Sarong Seguradong Paglaom

“Poon na mamundag yaon an danay na posibilidad na an sarong tawo magadan ano man na oras; asin dai malilikayan, an posibilidad na ini magigin dai mapagdududahan na katotoohan.”​—ARNOLD TOYNBEE, BRITANONG HISTORYADOR.

1. Anong katunayan an kinaipuhan na akoon nin katawohan, na nagpapalataw nin anong mga hapot?

 SIISAY an makakapakiargumento sa nasambitan sa enotan na risang marhay na katotoohan na nasa kasaysayan? Kaidto pa an katawohan pirmeng kaipuhan na akoon an teribleng katunayan nin kagadanan. Asin kanigoan na pakamate nin pagkadaing maginibo an naeeksperyensiahan niato kun nagadan an sarong namomotan niato! Sa panahon na iyan garo baga biyong dai na marerebokar an kawaran. Posible daw na makaibanan giraray an satong gadan nang mga namomotan? Anong paglaom an itinatao kan Biblia para sa mga gadan? Estudyare an minasunod na pagkasaysay.

‘An Katood Niato Nagadan’

2-5. (a) Kan magadan an katood niang si Lazaro, paano ipinaheling ni Jesus an saiyang pagigin andam asin abilidad na buhayon sia liwat? (b) Apuera sa pagbuhay liwat ki Lazaro, ano an nagibo kan milagrong pagkabuhay liwat?

² An taon 32 C.E. Sa sadit na banwaan nin Betania, tolong kilometro sa luwas nin Jerusalem, yaon nag-iistar si Lazaro kaiba an mga tugang niang babae na si Marta asin Maria. Sinda dayupot na mga katood ni Jesus. Sarong aldaw, naghelang nin grabe si Lazaro. Tolos-tolos, ipinaabot kan nahahadit niang mga tugang na babae an baretang ini ki Jesus, na yaon sa ibong kan Salog nin Jordan. Si Lazaro asin an mga tugang na babae kaini padangat ni Jesus, kaya pag-abot nin panahon nagpasiring sia sa Betania. Sa dalan, sinabihan ni Jesus an saiyang mga disipulo: “Si Lazaro na katood niato nagpahingalo, alagad ako maduman tanganing pukawon sia sa pagkatorog.” Huli ta dai tolos nasabotan kan mga disipulo an kahulogan kan mga tataramon na ini, sayod nang sinabi ni Jesus: “Si Lazaro nagadan.”​—Juan 11:1-15.

³ Kan mabaretaan na si Jesus paduman sa Betania, duminalagan si Marta sa pagsabat sa saiya. Napahiro an boot kan saiyang kapungawan, sinierto sa saiya ni Jesus: “An saimong tugang mabubuhay liwat.” Suminimbag si Marta: “Aram ko na sia mabubuhay sa pagbuhay liwat sa huring aldaw.” Dangan sinabi sa saiya ni Jesus: “Ako iyo an pagkabuhay liwat asin an buhay. An naggigibo nin pagtubod sa sako, minsan pa sia magadan, mabubuhay.”​—Juan 11:20-25.

⁴ Dangan nagduman si Jesus sa linobngan asin ipinahale an gapo na nakatakop sa entrada kaiyan. Pakapamibi nin makosog, sia nagboot: “Lazaro, lumuwas ka!” Asin mantang nakatorohok sa linobngan an gabos na mata, luminuwas man nanggad si Lazaro. Si Lazaro binuhay liwat ni Jesus​—na ibinalik an buhay sa sarong tawo na apat na aldaw nang gadan!​—Juan 11:38-44.

⁵ Si Marta dati nang may pagtubod sa panugang pagkabuhay liwat. (Juan 5:28, 29; 11:23, 24) An milagro kan pakabalik ni Lazaro sa buhay nakapakosog sa saiyang pagtubod asin itinadom an pagtubod sa iba. (Juan 11:45) Alagad ano an eksaktong kahulogan kan terminong “pagkabuhay liwat”?

“Sia Mabubuhay”

6. Ano an kahulogan kan terminong “pagkabuhay liwat”?

⁶ An terminong “pagkabuhay liwat” trinadusir hale sa termino sa Griego na a·naʹsta·sis, na sa literal  nangangahulogan na “pagtindog giraray.” An Hebreong mga paratradusir kan Griego trinadusir an a·naʹsta·sis kaiba kan mga termino sa Hebreo na techi·yathʹ ham·me·thimʹ, na nangangahulogan na “pakabalik kan animo kan mga gadan.” a Sa siring, an pagkabuhay liwat pagbangon kan tawo hale sa daing buhay na kamugtakan nin kagadanan​—na rinereaktibar an ugale sa buhay kan indibiduwal.

7. Taano an pagbuhay liwat sa mga indibiduwal ta dai magigin problema para ki Jehova Dios asin ki Jesu-Cristo?

⁷ Huling daing katapusan an kadonongan asin sangkap an memorya, pasil na buhayon liwat ni Jehova Dios an sarong tawo. An paggirumdom sa ugale sa buhay kan mga gadan​—an saindang mga karakteristiko, an saindang personal na kasaysayan, asin an gabos na detalye kan saindang karakter—​bakong problema para sa saiya. (Job 12:13; ikomparar an Isaias 40:26.) Si Jehova iyo man an Kagtugdas nin buhay. Huli kaini, madali niang buhayon liwat an iyo man sanang tawo, na tinatawan sia kan iyo man sanang personalidad sa sarong hawak na bagong pormahon. Dugang pa, arog kan ipinaririsa kan eksperyensia ni Lazaro, si Jesu-Cristo andam asin kayang buhayon liwat an mga gadan.​—Ikomparar an Lucas 7:11-​17; 8:40-​56.

8, 9. (a) Taano ta bakong magkabagay an pagkabuhay liwat asin an ideyang inmortalidad kan kalag? (b) Ano an remedyo sa kagadanan?

⁸ Minsan siring, an Makakasuratan na katokdoan na pagkabuhay liwat bakong kabagay kan doktrinang inmortalidad kan kalag. Kun an inmortal na kalag nagdanay na buhay pagkagadan, mayo nin kaipuhan na buhayon liwat. Sa katunayan, si Marta mayong ipinahayag na ideya manongod sa inmortal na kalag na padagos na nabubuhay sa ibang lugar pagkagadan. Dai sia naniwala na si Lazaro nagduman na sa sarong rona nin mga espiritu tanganing ipadagos an saiyang pag-eksister. Al kontraryo, ipinaheling nia an saiyang pagtubod sa katuyohan nin Dios na rebokaron an mga epekto nin kagadanan. Sia nagsabi: “Aram ko na sia mabubuhay sa pagbuhay liwat sa huring aldaw.” (Juan 11:23, 24) Kaagid kaiyan, si Lazaro mismo mayo nin iinestoryang mga eksperyensia sa buhay pagkagadan. Mayo man nin ibabareta.

⁹ Malinaw nanggad, oyon sa Biblia, an kalag nagagadan asin an remedyo sa kagadanan pagkabuhay liwat. Alagad binilyon nang tawo an nagadan poon kan an enot na tawo, si Adan, mabuhay digdi sa daga. Kaya sairisay an bubuhayon liwat, asin saen?

“An Gabos na Nasa mga Lolobngan na Girumdoman”

10. Ano an ipinanuga ni Jesus mapadapit sa mga yaon sa mga lolobngan na girumdoman?

¹⁰ Si Jesu-Cristo nagsabi: “An oras maabot na an  gabos na nasa mga lolobngan na girumdoman makadadangog kan saiyang [ki Jesus na] tingog asin maruluwas.” (Juan 5:28, 29) Iyo, nanuga si Jesu-Cristo na an gabos na nasa memorya ni Jehova bubuhayon liwat. Binilyon nang tawo an nabuhay asin nagadan. Sairisay sa sainda an nasa memorya nin Dios, na naghahalat kan pagkabuhay liwat?

11. Sairisay an bubuhayon liwat?

¹¹ An mga nagsunod sa matanos na dalan bilang mga lingkod ni Jehova bubuhayon liwat. Alagad minilyon na iba pa an nagadan na dai ipinaheling kun baga sinda masunod sa matanos na mga pamantayan nin Dios. Sinda magsalang ignorante sa mga kahagadan ni Jehova o kulang nin supisyenteng panahon na magibo an kaipuhan na mga pagbago. An mga ini yaon man sa memorya nin Dios asin sa siring bubuhayon liwat, huli ta an Biblia nanunuga: “Magkakaigwa nin pagkabuhay liwat kapwa an mga matanos asin an mga bakong matanos.”​—Gibo 24:15.

12. (a) Anong bisyon an inako ni apostol Juan manongod sa pagkabuhay liwat? (b) Ano an “iinapon sa danaw nin kalayo,” asin ano an kahulogan kan pananaram na iyan?

¹² Si apostol Juan nagkaigwa nin nakapupukaw sa boot na bisyon nin mga binuhay liwat na nagtitindog sa atubangan kan trono nin Dios. Sa pagladawan kaiyan, sia nagsurat: “Itinao kan dagat an mga gadan na yaon dian, asin itinao kan kagadanan asin kan Hades an mga gadan na yaon dian, asin an lambang saro hinokoman oyon sa saindang mga gibo. Asin an kagadanan asin Hades iinapon sa danaw nin kalayo. Ini iyo an ikaduwang kagadanan, an danaw nin kalayo.” (Kapahayagan 20:12-14) Isip-isipa an kahulogan kaiyan! An gabos na gadan na nasa memorya nin Dios makaluluwas sa Hades, o Sheol, an pankagabsan na lolobngan nin katawohan. (Salmo 16:10; Gibo 2:31) Dangan “an kagadanan asin Hades” iaapon sa inaapod na “danaw nin kalayo,” na nagsisimbolo sa biyong pagkalaglag. Dai na maeksister an pankagabsan na lolobngan nin katawohan.

Bubuhayon Liwat Saen?

13. Taano ta iinareglo nin Dios na an nagkapira buhayon liwat pasiring sa langit, asin anong klaseng hawak an itatao sa sainda ni Jehova?

¹³ An sadit na kabilangan nin mga lalaki asin babae bubuhayon liwat pasiring sa buhay sa langit. An mga ini mamamahala kaiba ni Cristo bilang hade saka saserdote asin makikakabtang sa paghale kan gabos na epekto kan kagadanan na namana kan katawohan sa enot na tawo, si Adan. (Roma 5:12; Kapahayagan 5:9, 10) Oyon sa Biblia, an kabilangan ninda 144,000 sana asin pinili sinda hale sa mga parasunod ni Cristo, poon sa fiel na mga apostol. (Lucas 22:28-​30; Juan 14:2, 3; Kapahayagan 7:4; 14:1, 3) An lambang saro sa mga binuhay liwat na ini tatawan ni Jehova nin hawak na espiritu tangani na sinda mabuhay sa langit.​—1 Corinto 15:35, 38, 42-​45; 1 Pedro 3:18.

14, 15. (a) Sa anong klaseng buhay bubuhayon liwat an mayoriya sa mga nagadan? (b) Anong mga bendisyon an maeeksperyensiahan kan makinuyog na katawohan?

¹⁴ Minsan siring, an mayoriya sa mga nagadan bubuhayon liwat pasiring sa buhay digdi sa daga. (Salmo 37:29; Mateo 6:10) Anong klaseng daga? An daga ngonyan pano nin iriwal, pagpabolos nin dugo, polusyon, asin kadahasan. Kun an mga gadan mabubuhay liwat sa siring na daga, segurado na dai magdadanay an ano man na kaogmahan. Alagad ipinanuga kan Kaglalang na dai na mahahaloy tataposon nia an presenteng sosyedad sa kinaban na kontrolado ni Satanas. (Talinhaga 2:21, 22; Daniel 2:44) Dangan an sarong matanos na bagong sosyedad nin tawo​—“sarong bagong daga”—​magigin totoo. (2 Pedro 3:13) Sa panahon na iyan “mayo nin nag-eerok na masabi: ‘Naghehelang ako.’” (Isaias 33:24) Pati an labi-labing kamondoan huli sa kagadanan hahaleon, ta “papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”​—Kapahayagan 21:4.

¹⁵ Sa ipinanuga nin Dios na bagong kinaban, an mga mahoyo “nanggad magkakararanga nin labi-labi sa nagsosopay na katoninongan.” (Salmo 37:11) Gradwal na ibabalik kan langitnon na gobyerno ni Cristo Jesus asin kan 144,000 na kairiba nia an makinuyog na katawohan sa pagkasangkap na iwinara kan satong enot na mga magurang, si Adan asin Eva. Makakabilang kan mga mag-iistar sa daga an mga binuhay liwat.​—Lucas 23:42, 43.

16-18. Anong kagayagayahan an itatao kan pagkabuhay liwat sa mga pamilya?

¹⁶ An Biblia nagtatao nin kadikit na ideya sa kagayagayahan na itatao kan pagkabuhay liwat sa mga pamilya. Imahinara an kaogmahan na namatean kan babaeng balo na taga-Nain kan papondohon ni Jesus an prosisyon sa gadan asin binuhay  liwat an solo niang aki! (Lucas 7:11-​17) Pagkatapos, harani sa Dagat nin Galilea, kan buhayon liwat ni Jesus an sarong 12 anyos na daragita, an saiyang mga magurang “haros mawara sa sadiri huli sa labi-labi kadakulang kaogmahan.”​—Marcos 5:21-24, 35-42; helingon man an 1 Hade 17:17-24; 2 Hade 4:32-​37.

¹⁷ Para sa minilyon na torog ngonyan sa kagadanan, an pagkabuhay liwat mangangahulogan nin buhay sa sarong matoninong na bagong kinaban. Isip-isipa na sana an nakapupukaw sa boot na oportunidad na binubukasan kaini para ki Tommy asin para sa negosyante, na nasambitan sa enot na kabtang kan brosyur na ini! Pagmata ni Tommy sa buhay sa Paraiso digdi sa daga, sia iyo man giraray an Tommy na midbid kan saiyang ina​—alagad mayo nin mga kamatean. Mahihimo kan ina na duotan sia, kugoson sia, asin kamotan sia. Kaagid kaiyan, imbes na malaom sa haros daing katapusan na siklo nin mga pagkamundag liwat, an negosyanteng taga-India igwa kan makangangalas na oportunidad na buklaton an saiyang mga mata sa bagong kinaban nin Dios asin maheling an saiyang mga aki.

¹⁸ An pakaaram kan katotoohan manongod sa kalag, manongod sa nangyayari sa sato kun kita magadan, asin manongod sa paglaom na pagkabuhay liwat puede man na magkaigwa nin hararom na epekto sa mga buhay ngonyan. Helingon niato kun paano.

[Nota sa Ibaba]

[Mga Hapot Para sa Pag-adal]

[Ritrato sa pahina 26]

An pagkabuhay liwat magtatao nin nagdadanay na kagayagayahan