamibi? (5, 6)

Hinihinanyog daw nin Dios an gabos na pamibi? (7)

1. An pamibi mapakumbabang pakikipag-olay sa Dios. Maninigo kamong mamibi sa Dios nin dayaday. Sa siring magigin kamong dayupot sa saiya arog sa namomotan na katood. Si Jehova dakulaon asin makapangyarihan na marhay, pero hinihinanyog nia an satong mga pamibi! Kamo daw dayaday na namimibi sa Dios?​—Salmo 65:​2; 1 Tesalonica 5:17.

2. An pamibi kabtang kan satong pagsamba. Sa siring, kita maninigong mamibi sana sa Dios, si Jehova. Kan si Jesus yaon digdi  sa daga, sia perming namibi sa saiyang Ama, bakong sa kiisay pa man na iba. Maninigo na arog man kaiyan an gibohon niato. (Mateo 4:​10; 6:9) Minsan siring, an gabos niatong pamibi maninigong sa ngaran ni Jesus. Ipinaheheling kaini na iginagalang niato an katongdan ni Jesus asin na kita may pagtubod sa saiyang pantubos na atang.​—Juan 14:​6; 1 Juan 2:​1, 2.

3. Kun kita namimibi maninigo kitang makipag-olay sa Dios gikan sa satong puso. Dai niato maninigong tuomon an satong mga pamibi o basahon iyan sa librong pamibian. (Mateo 6:​7, 8) Puede kitang mamibi sa ano man na may paggalang na posisyon, sa ano man na oras, asin sa ano man na lugar. Nadadangog nin Dios minsan an silensiong mga pamibi sa satong puso. (1 Samuel 1:​12, 13) Marahay na humanap nin toninong na lugar na harayo sa ibang tawo para sa satong personal na mga pamimibi.​—Marcos 1:35.

4. Anong mga tema an puede nindong ipamibi? An ano man na tibaad makaapektar sa saindong pakikikatood sa saiya. (Filipos 4:​6, 7) Ipinaheheling kan modelong pamibi na maninigo kitang mamibi manongod sa ngaran asin katuyohan ni Jehova. Puede man niatong hagadon na itao an satong materyal na mga pangangaipo, patawadon an satong mga kasalan, asin an tabang na labanan an sugot. (Mateo 6:​9-13) An satong mga pamibi maninigo na bakong paslo. Maninigo na ipamibi sana niato an mga bagay na kaoyon sa kabotan nin Dios.​—1 Juan 5:14.

5. Puede kamong mamibi ano man na oras na pahiroon kamo kan saindong puso na pasalamatan o omawon an Dios. (1 Cronica 29:​10-13) Maninigo kamong mamibi kun kamo may mga problema asin binabalo an saindong pagtubod. (Salmo 55:​22; 120:1) Angay na mamibi bago kamo magkakan. (Mateo 14:19) Inaagda kita ni Jehova na mamibi “sa gabos na panahon.”​—Efeso 6:18.

6. Nangorognang kaipuhan kitang mamibi kun kita nakaginibo nin magabat na kasalan. Sa siring na mga panahon maninigo na makimaherak kita para sa pagkaherak asin pagpatawad ni Jehova. Kun itutuga niato sa saiya an satong mga kasalan asin gigibohon niato an bilog niatong makakaya na dai na iyan otrohon, an Dios “andam na magpatawad.”​—Salmo 86:​5; Talinhaga 28:13.

7. An hinihinanyog sana ni Jehova mga pamibi nin matanos na mga tawo. Tanganing dangogon nin Dios an saindong mga pamibi, dapat na ginigibo nindo an bilog nindong makakaya na mamuhay sono sa saiyang mga ley. (Talinhaga 15:​29; 28:9) Kaipuhan na kamo mapakumbaba kun kamo namimibi. (Lucas 18:​9-14) Kaipuhan na kamo naghihingoa sono sa saindong ipinamimibi. Sa siring mapatutunayan nindo na kamo may pagtubod asin na talagang isinasaboot nindo an saindong sinasabi. Saka sana sisimbagon ni Jehova an saindong mga pamibi.​—Hebreo 11:6.