Leksion 3

Siisay si Jesu-Cristo?

Taano ta inaapod si Jesus na “panganay” na Aki nin Dios? (1)

Taano ta inaapod siang “an Tataramon”? (1)

Taano ta napadigdi si Jesus sa daga bilang tawo? (2-4)

Taano ta naggibo sia nin mga milagro? (5)

Ano an gigibohon ni Jesus sa harani nang ngapit? (6)

1. Si Jesus nabuhay sa langit bilang espiritung persona bago sia napadigdi sa daga. Sia an enot na linalang nin Dios, kaya sia inaapod na an “panganay” na Aki nin Dios. (Colosas 1:​15; Kapahayagan 3:14) Si Jesus an solamenteng Aki na linalang mismo nin Dios. Ginamit ni Jehova an bago nagin tawong si Jesus bilang saiyang “pangenot na trabahador” sa paglalang kan gabos na iba pang bagay sa langit asin digdi sa daga. (Talinhaga 8:​22-31; Colosas 1:​16, 17) Ginamit man sia nin Dios bilang Saiyang pangenot na representante sa pagtaram. Iyan an dahelan kaya si Jesus inaapod na “an Tataramon.”​—Juan 1:​1-3; Kapahayagan 19:13.

2. Isinugo nin Dios an Saiyang Aki digdi sa daga paagi sa pagbalyo kan saiyang buhay pasiring sa matris ni Maria. Kaya si Jesus dai nagkaigwa nin tawong ama. Iyan an dahelan na sia dai nagmana nin ano man na kasalan o pagkabakong sangkap. Isinugo nin Dios si Jesus digdi sa daga huli sa tolong dahelan: (1) Tanganing tokdoan kita kan katotoohan manongod sa Dios (Juan 18:37), (2) tanganing papagdanayon an sangkap na integridad, na tinatawan kita nin modelo na susundan niato (1 Pedro 2:21), asin (3) tanganing iatang an saiyang buhay sa pagkalda sa sato sa kasalan asin kagadanan. Taano ta kinaipuhan ini?​—Mateo 20:28.

3. Huli sa dai pagkuyog sa pagboot nin Dios, an enot na tawo, si Adan, nakakomitir kan inaapod kan Biblia na “kasalan.” Kaya sinentensiahan sia nin Dios na magadan. (Genesis 3:​17-19) Dai na sia nakaaabot sa mga pamantayan nin Dios, kaya bako na siang sangkap. Luway-luway siang naggurang asin nagadan. Ipinamana ni Adan an kasalan sa gabos niang aki. Iyan an dahelan na kita man naggugurang, naghehelang,  asin nagagadan. Paano daw ikaliligtas an katawohan?​—Roma 3:​23; 5:12.

4. Si Jesus sangkap na tawo arog ni Adan. Pero, bakong arog ni Adan, si Jesus makinuyog sa Dios sa sangkap na paagi minsan sa irarom kan pinakagrabeng pagbalo. Kun siring, puede niang iatang an saiyang sangkap na buhay bilang tawo tanganing mabayadan an kasalan ni Adan. Ini an inaapod kan Biblia na “pantubos.” Sa siring an mga aki ni Adan puedeng makabutas sa pagkakondenar sa kagadanan. An gabos na tumubod ki Jesus puedeng patawadon an saindang mga kasalan asin umako nin buhay na daing katapusan.​—1 Timoteo 2:​5, 6; Juan 3:​16; Roma 5:​18, 19.

5. Kan yaon digdi sa daga si Jesus nagpaomay sa mga naghehelang, nagpakakan sa mga nagugutom, asin kinalma an mga bagyo. Binuhay pa ngani nia an mga gadan. Taano ta naggibo sia nin mga milagro? (1) Naherak sia sa mga tawo na nagsasakit, asin boot niang tabangan sinda. (2) An saiyang mga milagro nagpatunay na sia Aki nin Dios. (3) Ipinaheling kaiyan an gigibohon nia para sa makinuyog na katawohan kun sia mamahala na sa daga bilang Hade.​—Mateo 14:​14; Marcos 2:​10-12; Juan 5:​28, 29.

6. Si Jesus nagadan asin binuhay liwat nin Dios bilang espiritung linalang, asin sia nagbuelta sa langit. (1 Pedro 3:18) Poon kaidto, ginibo sia nin Dios na sarong Hade. Sa dai na mahahaloy hahaleon ni Jesus an gabos na karatan asin kasakitan sa dagang ini.​—Salmo 37:​9-11; Talinhaga 2:​21, 22.

[Mga ritrato sa pahina 7]

Kaiba sa ministeryo ni Jesus an pagtotokdo, paggibo nin mga milagro, asin pati an pagdolot kan saiyang buhay para sa sato