Leksion 15

Pagtabang sa Iba na Gumibo kan Kabotan nin Dios

Taano ta maninigong isabi nindo sa iba an saindong nanonodan? (1)

Kiisay nindo ikahihiras an maogmang bareta? (2)

Ano an puedeng magin epekto sa iba kan saindong gawe? (2)

Noarin kamo puedeng maghulit kaiba kan kongregasyon? (3)

1. Kadakol na kan marahay na bagay na nanodan nindo ngonyan sa Biblia. An kaaraman na ini maninigong gumiya sa pagkultibar nindo nin Kristianong pagkatawo. (Efeso 4:​22-24) Kaipuhan an siring na kaaraman tangani na kamo magkamit nin buhay na daing sagkod. (Juan 17:3) Minsan siring, an iba kaipuhan man na makadangog kan maogmang bareta tangani na sinda man maligtas. An gabos na tunay na Kristiano dapat na magpatotoo sa iba. Iyan pagboot nin Dios.—Roma 10:​10; 1 Corinto 9:​16; 1 Timoteo 4:16.

2. Puede kamong pumoon paagi sa paghiras kan marahay na mga bagay na saindong nanonodan sa mga harani sa saindo. Isabi iyan sa saindong pamilya, mga katood, kaklase, asin katrabaho. Magin maboot asin pasensioso mantang ginigibo nindo iyan. (2 Timoteo 2:​24, 25) Girumdoma na parate na mas pinagmamasdan nin mga tawo an gawe nin saro kisa sa hinihinanyog an saiyang sinasabi. Kaya an marahay nindong gawe tibaad makaagyat sa iba na maghinanyog sa mensaheng sinasabi nindo sa sainda.​—Mateo 5:​16; 1 Pedro 3:​1, 2, 16.

3. Pag-abot nin panahon, tibaad makualipikar na kamong pumoon na maghulit kaiba kan lokal na kongregasyon nin Mga Saksi ni Jehova. Ini mahalagang tangga sa saindong pag-oswag. (Mateo 24:14) Kanigoan na kagayagayahan kun may matabangan kamo na magin lingkod ni Jehova asin magkamit nin buhay na daing sagkod!​—1 Tesalonica 2:​19, 20.