Sarong Daing Kaagid na Oportunidad!

“An gabos na nabubuhay asin naggigibo nin pagtubod sa sako dai na noarin man magagadan.”​—JUAN 11:26.

1. An minilyon na gadan ngonyan bubuhayon liwat sa anong klaseng palibot?

 KUN an minilyon ibangon na sa pagkabuhay liwat, dai sinda ibabalik sa buhay sa sarong daga na daing laog. (Gibo 24:15) Sinda mapapagmata sa sarong pinagayon na palibot asin makakaheling na inandam para sa sainda an istaran, gubing, saka abundang pagkakan. Sairisay an magibo kan gabos na pag-andam na ini? Malinaw nanggad, kaipuhan na may mga nag-iistar na sa bagong kinaban bago pumoon an daganon na pagkabuhay liwat. Alagad sairisay?

2-4. Anong daing kaagid na oportunidad an naghahalat sa mga nabubuhay sa “huring mga aldaw”?

² An kaotoban kan hula sa Biblia nagpapaheling na kita nabubuhay sa “huring mga aldaw” kan palakaw na ini nin mga bagay. a (2 Timoteo 3:1) Dai na nanggad mahahaloy, mainterbenir si Jehova Dios sa mga gibo-gibo nin tawo asin popohoon an karatan sa daga. (Salmo 37:10, 11; Talinhaga 2:21, 22) Sa panahon na iyan, ano an mangyayari sa mga fiel na naglilingkod sa Dios?

³ Dai lalaglagon ni Jehova an mga matanos kaiba kan mga maraot. (Salmo 145:20) Nungka niang ginibo an siring na bagay, asin dai nia iyan gigibohon kun linigan na nia an daga kan gabos na karatan. (Ikomparar an Genesis 18:22, 23, 26.) Sa katunayan, an huring libro kan Biblia nagtataram manongod sa “sarong dakulang kadaklan, na dai nin siisay man na makabibilang, hale sa gabos na nasyon asin tribo asin banwaan patin tataramon,” na minaluwas sa “dakulang kahorasaan.” (Kapahayagan 7:9-14) Iyo, an sarong dakulang kaburonyogan makaliligtas sa dakulang kahorasaan na dian matatapos an presenteng maraot na kinaban, asin maralaog sinda sa bagong kinaban nin Dios. Dian, an makinuyog na katawohan puedeng lubos na makinabang sa marahayon na probisyon nin Dios na patalingkason an katawohan sa kasalan asin kagadanan. (Kapahayagan 22:1, 2) Sa siring, an “dakulang kadaklan” dai noarin man kaipuhan na mag-agi nin kagadanan. Kanigoan kadaing kaagid na oportunidad!

⁴ Makakokompiar daw kita sa makangangalas na paglaom na ini? Iyo nanggad! Si Jesu-Cristo mismo nagsabi na magkakaigwa nin panahon na an mga tawo mabubuhay na nungka pang magagadan. Bago buhayon liwat an katood niang si Lazaro, sinabihan ni Jesus si Marta: “An gabos na nabubuhay asin naggigibo nin pagtubod sa sako dai na noarin man magagadan.”​—Juan 11:26.

Kamo Man Puedeng Mabuhay Sagkod Lamang

5, 6. Kun gusto nindong mabuhay sagkod lamang sa Paraiso digdi sa daga, ano an maninigo nindong gibohon?

⁵ Gusto daw nindong mabuhay sagkod lamang sa Paraiso digdi sa daga? Naghihimuyawot daw kamong maheling giraray an saindong mga namomotan? Kun siring dapat na saindong ilaog sa isip an tamang kaaraman dapit sa kabotan asin mga katuyohan nin Dios. Sa sarong pamibi sa Dios, si Jesus nagsabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.”​—Juan 17:3.

⁶ Kabotan nin Dios na “an gabos na klase nin tawo makaligtas asin makaabot sa tamang kaaraman  kan katotoohan.” (1 Timoteo 2:3, 4) Ngonyan na an panahon na mag-adal kun paano kamo, kaiba nin minilyon na iba pa na naggigibo na kan kabotan nin Dios, mabubuhay sagkod lamang sa Paraiso digdi sa daga. An Mga Saksi ni Jehova maoogmang tabangan kamo sa pakanood nin dakol pa manongod sa Dios asin sa saiyang mga kahagadan. Taano ta dai makikomunikar sa sainda sa sarong Kingdom Hall na harani sa saindo o sumurat sa pinakaharaning adres na nalilista sa kasunod na pahina?

[Nota sa Ibaba]

[Mga Hapot Para sa Pag-adal]

[Ritrato sa pahina 31]

“An sarong dakulang kadaklan” dai noarin man kaipuhan na mag-agi nin kagadanan