Leksion 2

Siisay an Dios?

Siisay an tunay na Dios, asin ano an saiyang ngaran? (1, 2)

Anong klase an saiyang hawak? (3)

Ano an saiyang lataw na mga kualidad? (4)

Maninigo daw kitang gumamit nin mga imahen asin simbolo sa pagsamba niato sa saiya? (5)

Ano an duwang paagi na kita puedeng makanood manongod sa Dios? (6)

1. Dakol na bagay an sinasamba nin mga tawo. Alagad sinasabi sato kan Biblia na saro sana an TUNAY na Dios. Linalang nia an gabos na bagay sa langit asin digdi sa daga. Huli ta tinawan nia kita nin buhay, sia an solamenteng Saro na maninigo niatong sambahon.​—1 Corinto 8:​5, 6; Kapahayagan 4:11.

2. An Dios dakol an titulo alagad saro sana an ngaran. An ngaran na iyan JEHOVA. Sa kadaklan na Biblia, an ngaran nin Dios hinale asin sinalidahan kan mga titulong KAGURANGNAN o DIOS. Alagad kan isurat an Biblia, an ngaran na Jehova naglataw dian nin mga 7,000 na beses!​—Exodo 3:​15; Salmo 83:18.

3. Si Jehova may hawak, alagad iyan bakong kapareho kan hawak niato. “An Dios Espiritu,” an sabi kan Biblia. (Juan 4:24) An espiritu sarong klase nin buhay na halangkaw  na marhay kisa sa buhay niato. Mayo nin tawo na nakaheling sa Dios kasuarin pa man. Si Jehova nag-eerok sa langit, alagad naheheling nia an gabos na bagay. (Salmo 11:​4, 5; Juan 1:18) Pero, ano an banal na espiritu? Iyan bakong persona na arog nin Dios. Imbes, iyan an puersa aktiba nin Dios.​—Salmo 104:30.

4. Ihinahayag sa sato kan Biblia an personalidad ni Jehova. Ipinaheheling kaiyan na an saiyang lataw na mga kualidad iyo an pagkamoot, hustisya, kadonongan, asin kapangyarihan. (Deuteronomio 32:​4; Job 12:​13; Isaias 40:​26; 1 Juan 4:8) Sinasabi sa sato kan Biblia na sia maheherakon man, maboot, mapagpatawad, matinao, asin pasensioso. Kita, siring sa makinuyog na mga aki, maninigong maghingoa na arogon sia.​—Efeso 5:​1, 2.

5. Maninigo daw kitang humuruhod o mamibi sa mga imahen, retrato, o simbolo sa satong pagsamba? Dai! (Exodo 20:​4, 5) Sinasabi ni Jehova na dapat na sia sana an sambahon niato. Dai nia ihihiras an saiyang kamurawayan sa siisay man o sa ano pa man. An mga imahen mayo nin kapangyarihan na tumabang sa sato.​—Salmo 115:​4-8; Isaias 42:8.

6. Paano niato orog na mamimidbid an Dios? An sarong paagi iyo an pagmasid sa mga linalang nia asin hararom na pag-isip-isip sa sinasabi kaiyan sa sato. An mga linalang nin Dios nagpapaheling sa sato na sia may dakulang kapangyarihan asin kadonongan. Naheheling niato an saiyang pagkamoot sa gabos na ginibo nia. (Salmo 19:​1-6; Roma 1:20) An saro pang paagi na kita puedeng makanood manongod sa Dios iyo an pag-adal kan Biblia. Dian dakol pa an sinasabi nia manongod sa kun anong klase siang Dios. Isinasabi man nia sa sato an manongod sa saiyang katuyohan asin kun ano an boot niang gibohon niato.​—Amos 3:​7; 2 Timoteo 3:​16, 17.

[Mga ritrato sa pahina 5]

Nakanonood kita manongod sa Dios sa mga linalang asin sa Biblia