Mahalaga an Katotoohan Manongod sa Kalag

“Mamimidbid nindo an katotoohan, asin an katotoohan mapatalingkas sa saindo.”​—JUAN 8:32.

1. Taano ta mahalaga na siyasaton an satong mga paniniwala manongod sa kalag asin kagadanan?

 AN MGA paniniwala mapadapit sa kagadanan asin sa Buhay Pagkagadan sa kadaklan bunga kan relihioso asin kultural na pinaghalean nin saro. Arog kan naheling niato, an mga iyan nagkakaralaenlaen poon sa panarig na an kalag nakaaabot sana sa pangultimong pasohan kaiyan pakalihis nin balakid na pagkamundag liwat sagkod sa ideya na an sasarong pagkabuhay iyo an nagdedeterminar sa pangultimong kaaabtan nin saro. Bilang resulta, an saro tibaad kompiado na sa katapustapusi sia makikisaro sa ultimong realidad pagkagadan, an saro man na makaabot sa Nirvana, asin an saro pa na mag-ako nin langitnon na balos. Kun siring, ano an katotoohan? Mantang an satong mga paniniwala nakaiimpluwensia sa satong mga aktitud, gawe-gawe, asin desisyon, dai daw kita maninigong magin interesado na manompongan an simbag sa hapot na iyan?

2, 3. (a) Taano ta makakokompiar kita sa sinasabi kan Biblia manongod sa kalag? (b) Arog kan sinasabi sa Biblia, ano an katotoohan manongod sa kalag?

² An kagurangguranging libro sa kinaban, an Biblia,  sinususog an kasaysayan nin tawo pabalik sa paglalang sa enot na kalag na tawo. An mga katokdoan kaiyan dai apektado nin mga pilosopiya asin tradisyon nin tawo. Malinaw na sinasabi kan Biblia an katotoohan manongod sa kalag: An saindong kalag kamo, an mga gadan biyong dai nag-eeksister, asin an mga nasa memorya nin Dios bubuhayon liwat sa saiyang itinalaan na panahon. Ano an puedeng magin kahulogan para sa saindo kan pakaaram kaini?

³ “Mamimidbid nindo an katotoohan, asin an katotoohan mapatalingkas sa saindo,” sabi ni Jesu-Cristo sa saiyang mga parasunod. (Juan 8:32) Iyo, nakapatatalingkas an katotoohan. Alagad sa ano kita patatalingkason kan katotoohan manongod sa kalag?

Katalingkasan sa Takot Asin Pagkadesesperar

4, 5. (a) Anong takot an hinahale kan katotoohan manongod sa kalag? (b) Paano an paglaom na pagkabuhay liwat nagtao nin kapusoan sa sarong tinedyer na may helang na ikagagadan?

⁴ “An kadaklan na tawo natatakot sa kagadanan asin hinihingoa na likayan an pag-isip-isip manongod dian,” sabi kan The World Book Encyclopedia. “An mismong termino na ‘kagadanan’ haros nagin nang dai puedeng sambiton sa Solnopan,” sabi nin sarong historyador. Asin sa nagkapirang kultura an mga pandisimular na arog kan “nagpaaram na” asin “naghale na” parateng ginagamit sa pagladawan sa pagkagadan nin sarong tawo. An takot na ini sa kagadanan sa katunayan takot sa dai aram, ta para sa kadaklan sarong misteryo an kagadanan. An pakaaram kan katotoohan manongod sa nangyayari kun kita magadan nakapakakalma sa takot na ini.

⁵ Halimbawa, estudyare an kaisipan kan 15 anyos na si Michaelyn. Sia may leukemia asin napaatubang sa sarong makaturotristeng kagadanan. Natatandaan kan ina nia, si Paula: “Sabi ni Michaelyn dai sia nahahadit na magadan ta aram nia na temporaryo sana an kagadanan. Haloy niamong pinag-oolayan kaidto an bagong kinaban nin Dios asin an gabos na bubuhayon liwat dian. Pambihira an pagtubod ni Michaelyn ki Jehova Dios asin sa pagkabuhay liwat​—na mayo ni kadikit na pagduda.” Pinatalingkas kan paglaom na pagkabuhay liwat an mapusong daragitang ini sa nakalulunos na takot sa kagadanan.

6, 7. Sa anong pagkadesesperar kita pinatatalingkas kan katotoohan manongod sa kalag? Iilustrar.

⁶ Paano nakaapektar sa mga magurang ni Michaelyn an katotoohan? “An kagadanan ni nene mi iyo an pinakamakolog na nangyari sa samo kasuarin pa man,” sabi ni Jeff, an saiyang ama. “Alagad kami lubos na nagtitiwala sa panuga ni Jehova na pagkabuhay liwat, asin halat mi an aldaw na makugos giraray an namomotan niamong si Michaelyn. Kanigoan kaogma kan pag-iribaiba giraray na iyan!”

⁷ Iyo, an katotoohan manongod sa kalag pinatatalingkas an saro sa dai nang esperansa na pagkadesesperar na tibaad ibunga kan pagkagadan nin sarong namomotan. Siempre, mayo nin biyong makahahale kan kolog asin kapungawan na naeeksperyensiahan kun nagadan an sarong namomotan. Minsan siring, an paglaom na pagkabuhay liwat nakaiina sa pagmondo asin pinagigin mas pasil na tioson an kolog.

8, 9. Sa anong takot kita pinatatalingkas kan katotoohan manongod sa kamugtakan kan mga gadan?

⁸ An Makakasuratan na katotoohan manongod sa kamugtakan kan mga gadan pinatatalingkas man kita sa takot sa mga gadan. Poon kan manodan an katotoohan na ini, an dakol na dati nakakadena sa superstisyosong mga ritual may labot sa mga gadan dai na naghahadit manongod sa mga sumpa, ligsok, anting, asin anito, ni nagdodolot pa man sinda nin magastos na mga atang tanganing sirosiroon an saindang mga apoon saka olangon sinda sa pagbalik tanganing songkoon an mga buhay. Sa katunayan, mantang an mga gadan ‘mayo man lamang nin pakaaram,’ daing epekto an siring na mga kaugalean.​—Eclesiastes 9:5.

⁹ An katotoohan manongod sa kalag, na yaon sa Biblia, tunay na nakapatatalingkas asin mapagtitiwalaan. Alagad estudyare man an daing kaagid na oportunidad na iinoopresir sa saindo kan Biblia.

[Mga Hapot Para sa Pag-adal]

[Blurb sa pahina 29]

An katotoohan manongod sa kalag pinatatalingkas kamo sa takot sa kagadanan, takot sa mga gadan, pagkadesesperar huli sa pagkagadan nin sarong namomotan