Igwa daw Kamo nin Espiritung Inmortal?

IGWA daw nin buhay pagkagadan? Dakol nang milenyo na an hapot na iyan nakariribaraw sa katawohan. Sa nag-aging mga panahon, pinensar nin mga tawo sa gabos na sosyedad an temang iyan asin nakaisip sinda nin manlaenlaen na paniniwala.

Sa bilog na kinaban, kaiba an rehion sa Pasipiko na Polinesia, Melanesia, asin Micronesia, dakol an naniniwala na may “espiritu” na nagdadanay na buhay pagkagadan nin sarong tawo. Talaga daw na may nasa laog nin tawo na binabayaan an hawak pagkagadan asin nagpapadagos na mabuhay? Ano an espiritu sa sarong buhay na tawo? Ano an nangyayari dian kun kita magadan? An ipinasabong na Tataramon nin Dios, an Biblia, nagtatao nin sadiosan asin nakakokontentong simbag sa mga hapot na ini.

Ano an Espiritu?

Sa Biblia, an mga terminong trinadusir na “espiritu” sa pundamental nangangahulogan “hinangos.” Alagad an ipinapakahulogan kaini bako sanang an paghangos. Halimbawa, sinasabi kan kagsurat sa Biblia na si Santiago: “An hawak na daing espiritu gadan.” (Santiago 2:26) Huli kaini, an espiritu iyo an nagtatao nin buhay sa hawak.

An puersang ini na nagtatao nin buhay dai puedeng an hinangos sana, o aire, na minaagi sa pulmon. Taano ta dai? Huli ta pagpondo kan paghangos, nagdadanay an buhay sa mga selula kan hawak sa halipot na panahon​—“sa laog nin nagkapirang minuto,” segun sa The World Book Encyclopedia. Sa dahelan na ini puedeng magibo talaga an mga paghihingoa na buhayon an saro, asin ikinakabalyo an mga organo sa hawak hale sa sarong tawo pasiring sa iba. Alagad oras na maparong an silyab nin buhay sa mga selula kan hawak, basang sana an gabos na paghihingoa na ibalik an buhay. Dai ikababalik an animo dawa nin sarong  selula kan gabos na hinangos sa kinaban. Kun siring, an espiritu iyo an dai naheheling na puersa nin buhay​—an silyab nin buhay​—na nakabubuhay sa mga selula. An puersa nin buhay na ini sustenido nin paghangos.​—Job 34:​14, 15.

Sa mga tawo sana daw aktibo an espiritung iyan? Tinatabangan kita kan Biblia na makaabot sa tamang konklusyon sa bagay na ini. Isinurat kan madonong na si Hadeng Salomon: “Siisay an nakaaaram kan espiritu kan mga aki nin katawohan, kun baga iyan minasakat paitaas; asin kan espiritu kan hayop, kun baga iyan minahilig pababa sa daga?” (Eclesiastes 3:21) Kaya an mga hayop saka an mga tawo sinasabing may espiritu. Paano iyan mangyayari?

An espiritu, o puersa nin buhay, ikababaing sa koryente na nagdadalagan sa sarong makina o kasangkapan. An elektrisidad na dai naheheling magagamit na gumibo nin manlaenlaen na trabaho, depende sa klase nin kasangkapan na pinaaandar kaiyan. Halimbawa, an sarong kalan puedeng painiton, an komputer puedeng papangyarihon na paagihon sa proseso an impormasyon asin magkuenta, asin an telebisyon magpaluwas nin mga retrato asin tanog. Pero, nungka na an koryente nagigin kapareho kan kasangkapan na pinaaandar kaiyan. Iyan nagdadanay na saro sanang puersa. Kaagid kaiyan, an puersa nin buhay dai nagkakaigwa kan arin man na karakteristiko kan mga linalang na tinatawan kaiyan nin buhay. Iyan mayo nin personalidad, mayo nin kakayahan sa pag-iisip. An mga tawo sagkod hayop “sasaro sana an espiritu.” (Eclesiastes 3:19) Huli kaini, kun an saro magadan, an saiyang espiritu dai nagpapadagos na mabuhay sa ibang rona bilang espiritung linalang.

Kun siring, ano an kamugtakan kan gadan? Asin ano an nangyayari sa espiritu kun an saro magadan?

“Sa Kabokabo Ka Man Mabalik”

Kan tuyong makisuway an enot na tawo, si Adan, sa pagboot nin Dios, sinabi sa saiya ni Jehova: “Sa ganot kan saimong lalauogon  makakan ka nin tinapay sagkod na ika bumalik sa daga, huli ta dian ka kinua. Huli ta ika kabokabo asin sa kabokabo ka man mabalik.” (Genesis 3:19) Haen si Adan bago sia lalangon ni Jehova hale sa kabokabo? Tara, sia mayo! Sia talagang dai nag-eeksister. Kaya kan sabihon ni Jehova Dios na si Adan ‘mabalik sa daga,’ an boot niang sabihon magagadan si Adan. Si Adan dai mabalyo sa rona nin mga espiritu. Pagkagadan sia magigin na naman daing buhay, dai nag-eeksister. An padusa sa saiya kagadanan​—kawaran nin buhay​—bakong pagbalyo sa ibang rona.​—Roma 6:23.

Kumusta man an iba na nagadan? An kamugtakan kan mga gadan linilinaw sa Eclesiastes 9:​5, 10, na dian satong mababasa: “An mga gadan daing aram . . . Mayo nin okupasyon, mayo nin plano, mayo nin kaaraman o intelihensia, sa laog kan lolobngan.” (Moffatt) Kun siring, an kagadanan kamugtakan nin dai pag-eksister. Nagsurat an salmista na pagkagadan nin saro, “an saiyang espiritu minaluwas, minabalik sia sa saiyang daga; sa aldaw na iyan an saiyang mga pag-isip napapara.”​—Salmo 146:4.

Malinaw nanggad, an mga gadan daing pag-aram, daing gibo. Mayo sindang aram. Dai ninda mahihimong maheling kamo, madangog kamo, o kaolayon kamo. Ni tabangan kamo ni kologan kamo dai ninda magigibo. Tunay nanggad na dai kamo dapat na matakot sa gadan. Alagad paano na an espiritu “minaluwas” sa saro sa oras kan saiyang pagkagadan?

An Espiritu “Minabalik sa Tunay na Dios”

Sinasabi kan Biblia na kun an saro magadan, “an espiritu mismo minabalik sa tunay na Dios na nagtao kaiyan.” (Eclesiastes 12:7) Nangangahulogan daw ini na an sarong espiritu literal na nagbibiahe sa espasyo pasiring sa presensia nin Dios? Dai nanggad! An pagkagamit kan Biblia sa terminong “minabalik” dai nagkakaipo nin aktuwal na pagbalyo hale sa sarong lugar pasiring sa iba. Halimbawa, sinabihan an mga Israelita na bakong fiel: “‘Pagbalik kamo sa sako, asin ako mabalik sa saindo,’ an sabi ni Jehova kan mga hukbo.” (Malaquias 3:7) An “pagbalik” kan Israel ki Jehova nangahulogan nin pagtalikod sa salang gawe asin pagsunod giraray sa matanos na dalan nin Dios. Asin an “pagbalik” ni Jehova sa  Israel nangahulogan kan pagtao nia giraray nin paborableng atension sa saiyang banwaan. Sa duwang kaso an kalabot sa “pagbalik” aktitud, bakong literal na pagbalyo hale sa sarong lugar pasiring sa iba.

Kaagid kaiyan, pagkagadan mayo nin nangyayaring aktuwal na pagbalyo hale sa daga pasiring sa langitnon na rona kun an espiritu “minabalik” sa Dios. Girumdoma, an espiritu iyo an puersa nin buhay. Oras na mawara sa saro an puersang iyan, solamente an Dios an may kakayahan na ibalik iyan sa saiya. Kaya an espiritu “minabalik sa tunay na Dios” ta biyo nang nasa kamot nin Dios an ano man na paglaom sa buhay sa ngapit para sa tawong iyan.

Estudyare, halimbawa, an sinasabi kan Kasuratan manongod sa pagkagadan ni Jesus. Isinasaysay kan kagsurat nin ebanghelyo na si Lucas: “Si Jesus nag-apod sa makosog na tingog asin nagsabi: ‘Ama, sa saimong mga kamot ipinagkakatiwala ko an sakong espiritu.’ Kan nasabi na nia ini, nagadan sia.” (Lucas 23:46) Mantang an espiritu ni Jesus minaluwas sa saiya, sia dai man literal na pasiring na sa langit. Si Jesus dai binuhay liwat hale sa mga gadan sagkod kan ikatolong aldaw. Asin 40 aldaw pa bago sia suminakat sa langit. (Gibo 1:​3, 9) Minsan siring, kan panahon na sia magadan, may pagkompiar na ipinagkatiwala ni Jesus an saiyang espiritu sa kamot kan saiyang Ama, na biyong nananarig sa kakayahan ni Jehova na buhayon sia liwat.

Iyo, solamente an Dios an makabubuhay liwat sa saro. (Salmo 104:30) Kanigoan karahay na mga posibilidad an binubukasan kaini!

Sarong Paglaom na Segurado

Sinasabi kan Biblia: ‘An oras maabot na an gabos na nasa mga lolobngan na girumdoman makadadangog kan tingog ni Jesus asin maruluwas.’ (Juan 5:​28, 29) Iyo, ipinanuga ni Jesu-Cristo na an gabos na nasa paggirumdom ni Jehova bubuhayon liwat. Imbes na mamondong mga paisi na may nagadan, sasabihon nin magayagayang mga bareta an manongod sa mga binuhay giraray. Kanigoan kadakulang kaogmahan na sabaton hale sa lolobngan an mga namomotan!

 Boot daw nindong makaaram pa nin orog manongod sa kun paano kamo makikinabang sa paglaom na ini na tao nin Dios? Iniimbitaran niamo kamo na sumurat sa sarong adres na nasa ibaba para sa sarong kopya kan brosyur na Puede Kang Magin Katood nin Dios!

Laen sana kun may ibang tanda, an mga kotasyon sa Biblia trinadusir hale sa Ingles na New World Translation of the Holy Scriptures.