Kun Saen Maduman Para sa mga Simbag

“An teoriyang daing katapusan na pagdusa bakong katama kan pagtubod sa pagkamoot nin Dios para sa linalang na mga bagay. . . . An paniniwala sa daing sagkod na pagpadusa sa kalag huli sa mga sala sa laog nin pira sanang taon, na dai iyan tinatawan nin oportunidad na makorehir, pagkontra sa gabos na dikta nin tamang pag-iisip.”​—NIKHILANANDA, HINDUNG PILOSOPO.

1, 2. Nin huli sa laen-laen na paniniwala manongod sa Buhay Pagkagadan, anong mga hapot an minalataw?

 AROG kan Hindung pilosopo na si Nikhilananda, an dakol ngonyan dai mapamugtak an isip sa katokdoan na daing sagkod na pasakit. Sa iyo man sanang dahelan, an iba nadedepisilan na masabotan an mga ideya na arog baga kan pakaabot sa Nirvana asin pakisumaro sa Tao.

² Pero, huli sa ideya na an kalag inmortal, an mga relihion kapwa sa Sirangan asin sa Solnopan nagmukna nin nakatatarantang daing pondo an pagbagong mga paniniwala manongod sa Buhay Pagkagadan. Posible daw na maaraman an katotoohan manongod sa nangyayari sa sato kun kita magadan? Talaga daw na inmortal an kalag? Saen daw kita makaduduman para sa mga simbag?

Siensia Asin Pilosopiya

3. Nasa siensia daw o sa sientipikong paagi nin pag-imbestigar an mga simbag sa mga hapot may labot sa buhay pagkagadan?

³ Nasa siensia daw o sa sientipikong paagi nin pag-imbestigar an mga simbag sa mga hapot dapit sa Buhay Pagkagadan? Basado sa dai pa sana nahahaloy na mga pagkasaysay nin madali nang magadan o ‘sa luwas nin hawak’ na mga eksperyensia, an nagkapirang parasiyasat nagprobar na magkomento manongod sa buhay pagkagadan. Sa pagrepaso kan nagkapira sa mga paghihingako ninda sa saiyang diskursong “Death as Entry Into Light?” (sa Bicol, “Kagadanan Bilang Pakalaog sa Liwanag?”), an Katolikong teologo na si Hans Küng nagkonklusyon: “An arog kaining mga eksperyensia daing pinatutunayan manongod sa posibleng buhay pagkagadan: an pinag-oolayan digdi ultimong limang minuto bago magadan asin bakong buhay na daing sagkod pakatapos na magadan.” Idinugang nia: “An isyu sa posibleng buhay pagkagadan grabe kadakula an halaga sa buhay bago magadan. Iyan nagkakaipo nin simbag na dapat na hanapon sa iba kun iyan dai ikatatao nin medisina.”

4. Makatatabang daw sa sato an pilosopiya na makua an mga simbag sa dakol na posibilidad nin buhay pagkagadan na itinatangro nin manlaenlaen na relihion?

⁴ Kumusta man an pilosopiya? Iyan daw makatatabang sa sato na makua an mga simbag sa dakol na posibilidad nin buhay pagkagadan na itinatangro nin manlaenlaen na relihion? Kaiba sa pilosopikong pagsiyasat an “pagbanabana,” sabi kan pilosopong Britano kaining ika-20 siglo na si Bertrand Russell. An pilosopiya, oyon sa The World Book Encyclopedia, “sarong klase nin imbestigasyon​—sarong proseso nin pag-analisar, paghusgar, pag-interpretar, asin pagbanabana.” Mapadapit sa temang Buhay Pagkagadan, an pilosopikong mga pagbanabana nagkakalaenlaen poon sa pag-apod sa inmortalidad na pangarap sana sagkod sa pagsabi na iyan diretso nin lambang tawo huli sa pagkamundag.

Sarong Napapalaen na Gikanan nin mga Simbag

5. Ano an kagurangguranging libro na isinurat kasuarin pa man?

⁵ Minsan siring, may sarong libro na igwa nin sadiosan na mga simbag sa mahalagang mga hapot manongod sa buhay asin kagadanan. Iyan an kagurangguranging libro na isinurat kasuarin pa man, na may mga kabtang na isinurat kaidtong mga 3,500 na taon na an nakaagi. An enot na kabtang kan librong ini isinurat pirang siglo bago nagibo an kaenot-enoteng mga himno sa mga kasuratan  na Hindu, an mga Veda, asin mga sangribong taon bago nabuhay digdi sa daga si Buda, Mahāvīra, asin Confucio. An librong ini natapos kan 98 C.E., labing 500 na taon bago establisaron ni Muḥammad an Islam. An napapalaen na gikanan na ini nin nakalalabing kadonongan iyo an Biblia. a

6. Taano ta malalaoman niato an Biblia na sabihon sa sato kun ano an kalag?

⁶ An Biblia igwa kan pinakaeksaktong suanoy na kasaysayan nin arin pa man na librong nag-eeksister. An kasaysayan na nasusurat sa Biblia kaidto pang kapinonan kan pamilya nin tawo asin nagpapaliwanag kun paano kita napadigdi sa daga. Dinadara pa ngani kita kaiyan sa panahon bago linalang an mga tawo. An siring na libro makatatao nanggad sa sato nin pakarorop sa kun paano ginibo an tawo asin kun ano an kalag.

7, 8. Taano ta may pagkompiar kitang makadodolok sa Biblia para sa sadiosan asin nakakokontentong mga simbag manongod sa nangyayari kun kita magadan?

⁷ Dugang pa, an Biblia sarong libro nin mga hula na nagkaigwa nin kaotoban na daing kasalasala. Halimbawa, detalyadong marhay na ihinula kaiyan an pagkosog sa kapangyarihan asin pagbagsak kan mga imperyo nin Medo-Persia asin Grecia. An mga tataramon na ini tamang-tama kaya an nagkapirang kritiko naghingoa, nin basang sana, na patunayan na an mga iyan isinurat pagkatapos kan mga pangyayari. (Daniel 8:1-7, 20-22) An nagkapirang hula na nasusurat sa Biblia detalyadong naootob sa sato mismong panahon. b​—Mateo, kapitulo 24; Marcos, kapitulo 13; Lucas, kapitulo 21; 2 Timoteo 3:1-5, 13.

⁸ Mayo nin tawo, gurano man katali, na kayang ihula an mga pangyayari sa ngapit nin eksaktong-eksakto. Solamente an makapangyarihan sa gabos asin madonong sa gabos na Kaglalang kan uniberso an makagigibo kaiyan. (2 Timoteo 3:​16, 17; 2 Pedro 1:​20, 21) An Biblia tunay na libro gikan sa Dios. Daing duwa-duwa, an siring na libro makatatao sa sato nin sadiosan asin nakakokontentong mga simbag manongod sa nangyayari sa sato kun kita magadan. Helingon nguna niato an sinasabi kaiyan manongod sa kalag.

[Mga Nota sa Ibaba]

[Mga Hapot Para sa Pag-adal]

[Ritrato sa pahina 18]

An kagurangguranging libro na isinurat kasuarin pa man

[Ritrato sa pahina 18]

Sarong libro na nagtatao nin masasarigan asin nakakokontentong mga simbag